အာဆင်နယ်ရရှိခဲ့တဲ့ အဖွင့်ဂိုးအတွက်တော့ တိုက်စစ်မှူးဂါဘရီရယ်ဂျီးဆပ်ကို တော်တော်လေးချီးကျူးရမှာဖြစ်ပါတယ်။ ကွင်းလယ်အကျော်နားလောက်မှာ ဘောလုံးရရှိခဲ့ပြီးနောက် ဂျီးဆပ်က ဘုန်းမောက်က ဂျက်ဖာဆန်လာမာနဲ့ နောက်ထပ်ခံစစ်ကစားသမားတွေကို ကျော်ဖြတ်ပြီး မာတင်နယ်လီဆီကို ဘောလုံးပေးပို့ခဲ့ကာ အဲဒီကန်သွင်းချက် ပြန်အံထွက်လာတာကို အိုဒီဂတ်က ပိတ်သွင်းယူခဲ့တာဖြစ်ပါတယ်။ 

ဂျီးဆပ်ရဲ့ build-up လုပ်ပေးခဲ့မှုမှာတော့ လျင်မြန်တဲ့ပြေးလွှားမှု၊ အလိမ်အခေါက်စွမ်းရည်၊ မှန်ကန်တဲ့အချိန်မှာပဲ လူပေးဖို့ ဆုံးဖြတ်ချက်ချမှတ်နိုင်ခဲ့မှုတွေ ပေါင်းစပ်ထားခဲ့တာဖြစ်ပါတယ်။ ဒါကြောင့်လည်း အဆိုပါဂိုးရရှိခဲ့မှုမှာ အဓိကပါဝင်ပတ်သက်ခဲ့တဲ့ ဂျီးဆပ်ကို အာဆင်နယ်ပရိသတ်တွေက သူတို့ရဲ့ဂန္ထဝင်တိုက်စစ်မှူးဟောင်းအွန်နရီပြန်လည်မွေးဖွားလာတယ်လို့ ချီးကျူးခဲ့ကြပြီး ဂယ်ရီလိုင်နီကာကလည်း မက်ဆီနဲ့ ခိုင်းနှိုင်းသွားခဲ့ပါတယ်။ 

ပွဲအစီအစဉ်တင်ဆက်သူ ဂျင်မီရက်နပ်ကလည်း "သူက လျှပ်စစ်ငါးရှဉ့်တကောင်လိုပဲ၊ ဒါကြောင့်လည်း မြန်တယ်၊ သန်မာတယ်၊ သူ ကွင်းထဲမှာရှိနေတယ်ဆိုရင် အကျိုးသက်ရောက်မှုတွေကို လုပ်နိုင်တာပဲ၊ ဒါကို သူ အတိအကျလုပ်ပြနိုင်တယ်၊ သူ့ရဲ့ သန်မာမှုက မယုံနိုင်စရာပါပဲ၊ အရမ်းလှပပါတယ်" လို့ ချီးကျူးပြောဆိုခဲ့ပါတယ်။