မန်ချက်စတာယူနိုက်တက်အသင်းရဲ့အမြဲတမ်းနည်းပြရာထူးအတွက်လျာထားစာရင်းမှာ မထင်မရှား နည်းပြတစ်ဦးအံ့အားသင့်ဖွယ်ပါဝင်နေတယ်လို့ အင်္ဂလန်မီဒီယာတွေက ဖော်ပြနေကြပါတယ်။ မန်ယူအသင်းရဲ့ လျာထားစာရင်းမှာ လက်ရှိယာယီနည်းပြ ဆိုးလ်ရှားအပါအဝင် နည်းပြငါးဦးပါဝင်တယ်လို့ သတင်းတွေအရသိရပါတယ်။

မန်ယူအသင်း ဒု-ဥက္ကဌ အက်ဒ်ဝုဒ်ဝက်ကတော့ စပါးနည်းပြ ပိုချက်တီနိုကို ဦးစားပေးရွေးချယ်မှုအနေနဲ့ စဉ်းစားထားပေမယ့် ငြင်းဆန်ခဲ့မယ်ဆိုရင် အရန်အနေနဲ့ နည်းပြ လေးဦးကို လျာထားတယ်လို့သိရပါတယ်။ ဝုဒ်ဝက်ဟာ ၂၀၁၆ဘောလုံးရာသီကတည်းက ပိုချက်တီနိုကို စိတ်ဝင်စားခဲ့ပေမယ့် စပါးနဲ့စာချုပ်သက်တမ်းတိုးခဲ့လို့ မော်ရင်ဟိုကို ရွေးချယ်ခဲ့ရတာပါ။ မန်ယူဒု-ဥက္ကဌ ဝုဒ်ဝက်ရဲ့လျာထားစာရင်းမှာ ဇီဒန်း၊ လောရင့်ဘလန့်တို့လည်း ပါဝင်နေတယ်လို့သိရပါတယ်။

အသက် ၄၂နှစ်အရွယ် မာကိုရို့စ်ဟာ ရက်ဘူးလ်အသင်းနဲ့ပထမဆုံးရာသီမှာ ချန်ပီယံဆုဖလားရယူနိုင်ခဲ့ပြီး ပြီးခဲ့တဲ့နှစ်ယူရိုပါလိဂ်မှာလည်း ဆိုစီဒက်၊ ဒေါ့မွန်၊ လာဇီယို အစရှိတဲ့ အသင်းကြီးတွေကို ကျော်ဖြတ်ပြီး ဆီမီးဖိုင်နယ်တက်ရောက်နိုင်အောင်စွမ်းဆောင်နိုင်ခဲ့ပါတယ်။ ဒီနှစ် ယူရိုပါလိဂ်မှာလည်း ဆဲလ်တစ်၊ ရိုဆင်ဘာ့ဂ်၊ လိုက်ဇစ်ပ်၊ အသင်းတွေနဲ့တစ်အုပ်စုတည်းကျရောက်ခဲ့ပြီး အုပ်စုပွဲစဉ်တိုင်းအနိုင်ရကာ ၃၂သင်းအဆင့်တက်ရောက်နိုင်အောင် စွမ်းဆောင်ပေးထားနိုင်ပါတယ်။