၁၉၈၀ ပြည့်နှစ်များအတွင်း လူကုန်ကူးသူတွေရဲ့ ဖမ်းဆီးခံခဲ့ရတဲ့ အာဂျင်တီးနားအမျိုးသမီးတစ်ဦးဟာ အာဂျင်တီးနားနဲ့ ဘိုလီဗီးယား နှစ်နိုင်ငံရဲတပ်ဖွဲ့ ပူးပေါင်းဆောင်ရွက်မှုအတွင်း သူမရဲ့မိသားစုနဲ့ ပြန်ဆုံခွင့်ရခဲ့ပြီလို့ သိရပါတယ်။ ယခုအခါ အသက် ၄၅ နှစ်ရှိပြီဖြစ်တဲ့ ထိုအမျိုးသမီးဟာ ဖမ်းဆီးခံရပြီးကတည်းက မည်သည့်နေရာမှာ ရောက်ရှိနေခဲ့ကြောင်း မသိခဲ့ကြပါဘူး။

(Photo: Argentina Police)

ရဲတပ်ဖွဲ့က ကယ်တင်ခဲ့တဲ့ အာဂျင်တီးနားအမျိုးသမီးနဲ့ သားဖြစ်သူတို့ရဲ့ အမည်တွေကိုမူ ထုတ်ဖော်ပြောကြားမှု မရှိပါဘူး။ ယမန်နေ့ (ဒီဇင်ဘာ ၂၅ ရက်) မှာ ထုတ်ပြန်ချက်မှာတော့ အမျိုးသမီးဟာ အာဂျင်တီးနားနိုင်ငံ မာဒဲလ်ပလက်တာမြို့ (Mar del Plata) ရှိ သူမရဲ့မိသားစုနေအိမ်ကို ပြန်သွားနိုင်ခဲ့ပြီလို့ ရဲတပ်ဖွဲ့က ပြောထားပါတယ်။

(Map: BBC)

သူမနဲ့သားဖြစ်သူတို့ဟာ ယခုလအစောပိုင်းမှာ ပြန်လည်လွတ်မြောက်ခဲ့တယ်လို့ သိရပါတယ်။ ရဲတပ်ဖွဲ့ရဲ့ ထုတ်ပြန်ချက်မှာ လွန်ခဲ့တဲ့ ၃၂ နှစ်ခန့်က အာဂျင်တီးနားအမျိုးသမီးကို ပြန်ပေးဆွဲဖမ်းဆီးခဲ့သူတွေနဲ့ ပတ်သက်တဲ့ အသေးစိတ်ကိုတော့ ဖော်ပြထားခြင်းမရှိကြောင်း BBC သတင်းက ပြောပါတယ်။