မက်ဆီရဲ့ဇနီးသည် အန်တိုနယ်လာဟာ သူ့ရဲ့ အင်စတာဂရမ်စတိုရီမှာ မက်ဆီရဲ့ အောင်ပွဲခံနေပုံနဲ့ Thor ရဲ့ လိုဂိုတစ်ခုကို တွဲတင်ခဲ့ပါတယ်။ မက်ဆီဟာ အတ္တလန်တာယူနိုက်တက်ကို လေးဂိုးပြတ်နဲ့ အနိုင်ရရှိခဲ့တဲ့ပွဲမှာ အသင်းအတွက် နှစ်ဂိုးသွင်းယူကာ ခြေစွမ်းပြနိုင်ခဲ့ပါတယ်။
ဒီပွဲမှာ မက်ဆီက ဂိုးသွင်းအပြီး သူ့ရဲ့လက်မှာ တစ်ခုခု ကိုင်ထားဟန်နဲ့ အောင်ပွဲခံပြခဲ့ပါတယ်။ မက်ဆီရဲ့ အောင်ပွဲခံဟန်က “Hold my beer” ဆိုတဲ့သဘောမျိုးနဲ့ လက်ထဲမှာ ဘီယာခွက်ကိုင်ပြီး ဘက်ခမ်းကို ရည်ရွယ်အောင်ပွဲခံခဲ့တယ်လို့ သတင်းမီဒီယာတွေက ကျယ်ကျယ်လောင်လောင် ဖော်ပြခဲ့ပါတယ်။
ဒါပေမယ့် နောက်ကွယ်မှာတော့ တကယ့်အကြောင်းရင်းက ဒီလိုမျိုးမဖြစ်နိုင်ဘဲ အန်တိုနယ်လာကလည်း သူ့ရဲ့ ဆိုရှယ်မီဒီယာကနေ ဒီအောင်ပွဲခံဟန်နဲ့ပတ်သက်လို့ အရိပ်အမြွက် ဖော်ထုတ်ခဲ့ဟန်ရှိပါတယ်။ မက်ဆီရဲ့သားဖြစ်သူ သီယာဂိုမက်ဆီဟာ မာဗယ်လ်ဟီးရိုးတစ်ယောက်ဖြစ်တဲ့ Thor ရဲ့ ပရိသတ်တစ်ယောက်ဖြစ်ခဲ့ပြီး မက်ဆီကလည်း သူ့သားအတွက် အခုလိုမျိုး ရည်ရွယ်အောင်ပွဲခံခဲ့တာမျိုး ဖြစ်နိုင်ပါတယ်။
မက်ဆီရဲ့ လက်အနေအထားဟာ တစ်ဖက်ကကြည့်ရင်လည်း သူ့လက်မှာ Hammer ရောက်လာဖို့ စောင့်နေဟန်၊ ကိုင်ထားဟန်ရှိနေပါတယ်။ စပိန်အခြေစိုက် သတင်းဌာနရဲ့ ဖော်ပြချက်အရလည်း မက်ဆီဟာ သူ့ရဲ့အောင်ပွဲခံဟန်အပေါ် သားဖြစ်သူရဲ့ တုံ့ပြန်ပုံကို မြင်တွေ့ရပြီးနောက် ကျေနပ်နှစ်သက်နေခဲ့ကြောင်းလည်း သိရှိရပါတယ်။
မက်ဆီဟာ အင်တာမိုင်ယာမီကို ရောက်ရောက်ချင်း ခြေစွမ်းပြနေပြီး အသင်းအတွက် ပွဲဦးထွက်မှာ အနိုင်ဂိုးကို ဖရီးကစ်တစ်ဆင့် နောက်ဆုံးမိနစ်မှာ သွင်းယူပေးနိုင်ခဲ့သလို အခုလိုမျိုး ပရိသတ်တွေအကြား ပြောစရာဖြစ်ခဲ့တဲ့ အောင်ပွဲခံဟန်အတွက်လည်း အတ္တလန်တာယူနိုက်တက်နဲ့ပွဲမှာ (၂) ဂိုးသွင်း၊ တစ်ဂိုးဖန်တီးကာ ခြေစွမ်းပြနိုင်ခဲ့ပါတယ်။