ပြည်ထောင်စုရွေးကောက်ပွဲကော်မရှင်က ဒီကနေ့ စက်တင်ဘာ ၁၂ ရက် နေ့စွဲနဲ့ ထုတ်ပြန်ကြေညာခဲ့တာဖြစ်ပြီး လွှတ်တော်ကိုယ်စားလှယ်လောင်းတွေအနေနဲ့ ရွေးကောက်ပွဲကာလအတွင်းစုဝေးဟောပြောခြင်း၊ မဲဆွယ်စည်းရုံးရေးတွေ ဆောင်ရွက်ရာမှာ ကိုဗစ်-၁၉ ကာကွယ်ထိန်းချုပ်ရေးနည်းလမ်းတွေနဲ့ အညီ လိုက်နာဆောင်ရွက်ကြဖို့ ညွန်ကြားထားကြောင်း ဖော်ပြထားပါတယ်။

အဆိုပါ ညွန်ကြားချက်တွေအရ မဲဆွယ်စည်းရုံးတဲ့အခါမှာ အဆောက်အဦးအတွင်း၊ပြင်ပနေရာတွေမှာ သတ်မှတ်ထားတဲ့ လူဦးရေ အရေအတွက်နဲ့ စုဝေးမဲဆွယ်ပွဲလုပ်တဲ့အခမ်းအနားတွေမှာ လွှတ်တော်ကိုယ်စားလှယ်လောင်းများက မဲဆန္ဒရှင်ပြည်သူတွေကို ပါးစပ်နဲ့ နှာခေါင်းစည်း (Mask ) ၊ မျက်နှာအကာ (Face Shield )၊ လက်သန့်ဆေးရည် (Hand Sanitizer) ၊ လက်အိတ်တွေ ဖြန့်ဝေရင် ရွေးကောက်ပွဲကုန်ကျစရိတ်မှာ ထည့်သွင်းဖော်ပြဖို့ မလိုဘူးလို့ ကော်မရှင်က ထုတ်ပြန်ထားတာပါ။

၂၀၂၀ ရွေးကောက်ပွဲအတွက် မဲဆွယ်စည်းရုံးခြင်းလုပ်ငန်းတွေကို စက်တင်ဘာ (၈) ရက်နေ့က စတင်ပြီး ရွေးကောက်ပွဲကော်မရှင်က ခွင့်ပြုခဲ့ပြီး လူငါးဆယ်ဦးထက် ပိုပြီး စုဝေးခွင့်မပြုဖို့၊ Stay Home သတ်မှတ်ထားတဲ့ မြို့နယ်တွေမှာ မဲဆွယ်စည်းရုံးတာတွေ မလုပ်ဖို့ကိုလည်း ညွန်ကြားထားတာဖြစ်ပါတယ်။