ကူဝိတ်နိုင်ငံမှာ အိမ်အကူအဖြစ် သွားရောက်လုပ်ကိုင်ရန် နီပေါနိုင်ငံကနေ အိန္ဒိယကိုဖြတ်ပြီး မြန်မာနိုင်ငံကို ရောက်လာခဲ့တဲ့ နီပေါနိုင်ငံသူ အမျိုးသမီးကို ကူညီကယ်ဆယ်ခဲ့တယ်လို့ မြန်မာနိုင်ငံရဲတပ်ဖွဲ့က သတင်းထုတ်ပြန်ပါတယ်။

ဖြစ်စဉ်မှာ ဖေဖော်ဝါရီ ၅ ရက် ညနေ ၅ နရီခွဲလောက်က နီပေါနိုင်ငံဆိုင်ရာ မြန်မာသံရုံးတာဝန်ရှိသူတွေက ရန်ကုန်မြို့ တည်းခိုခန်းတစ်ခုမှာ ရောက်ရှိနေတဲ့ နီပေါနိုင်ငံသူ အမျိုးသမီးတစ်ဦး အကူအညီလိုအပ်နေတာကြောင့် ရှာဖွေကယ်တင်ပေးဖို့ လူကုန်ကူးမှုတားဆီးနှိမ်နင်းရေး ရဲတပ်ဖွဲ့ကို ဆက်သွယ်ပြီး အကူအညီတောင်းခံခဲ့တယ်လို့ သိရပါတယ်။

အဲဒီနောက် ရန်ကုန်တိုင်းဒေသကြီး ရဲတပ်ဖွဲ့နဲ့ပူးပေါင်းပြီး စုံစမ်းခဲ့ရာ အဆိုပါ နီပေါအမျိုးသမီးကို ပုဇွန်တောင်မြို့နယ်အတွင်းရှိ တည်းခိုခန်းတစ်ခုမှာ ဖေဖော်ဝါရီ ၅ ရက်နေ့ ည ၉ နာရီခန့်မှာတွေ့ရှိခဲ့တယ်လို့ ရဲတပ်ဖွဲ့က သတင်းထုတ်ပြန်ထားပါတယ်။

အဆိုပါပွဲစားက အမျိုးသမီးကို နီပေါကနေ အိန္ဒိယကိုဖြတ်ပြီး မြန်မာနိုင်ငံ၊ တမူးမြို့သိုု့ပို့ဆောင်ခဲ့ကာ ထိုမှတစ်ဆင့် ဇန်နဝါရီ ၂၂ ရက်မှာ ရန်ကုန်မြို့ကို ဆက်လက်ပို့ဆောင်ခဲ့ရာ ယခုတည်းခိုနေတဲ့ နေရာကိုရောက်ရှိခဲ့တယ်လို့ ပြောပါတယ်။

နီပေါနိုင်ငံသူ အမျိုးသမီးမှာ တရားဝင်နိုင်ငံကူးလက်မှတ်နဲ့ လာရောက်ခဲ့ပေမယ့် ခေါ်လာတဲ့ပွဲစားနဲ့ ဖေဖော်ဝါရီလ ၄ ရက်မှစပြီး အဆက်အသွယ်ပြတ်တောက်ခဲ့ပြီးနောက် နေရပ်ကိုပြန်လိုတာကြောင့် နီပေါရှိ အစ်ကိုဖြစ်သူထံ အကြောင်းကြားခဲ့ရာမှ အစ်ကိုဖြစ်သူက နီပေါနိုင်ငံရှိ မြန်မာသံရုံးသို့ ဆက်သွယ် အကူအညီတောင်းခံခဲ့တယ်လို့ သိရပါတယ်။

လက်ရှိမှာတော့ လူကုန်ကူးမှုတားဆီးနှိမ်နင်းရေး ရဲတပ်ဖွဲ့မှ နီပေါနိုင်ငံသူ အမျိုးသမီးကို မြန်မာနိုင်ငံ ဂေါ်ရခါးအမျိုးသမီးရေးရာအဖွဲ့ရဲ့ အကူအညီဖြင့် စောင့်ရှောက်ထားပြီး နီပေါနိုင်ငံသံရုံးသို့ ဆက်သွယ် အပ်နှံသွားမယ်လို့ ဆိုပါတယ်။