ဒီကနေ့ည အစောပိုင်းမှာ ကစားခဲ့တဲ့ အာဆင်နယ်နဲ့ စပါးတို့ရဲ့ မြောက်လန်ဒန်ဒါဘီပွဲစဥ်မှာ ဖြစ်ပွားခဲ့တဲ့ အီမာဆင်ရွိုင်ရယ်နဲ့ မာတီနယ်လီတို့အကြားဖြစ်ရပ်အတွက် ပရိသတ်တွေက အပြင်းအထန် ဝေဖန်နေကြပါတယ်။ အီမာဆင်က မာတီနယ်လီကို ရည်ရွယ်ချက်ရှိရှိ တက်နင်းခဲ့တာဖြစ်ပြီး ဒီအတွက်လည်း ကွင်းလယ်ဒိုင် အန်သိုနီတေလာက တိုက်ရိုက်အနီကတ်ပြသခဲ့ပါတယ်။
ကစားကွက်ပိုင်းအရ ဘာအန္တရာယ်မရှိတဲ့ အနေအထားမျိုးမှာ အီမာဆင်က မိုက်ရူးရဲဆန်တဲ့ ဖျက်ထုတ်မှုမျိုးကို ရည်ရွယ်ချက်ရှိရှိ ပြုလုပ်ခဲ့တာပါ။ ဒါပေမယ့်လည်း ပရိသတ်တွေကတော့ အီမာဆင်ကို အနီကတ်ပြသတာက ပြင်းထန်တဲ့ ဆုံးဖြတ်ချက်ဖြစ်တယ်လို့ ယူဆနေကြပါတယ်။ ဒါ့အပြင် မန်ချက်စတာညနေခင်းသတင်းဌာနက ယူနိုက်တက်အကြောင်း တာဝန်ယူထားတဲ့ အကြီးအကဲကလည်း ဒီအနီကတ်နဲ့ပတ်သက်လို့ ဆန့်ကျင်ကန့်ကွက်ခဲ့ပါတယ်။
အီမာဆင်ရဲ့အနီကတ်မတိုင်ခင်မှာ ဒီပွဲအတွက် အဝါကတ်တောင် မပြသရသေးဘဲ အီမာဆင်ကသာ ဒီပွဲမှာ ပထမဆုံး အရေးယူခံခဲ့ရတဲ့ ကစားသမားဖြစ်ခဲ့ပါတယ်။ ဒါ့အပြင် ဒီလိုမျိုး အရေးယူခံရချိန်မှာလည်း တိုက်ရိုက်အနီကတ်ပါ ထိသွားခဲ့တာပါ။ ပရိသတ်တွေက “ဘောလုံးလောက,က ပျက်စီးသွားပါပြီ။ ပွဲအစီအစဥ်တင်ဆက်သူတွေကအစ ဒီအနီကတ်ကို မှန်တယ်ပြောနေကြပါတယ်”
“ခြေကျင်းဝတ်ပေါ်ကို ခြေထောက်ရောက်သွားတာနဲ့ အနီကတ်တန်းပြတာ တကယ်ကို မယုံနိုင်စရာပါပဲ။ ဒါက ရယ်လည်းရယ်ရတဲ့ ဆုံးဖြတ်ချက်ပါ” လို့ အမျိုးမျိုးမှတ်ချက်ပြုခဲ့ကြပါတယ်။ ဒါ့အပြင် မန်ချက်စတာညနေခင်းသတင်းဌာနက ဆမ်မြူရယ်လက်ခ်ဟာ့စ်ကလည်း “အီမာဆင်က ဦးနှောက်မရှိတဲ့ ပြစ်ဒဏ်ဘောကို ကျူးလွန်ခဲ့ပေမယ့် ဒါက အနီကတ်မဟုတ်ပါဘူး”
“ပွဲကိုတင်ဆက်နေတဲ့သူတွေကပါ ဒီလိုအထုတ်ခံရတဲ့အပေါ် သဘောတူနေကြတာက ကိုးလို့ကန့်လန့်ဖြစ်စရာပါ။ ဒါက အဝါကတ်ပါပဲ။ VAR က အိပ်ပျော်နေပြန်ပြီ” လို့ ရေးသားခဲ့ပါတယ်။ ဒီပွဲမှာတော့ အာဆင်နယ်က ပါတေး၊ ဂျီးဆပ်စ်၊ ချာကာတို့ရဲ့သွင်းဂိုးတွေနဲ့အတူ ၃-၁ ဂိုးနဲ့ အိမ်ကွင်း အမ်းမရိတ်စ်မှာ ခြေစွမ်းပြ အနိုင်ယူခဲ့ပြီး စပါးအတွက် ချေပဂိုးတဂိုးကို ဟယ်ရီကိန်းက ပင်နယ်တီကတဆင့် သွင်းယူပေးခဲ့ပါတယ်။