ဗီလာရီးရဲလ်ကို အနိုင်ယူအပြီး ချန်ပီယံလိဂ်ဗိုလ်လုပွဲတက်ရောက်နိုင်ခဲ့ပြီးနောက် လီဗာပူးလ်တိုက်စစ်မှူးဆာလာက ဗိုလ်လုပွဲမှာ ရီးရဲလ်မက်ဒရစ်နဲ့ ရင်ဆိုင်ချင်တယ်လို့ ပြောဆိုလိုက်ပါတယ်။ ဒါဟာ ၂၀၁၈ ဗိုလ်လုပွဲရှုံးကြွေးကို ပြန်ဆပ်ချင်တာကြောင့်လို့လည်း ဆာလာက ဖွင့်ဟခဲ့ကာ သူတို့ကိုအနိုင်ယူခဲ့တဲ့ ရီးရဲလ်ကို ပြန်အနိုင်လိုချင်နေတဲ့ ဆန္ဒကို ဖွင့်ဟခဲ့တာပါ။ 

လီဗာပူးလ်ဟာ ဗီလာရီးရဲလ်ကို ပထမအကျော့မှာ ၂-၀ နဲ့ အနိုင်ရခဲ့ပေမယ့် ဒုတိယအကျော့မှာ ၂-၀ နဲ့ ဦးဆောင်ခံခဲ့ရပါတယ်။ ဒုတိယပိုင်းမှာ ဂိုးတွေဆက်တိုက်ပြန်သွင်းကာ ၂-၃ နဲ့ ထပ်မံအနိုင်ရရှိပြီး ဗိုလ်လုပွဲတက်ရောက်ခဲ့တာပါ။ ဒီရာသီမှာ ကာရာဘောင်းဖလားဆွတ်ခူးထားပြီး အက်ဖ်ဖလားဗိုလ်လုပွဲကိုလည်းရောက်ရှိထားလို့ သူတို့က တရာသီအတွင်း ဗိုလ်လုပွဲ ၃ ပွဲစလုံး တက်ရောက်နိုင်တဲ့ ပထမဆုံးအင်္ဂလန်ကလပ်လည်းဖြစ်လာခဲ့ပါတယ်။