တစ်နိုင်ငံလုံးအကျိုးလိုအပ်ပါက အချို့နေရာတွေမှာ အသွားအလာကန့်သတ်ခြင်းအစီအစဉ် (Community Quarantine) ကဲ့သို့ ဆောင်ရွက်မှာဖြစ်ပြီး ဒီလိုလုပ်ခဲ့ရင်တော့ စားနပ်ရိက္ခာနဲ့ ဆေးဝါးမပြတ်လပ်စေရေးဆောင်ရွက်မယ်လို့ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်က ပြောပါတယ်။

“ ကျန်းမာရေးနှင့်အားကစားဝန်ကြီးဌာနက ကပ်ရောဂါကြီးဖြစ်နိုင်တယ်လို့ ကြေညာချက်အပြီးမှာ ပြည်သူများ အကြား Lock Down မလုပ်သေးဘူးလားလို့ တိုက်တွန်းနေသူတွေရှိသလို ဘယ်တော့ lock down လုပ်မလားလို့စိုးရိမ်နေတဲ့သူတွေ ရှိပါတယ်။ ဒါကြောင့် တစ်နိုင်ငံလုံးအကျိုးလိုအပ်လျှင် တစ်ချို့သော နေရာတွေမှာ အသွားအလာကန့်သတ်ခြင်းအစီအစဉ် (Community Quarantine) ကဲ့သု့ိကန့်သတ်မှုများဆောင်ရွက်ကောင်းဆောင်ရွက်မယ်။ ဒီလိုဆောင်ရွက်ရန်ရှိရင်လည်း စားနပ်ရိက္ခာ၊ဆေးဝါး စတာတွေ မပြတ်လပ်စေရေး ၊ တည်ငြိမ်အေးချမ်းရေးတို့ကို စနစ်တကျဆောင်ရွက်နိုင်ဖို့ ဒုတိယသမ္မတ (၁) ဦးဆောင်တဲ့အဖွဲ့ ဖွဲ့စည်းထားပြီးဖြစ်ပါတယ်။” လို့ နိုင်ငံတော်အတိုင်ပင်ခံပုဂ္ဂိုလ်က ဆိုပါတယ်။

အသွားအလာကန့်သတ်ခြင်းအစီအစဉ် (Community Quarantine) ဆောင်ရွက်ခဲ့ရင်လည်း ပြည်သူတွေကို စောစော အသိပေးသွားမယ်လို့လည်းဆိုပါတယ်။

လက်ရှိမှာ အလုပ်သမားတွေကို လုပ်ခလစာပေးနိုင်ဖို့၊ လုပ်ငန်းဆက်လက်လည်ပတ်နိုင်ဖို့အတွက် အလိုအပ်ဆုံးလုပ်ငန်းတွေကို ချေးငွေတွေ ထုတ်ချေးပေးတာတွေ စတင်နေပြီလို့လည်းဆိုပါတယ်။

ရောဂါပိုးမကူးစက်နိုင်အောင် အိမ်ပြင်မှာပဲဖြစ်ဖြစ်၊ အိမ်တွင်းမှာပဲဖြစ်ဖြစ် လူစုလူဝေးတွေကို ရှောင်ကြည်ရမှာဖြစ်ပြီး ဆွေမျိုးမိတ်ဆွေတွေစုပြီးနီးနီးကပ်ကပ်နေကြတာကလည်း အပြင်ထွက် လူအုပ်ထဲတိုးတာလို အန္တရာယ်ရှိတယ်လို့ အတိုင်ပင်ခံက သတိပေးပြောကြားပါတယ်။