ထိုင်းနိုင်ငံ ဘန်ကောက်မြို့ရှိ ဈေးဝယ်စင်တာတစ်ခုမှာ ယနေ့ (ဖေဖေါ်ဝါရီ ၁၈ ရက်) မွန်းလွဲပိုင်းက ပစ်ခတ်မှုဖြစ်ပွားခဲ့ရာ လူတစ်ဦး သေဆုံးပြီး နောက်ထပ်တစ်ဦး ဒဏ်ရာရခဲ့ကြောင်း ရဲတပ်ဖွဲ့က ပြောပါတယ်။
(Photo: @Disaster_TH/Twitter)
ဘန်ကောက်မြို့ Victory ကျောက်တိုက်အနီးရှိ Century The Movie Plaza ဈေးဝယ်စင်တာမှာ ဖြစ်ပွားခဲ့တဲ့ ပစ်ခတ်မှုဟာ ပုဂ္ဂိုလ်ရေးပြဿနာတစ်ခုဖြစ်ပြီး သေနတ်သမားက အခင်းဖြစ်နေရာမှ ထွက်ပြေးသွားခဲ့ကြောင်း ထိုင်းရဲတပ်ဖွဲ့က ထုတ်ပြန်ထားပါတယ်။
"တစ်ယောက်သေပြီး နောက်တစ်ယောက် ဒဏ်ရာရခဲ့ပါတယ်" လို့ ထိုင်းရတပ်ဖွဲ့မှ ဗိုလ်မှူးကြီး Krissana Pattanacharoen က Reuters သတင်းဌာနကို အတည်ပြုခဲ့ပါတယ်။ သေနတ်သမားကို မည်သူဖြစ်ကြောင်း သိရှိထားပြီး ဖမ်းဆီးရမိနိုင်ရန် ဆောင်ရွက်နေကြောင်း ရဲတပ်ဖွဲ့က ဆိုပါတယ်။
(Photo: @Disaster_TH/Twitter)
သေနတ်သမားက ၎င်းရဲ့ဇနီးဟောင်း အလုပ်လုပ်ကိုင်နေတဲ့ ဈေးဝယ်စင်တာရှိ အလှပြင်ဆိုင်ထဲကို ဝင်ရောက်လာခဲ့ပြီးနောက် ပစ်ခတ်ခဲ့ရာ ဇနီးဟောင်း သေဆုံးသွားပြီး အနီးအနားမှာရှိနေသူတစ်ဦး ဒဏ်ရာရခဲ့တယ်လို့ ဗိုလ်မှူးကြီး Krissana က ပြောပါတယ်။ ပစ်ခတ်မှုဖြစ်ပွားခဲ့တဲ့ ဈေးဝယ်စင်တာဟာ အထပ်ကိုးထပ်ပါရှိပြီး အပေါ်ဆုံးထပ်မှ ရုပ်ရှင်ရုံများကြောင့် လူသိများတဲ့ နေရာတစ်ခုလည်း ဖြစ်ပါတယ်။
Century The Movie Plaza ကို Victory ကျောက်တိုင် မိုးပျံရထားဘူတာရုံနဲ့ ဆက်သွယ်ထားပြီး မွန်းလွဲညနေပိုင်းတွေမှာ လူအသွားအလာ များပြားနေလေ့ရှိပါတယ်။ ပစ်ခတ်မှုဖြစ်ပွားခဲ့တဲ့နေရာဟာ The Icon Clinic အလှပြင်ဆိုင်ဖြစ်ပြီး ဈေးဝယ်စင်တာရဲ့ စတုတ္တထပ်မှာရှိကြောင်း သိရပါတယ်။
(Photo: @Disaster_TH/Twitter)
ပစ်ခတ်မှုအတွင်း ဒဏ်ရာရခဲ့တဲ့ အမျိုးသမီးကို Phyathai Nawamin ဆေးရုံသို့ ပို့ဆောင်ထားကြောင်း ထိုင်းသတင်းဌာန Workpoint က ဖော်ပြပါတယ်။ ပြီးခဲ့တဲ့ စနေနေ့ (ဖေဖေါ်ဝါရီ ၈ ရက်) ကလည်း ထိုင်းနိုင်ငံ Nakhon Ratchasima မြို့မှာ ထိုင်းစစ်သားတစ်ဦးက ပစ်ခတ်မှုကြောင့် လူ ၂၉ ဦး သေဆုံးပြီး ၅၇ ဦး ဒဏ်ရာရခဲ့ပါတယ်။ လူအစုအပြုံလိုက်ကို ပစ်ခတ်ခဲ့တဲ့ အဆိုပါ စစ်သားကို Nakhon Ratchasima မြို့ရှိ Terminal 21 ဈေးဝယ်စင်တာအတွင်း ခိုအောင်းနေခဲ့ရာ ထိုင်းကွန်မန်ဒိုတပ်ဖွဲ့က ဝင်ရောက်စီးနင်းပြီး အသေပစ်သတ်ခဲ့ကြောင်း သိရပါတယ်။