မန်ချက်စတာယူနိုက်တက်အသင်းရဲ့ပြင်သစ်ကွင်းလယ်ကစားသမား ပေါ့ဂ်ဘာတစ်ယောက် အသင်းကနေ ထွက်ခွာတော့မယ်ဆိုတဲ့ သတင်းတွေ ပြန်လည်ထွက်ပေါ်လာပြန်ပါပြီ။ The Sun ရဲ့ဖော်ပြချက်အရ မန်ယူသာ အဆင့် ၄ နေရာအတွင်း မဝင်နိုင်ခဲ့ဘူးဆိုရင် ပေါ့ဂ်ဘာက ဂျုဗင်တပ်ကိုပြောင်းတော့မယ်လို့ သိရပါတယ်။

အင်္ဂလန်မီဒီယာ The Sun ရဲ့ဖော်ပြချက်အရ ပေါ့ဂ်ဘာဟာ မန်ယူအသင်းချန်ပီယံလိဂ်ဝင်ခွင့်ကို လွဲချော်ခဲ့မယ်ဆိုရင် ပေါ့ဂ်ဘာအနေနဲ့ နည်းပြဆိုးလ်ရှားကို အသင်းကနေထွက်ခွာခွင့်တောင်းလာနိုင်တယ်လို့ သိရပါတယ်။ ပေါ့ဂ်ဘာကို အသင်းဟောင်း ဂျုဗင်တပ်အသင်းကလည်း ပြန်လည်ခေါ်ယူဖို့ အသင့်ရှိနေတယ်လို့ The Sun ကဖော်ပြထားပါတယ်။ ပေါ့ဂ်ဘာအနေနဲ့ မန်ယူရဲ့စာချုပ်သစ်ကမ်းလှမ်းမှုကို လက်ရှိအချိန်အထိ လက်ခံခြင်းမရှိသေးပဲ ရာသီကုန် အသင်းအခြေအနေကို စောင့်ကြည့်နေပါတယ်။

ပေါ့ဂ်ဘာဟာ ဂျုဗင်တပ်အသင်းကနေ မန်ချက်စတာယူနိုက်တက်အသင်းကို ပြောင်းရွှေ့ကြေးပေါင် ၈၉သန်းနဲ့ ပြောင်းရွှေ့လာတာဖြစ်ပြီး ပြီးခဲ့တဲ့ ဆောင်းရာသီအပြောင်းအရွှေ့ဈေးကွက်အတွင်းမှာ ဘာစီလိုနာအသင်းကလည်း ခေါ်ယူဖို့ စိတ်ဝင်စားခြင်းခံခဲ့ရသူပါ။ ပေါ့ဂ်ဘာဟာ ဂျုဗင်တပ်အသင်းမှာ ၂၀၁၂ ဘောလုံးရာသီမှစပြီး လေးရာသီကျော်ဖြတ်ခဲ့ဖူးကာ စီးရီးအေချန်ပီယံ လေးကြိမ်အပါအဝင် အဓိက ဆုဖလား ရှစ်ခုအထိရယူနိုင်ခဲ့ပါတယ်။ ပေါ့ဂ်ဘာဟာ မန်ယူနည်းပြသစ် ဆိုးလ်ရှားလက်ထက်မှာ အသင်းအတွက် သွင်းဂိုးခြောက်ဂိုးအထိ သွင်းယူပေးထားနိုင်ပါတယ်။