မလေးရှားဝန်ကြီးချုပ်သစ်အဖြစ် မူဟီဒင်ယာစင်ကို ခန့်အပ်သွားမယ်လို့ ဘုရင့်နန်းတော်က ထုတ်ပြန်ကြေညာလိုက်ပါတယ်။

(မူဟီဒင်ယာစင်နှင့် ဇနီး) (Photo: Mohd Rasfan/AFP)

ဘုရင်နဲ့ လွှတ်တော်အမတ်အားလုံး တွေ့ဆုဲခဲ့ပြီးနောက် လွှတ်တော်ထောက်ခံမှုအများစု ရရှိသူဟာ Pahoh မြို့ လွှတ်တော်အမတ် မူယီဒင်ယာစင်ဖြစ်ကြောင်း Royal Family and Household အုပ်ချုပ်ရေးမှူး အာမက်ဖာဒီလ်ရှမ်ဆူဒင်က ယနေ့ (ဖေဖေါ်ဝါရီ ၂၉ ရက်) ထုတ်ပြန်ချက်မှာ ပြောထားပါတယ်။

(မလေးရှားဘုရင့်နန်းတော်) (Photo: Reuters)

"ဒါကြောင့် ဘုရင်က မစ္စတာယာစင်ကို ဖွဲ့စည်းပုံအခြေခံဥပဒေ Article 40(2)(a) နဲ့ 43(2)(a) တို့အရ ဝန်ကြီးချုပ်အဖြစ် ရွေးချယ်ခဲ့ပါတယ်" လို့ အာမက်က ပြောပါတယ်။ မလေးရှားဝန်ကြီးချုပ်အသစ် ကျမ်းသစ္စာကျိန်ဆိုမှုကို တနင်္ဂနွေနေ့ (မတ်လ ၁ ရက်) မနက် ၁၀ နာရီခွဲအချိန် ဘုရင့်နန်းတော် Istana Negara မှာ ကျင်းပပြုလုပ်သွားမယ်လို့ ၎င်းကဆိုပါတယ်။ ပြည်သူတွေနဲ့ နိုင်ငံ အဆင်ပြေရန် ဝန်ကြီးချုပ်ခန့်အပ်မှု နှောင့်နှေးလို့မရနိုင်ကြောင်း မလေးရှားဘုရင် Abdullah Ri’ayatuddin Al-Mustafa Billah Shah က ပြောခဲ့ကြောင်း CNA သတင်းမှာ ဖော်ပြပါတယ်။

(မလေးရှားဘုရင် Abdullah Ri’ayatuddin Al-Mustafa Billah Shah) (Photo: AFP)

(အန်ဝါအီဗရာဟမ်နှင့် ဒေါက်တာမဟာသီယာ) (Photo: AFP)

Parti Pribumi Bersatu Malaysia (Bersatu) ပါတီဥက္ကဌ ယာစင်က ပါတီကို အာဏာရညွှန့်ပေါင်းအဖွဲ့ Pakatan Harapan (PH) မှ နုတ်ထွက်စေခဲ့ပြီး အစိုးရသစ်ဖွဲ့နိုင်ရန် Barisan Nasional ပါတီ၊ Parti Islam Se-Malaysia နဲ့ အခြားပါတီများနဲ့ ပူးပေါင်းထားခဲ့ပါတယ်။ မလေးရှားဝန်ကြီးချုပ် ရာထူးအတွက် အစောပိုင်းမှာ ပါတီတွေက ဒေါက်တာမဟာသီယာနဲ့ အန်ဝါအီဗရာဟမ်တို့ကို အသီးသီး ထောက်ခံအဆိုပြုခဲ့ကြသေးပေမဲ့ နောက်ဆုံးမှာတော့ ဘုရင့်နန်းတော်က ယာစင်ကို ဝန်ကြီးချုပ်သစ်အဖြစ် ခန့်အပ်ကြောင်း ထုတ်ပြန်ကြေညာလိုက်တာ ဖြစ်ပါတယ်။