အလုခံရသူ (၂)ဦးမှာ ဦးခေါင်းဒဏ်ရာတွေရရှိခဲ့ပါတယ်။

မန္တလေးတိုင်းဒေသကြီး ပြည်ကြီးတံခွန်မြို့နယ်မှာ မနေ့က ဒီဇင်ဘာလ (၁၅)ရက်နေ့ ညပိုင်းက ဆိုင်ကယ်စီးလာသူ (၂)ဦးကို လူ(၈)ဦးခန့်က ဓား၊ တုတ်များနဲ့ဝိုင်းရိုက်ကာ ပစ္စည်းလုယက်မှုဖြစ်ပွါးခဲ့ပါတယ်။

ရိုက်နှက်အလုခံရတဲ့ အမျိုးသား (၂)ဦးမှာ အသက် (၃၀)ကျော်အရွယ်တွေဖြစ်ပြီး တစ်ဦးမှာ ညာဘက်ပြတ်ရှဒဏ်ရာ၊ ဦးခေါင်းဒဏ်ရာတွေရရှိခဲ့သလို ကျန်တစ်ဦးမှာလည်း ဦးခေါင်းဒဏ်ရာရရှိခဲ့တယ်လို့ သိရပါတယ်။

“ မနေ့ကညကဖြစ်တာ။ တရားခံတွေကတော့ ဘယ်မိမလဲဗျာ။ ဒဏ်ရရာတဲ့သူတွေကိုတော့ ကျွန်တော်တို့ဆေးရုံကိုပို့ပေးတယ်။ လိုအပ်တဲ့ဆေးကုသမှုခံယူပြီး ဆေးရုံတက်ဖို့မလိုဘူးဆိုတော့ ကျွန်တော်တို့ သူတို့နေရပ်ကိုပြန်ပို့ပေးခဲ့ပါတယ်။ အခုနောက်ပိုင်း ဒီလိုဒုစရိုက်မှုတွေကတော့ ဖြစ် ဖြစ်ပြီး ပျောက်ဆိုသလိုဖြစ်နေပြီ။ ဒုစရိုက်မှုဖြစ်စဉ်တွေကလည်း ပိုများလာတယ်။ မကြာခဏကိုဖြစ်နေတာ ။ အားလုံးသတိနဲ့သွားလာကြဖို့ပဲဂရုစိုက်ရတော့မှာ”လို့ ဖြစ်စဉ်အတွင်းသွားရောက်ကူညီဆောင်ရွက်ပေးခဲ့တဲ့ ရွှေမဉ္ဇူ ပရဟိတအသင်းမှ တာဝန်ရှိသူတစ်ဦးကပြောပါတယ်။

လုယက်မှုအတွင်းမှာတော့ စီးလာတဲ့ ဆိုင်ကယ်အပါအဝင်၊ ဖုန်းနဲ့ ပိုက်ဆံအိတ်တွေ ပါရှိသွားတယ်လို့သိရပါတယ်။

ပြီးခဲ့တဲ့ ဒီဇင်ဘာလ (၁၀)ရက်နေ့ကလည်း ပြည်ကြီးတံခွန်မြို့နယ်မှာ လူတစ်ဦးကို အုပ်စုဖွဲ့ ဓားနဲ့ခုတ်ရာမှာ ပတ်ဝန်းကျင်ကလူတွေက ဝင်တားခဲ့တာကြောင့် အဆိုပါ ဝင်ရောက်တားတဲ့သူတွေကိုပါ ဓားနဲ့ခုတ်မှုဖြစ်ပွါးခဲ့ပါသေးတယ်။ 

အဲဒီဖြစ်စဉ်အတွင်းမှာလည်း တရားခံတွေကို ယနေ့ထိမမိသလို ဓားနဲ့ခုတ်ခံရသူ (၅)ဦး ဒဏ်ရာရရှိခဲ့ပါသေးတယ်။

Share

က္က