မန္တလေးမြို့မှာ ဖေဖော်ဝါရီလ (၁) ရက်ကနေ (၉) ရက်နေ့အထိ မီးလောင်မှု (၇) ကြိမ်ဖြစ်ပွားခဲ့ရာမှာ ဖြစ်စဉ် အားလုံးက နေအိမ်အတွင်း ဝါယောရှော့ကတဆင့် စတင်လောင်ကျွမ်းခဲ့တာဖြစ်တယ်လို့ မီးသတ်တပ်ဖွဲ့မှတ်တမ်းမှာ ဖော်ပြထားပါတယ်။
ဖေဖော်ဝါရီလ (၂) ရက်က (၁) ကြိမ်၊ ဖေဖော်ဝါရီလ (၆) ရက် က (၁) ကြိမ်၊ ဖေဖော်ဝါရီလ (၇) ရက်က တစ်ရက်အတွင်း (၂) ကြိမ်၊ ဖေဖော်ဝါရီလ(၉) ရက်နေ့က တစ်ရက်အတွင်း (၃) ကြိမ် စုစုပေါင်း ၇ ကြိမ် ဖြစ်ပွားခဲ့တယ်လို့ သိရပါတယ်။
ဒါကြောင့် လျှပ်စစ်မီး၊ မီးဖိုမီးအစရှိသဖြင့် မီးသုံးစွဲတဲ့နေရာမှာ အထူးသတိပြုနိုင်ကြဖို့ သက်ဆိုင်ရာမြို့နယ်အလိုက် မီးသတ်တပ်ဖွဲ့ဝင် ၆ ဦးခန့်ဆီပါဝင်တဲ့မီးသတ်ယာဉ်တွေနဲ့ လှည့်လည်သတိပေးနှိုးဆော်နေကြတယ်လို့ မန္တလေးတိုင်းဒေသကြီးမီးသတ်ဦးစီးဌာန ညွှန်ကြားရေးမှူးဦးသန်းဇော်ဦးက Duwun ကိုပြောပါတယ်။
“ဒါက ပွင့်လင်းရာသီရောက်တဲ့အခါတိုင်း မီးသတ်တပ်ဖွဲ့ရဲ့လုပ်လေ့လုပ်ထရှိတဲ့ အစီအစဉ်တစ်ရပ်ဆိုတာထက်ကိုပိုပါတယ်။ အိမ်တစ်အိမ်မှာ ဝပ် ၅၀၀ ပဲ သုံးရမယ်ဆို ပိုပြီးသုံးတာတွေရှိတယ်။ အဲဒီအတွက် ဝါယောရှော့ဖြစ်ပြီးလောင်တယ်။ အပူလွန်ကဲပြီး လောင်တက်တယ်။ ဒါတွေကို အသိပညာပေးမှုတွေလုပ်နေတယ်။ ပြည်သူလူထုက လိုက်နာမယ်ဆိုရင် မီးလောင်မှုတွေလျော့နည်းလာမှာပါ” လို့ ဦးသန်းဇော်ဦးက ဆိုပါတယ်။
လျှပ်စစ်မီးကြောင့်မီးလောင်ကျွမ်းမှုဖြစ်ခဲ့တဲ့ဖြစ်စဉ်တွေထဲမှာ အဆိုးရွားဆုံးက ရတနာပုံဈေး SkyWalk အဆောက်အဦး မီးလောင်ကျွမ်းမှုဖြစ်ပြီး တန်ဖိုး ကျပ်သိန်းပေါင်းတစ်သောင်းကျော်အထိ ဆုံးရှုံးခဲ့တယ်လို့ မီးသတ်တပ်ဖွဲ့ရဲ့ စာရင်းတွေအရသိရပါတယ်။
ဇန်နဝါရီလက မန္တလေးခရိုင်မှာ လျှပ်စစ်မီးကြောင့်မီးလောင်ကျွမ်းမှု (၆) ခု၊ ပေါ့ဆမှုကြောင့် မီးလောင်ကျွမ်းမှု (၂) ခု၊ အလိုလျောက်ဖြစ်တဲ့ မီးလောင်ကျွမ်းမှု (၁) ခု စုစုပေါင်း မီးလောင်ကျွမ်းမှု (၉) ကြိမ်ဖြစ်ပွားခဲ့ပြီး လူတစ်ဦးသေဆုံးခဲ့တယ်လို့လည်း သိရပါတယ်။