မန်ချက်စတာယူနိုက်တက်အသင်းကို လက်ရှိအမေရိကန်အသင်းပိုင်ရှင် ဂလေဇာဆီကနေဝယ်ယူဖို့အတွက် ဆော်ဒီအာရေဗျတော်ဝင်မင်းသား ဘင်ဆယ်လ်မန်တစ်ယောက် အရှိန်မြှင့်ကြိုးစားလာပြီလို့ The Sun ကဖော်ပြထားပါတယ်။

လက်ရှိအသင်းပိုင်ရှင်တွေဖြစ်တဲ့ ဂလေဇာမိသားစုဟာ မန်ချက်စတာယူနိုက်တက်ကို ပေါင် ၇၉၀ သန်းနဲ့ ဝယ်ယူရင်းနှီးမြှုပ်နှံခဲ့တာဖြစ်ပြီး ဆော်ဒီမင်းသားရဲ့ကမ်းလှမ်းချက်အရရောင်းချဖို့အတွက် စိတ်ဝင်စားနေတယ်လို့လည်း The Sun ကဖော်ပြထားပါတယ်။ ဒါပေမယ့်လည်း ကမ်းလှမ်းထားတဲ့ ပေါင် ၃.၈ဘီလီယံဟာ မန်ယူအသင်း လာမယ့်နှစ်ဘောလုံးရာသီမှာ ချန်ပီယံလိဂ်ဝင်ခွင့်အပေါ်မူတည်နေပြီး ချန်ပီယံလိဂ်ဝင်ခွင့်မရရင်အပြောင်းအလဲဖြစ်လာနိုင်တယ်လို့လည်း The Sun က ခန့်မှန်းဖော်ပြထားပါတယ်။

ဆော်ဒီအာရေဗျတော်ဝင်မင်းသား ဘင်ဆယ်လ်မန်ဟာ မန်စီးတီးအသင်းပိုင်ရှင် ရှိတ်မန်ဆော်ကို ပြိုင်ဆိုင်လိုတဲ့အတွက် မန်ယူကိုဝယ်ယူဖို့ကြိုးစားနေတာလို့လည်း သတင်းတွေကဖော်ပြနေပါတယ်။ အသက် ၃၃နှစ်အရွယ် ဘင်ဆယ်လ်မန်ဟာ ဆော်ဒီအာရေဗျ ဝန်ကြီးချုပ်လည်းဖြစ်ပြီး မန်ယူအသင်းပိုင်ရှင်ဖြစ်လာခဲ့ရင် ဆော်ဒီကို ကမ္ဘာလှည့်ခရီးသည်အမြောက်အများလာရောက်လည်ပတ်ဖို့ ဆွဲဆောင်နိုင်မယ်လို့မျှော်လင့်ထားပါတယ်။ ဆော်ဒီအာရေဗျတော်ဝင်မိသားစုဟာ ပေါင် ၈၅၀ဘီလီယံလောက်အထိ ကြွယ်ဝချမ်းသာပြီး ဖော်မြူလာဝမ်းကားပြိုင်ပွဲနဲ့ WWE ပြိုင်ပွဲတွေမှာလည်း ရင်းနှီးမြှုပ်နှံမှုအချို့လုပ်ထားတယ်လို့ သိရပါတယ်။