ကလေးတွေအတွက် မိခင်နို့က ဘာကြောင့်အရေးကြီးတာလဲ။

မိခင်နို့ဟာ ကလေးတွေ ကျန်းမာရေးကောင်းပြီး ရောဂါတွေကင်းဝေးဖို့တစ်ခုတည်းသော ကာကွယ်နည်းတစ်ခုပါ။ မွေးပြီး ပထမ ၆ လမှာ မိခင်နို့တစ်မျိုးတည်းကိုသာ တိုက်ကျွေးရမှာဖြစ်ပြီး အဲဒီ ပထမ ၆ လအချိန်မှာ ကလေးတွေကို ရေ၊ ပျားရည်၊ စားစရာ၊ နို့မှုန့် ဘာတစ်ခုမှ တိုက်ကျွေးတာမျိုး မလုပ်ရပါဘူး။

Photo : Freepik

ရေရှည်အတွက် အကျိုးရှိတဲ့မိခင်နို့ရည်

မိခင်နို့မှာ ဘယ်လိုအာဟာရတွေရှိမလဲ။

မိခင်နို့မှာ ပရိုတင်းဓာတ်လို့ခေါ်တဲ့အသားဓာတ်ကလေးငယ်တွေအနေနဲ့ အစားအစာကို အကောင်းဆုံးချေဖျက်နိုင်တယ်။ ကလေးတွေအတွက် သံဓာတ်၊ ဗိုက်တာမင်၊ ဇင့်၊ လိုအပ်တဲ့ အာဟာရတွေအားလုံးသည် မိခင်နို့မှာသာရှိနိုင်ပါတယ်။ မိခင်နို့ဟာ ကလေးတွေအတွက်သာမက မိခင်တွေအတွက်လည်း ရောဂါမျိုးစုံကာကွယ်ပေးနိုင်ပါတယ်။ ကင်ဆာရောဂါမျိုးစုံ၊ အသည်း၊ နှလုံး၊ ဆီးချို၊ သွေးတိုး ရောဂါတွေကိုကလည်း အတတ်နိုင်ဆုံးကာကွယ်ပေးနိုင်ပါတယ်။ မိခင်နို့ကို မွေးစကနေ ၆ လ၊ ၂ နှစ်အထိ မိခင်နို့ကိုကြိုးစားပြီးတိုက်ပေးသင်ပါတယ်။

Photo : Freepik

နို့မှုန့်ကြောင့်ဖြစ်နိုင်တဲ့အကျိုးဆက်

အာဟာရနို့မှုန့်တွေက နွားနို့က တစ်ဆင့်ပြုလုပ်တာပါ။ နို့မှုန့်သောက်တဲ့ကလေးငယ်တွေဟာ အစာကိုကောင်းစွာမချေနိုင်လို့ ဝမ်းလျှော၊ ဝမ်းချုပ်ရောဂါဖြစ်နိုင်ပါတယ်။ ဗိုက်နာတာ၊ လေထိုးတာ အစာကောင်းစွာ မချေနိုင်တဲ့အတွက် လေထိုးလေအောင့်ရောဂါတွေ ဖြစ်နိုင်တယ်။

၆ လပြည့်တဲ့အခါ မိခင်နို့အပြင် ဘာတွေကျွေးမလဲ

၆ လပြည့်ပြီးဆိုရင် ကလေးတွေ ကျန်းမာရေးကောင်းဖို့ဆို ဖြည့်စွက်စာ ကျွေးရပါမယ်။ ဒီအချိန်မှာလည်း အာဟာရနို့မှုန့်တွေ ကျွေးဖို့မလိုပါဘူး။ အစာအာဟာရကြီးတွေဖြစ်တဲ့ ဆန်၊ ပဲ၊ အသား၊ ဟင်းသီးဟင်းရွက်၊ အသီးအနှံတို့ကိုသာ မျှတအောင် ကျွေးဖို့ လိုပါတယ်။

ဖော်ပြပါသတင်းဆောင်းပါးပါအချက်အလက်များသည် Duwun Community Voice အစီအစဉ်မှာ ဆရာမကြီး သဲလ်မာထွန်းသိန်း - အာဟာရဗေဒ ပညာရှင်၊ မိခင်နို့တိုက်ကျွေးခြင်းဆိုင်ရာ နိုင်ငံတကာအသိအမှတ်ပြု အကြံပေးပညာရှင် ရဲ့ ပြောကြားချက်များကို ကောက်နုတ်ဖော်ပြခြင်းဖြစ်ပါသည်။