လီယွန်နယ် မက်ဆီရဲ့ အနာဂတ်ဟာ လက်ရှိအချိန်မှာ မရေမရာဖြစ်နေပြီး ပီအက်စ်ဂျီအသင်းနဲ့ စာချုပ်သက်တမ်းဟာ ယခုရာသီကုန်မှာ ကုန်ဆုံးတော့မှာဖြစ်ပေမယ့်လည်း နောက်ထပ်တစ်နှစ် သက်တမ်းတိုးခွင့် ရှိနေတာဖြစ်ပါတယ်။ ပီအက်စ်ဂျီအသင်းဟာ FFP ကြောင့် ငွေကြေးအချို့ ချွေတာဖို့ လိုအပ်မှာဖြစ်ပေမယ့်လည်း လီယွန်နယ် မက်ဆီသာ ဆက်နေချင်တယ်ဆိုရင် လီဂူးဝမ်း ချန်ပီယံတွေက မရရအောင် ထိန်းသိမ်းဖို့ ကြိုးပမ်းသွားမှာဖြစ်ပါတယ်။

အာဂျင်တီးနားဂန္တဝင်ဟာ အခြားရွေးချယ်စရာတွေလည်း ရှိနေတာဖြစ်ပြီး ဆော်ဒီ အာရေဗျကို ကြီးမားတဲ့ ငွေကြေးပမာဏနဲ့ ပြောင်းရွှေ့နိုင်သလို မေဂျာလိဂ်ကလည်း မက်မောလောက်ဖွယ် စာချုပ်နဲ့ ကမ်းလှမ်းဖို့ အဆင်သင့်ဖြစ်နေတာဖြစ်ပါတယ်။ အသက် ၃၅ နှစ်အရွယ် တိုက်စစ်မှူးဟာ ဘာစီလိုနာအသင်းကိုလည်း စိတ်လှုပ်ရှားဖွယ် ပြန်လည်ပြောင်းရွှေ့နိုင်ခြေရှိနေပြီး လွန်ခဲ့တဲ့ ၂ နှစ်တုန်းက ကတ်တလန်အသင်းကြီးဟာ ဘဏ္ဍာရေးပြဿနာကြောင့် မက်ဆီကို ထွက်ခွာခွင့်ပေးခဲ့ရတာဖြစ်ပါတယ်။

အဲဒီဘဏ္ဍာရေးပြဿနာတွေကြောင့်ပဲ ကမ္ဘာ့ဖလားချန်ပီယံကို ခေါ်ယူဖို့အတွက် ခက်ခဲနေဆဲဖြစ်လိမ့်မယ်ဆိုတာ ကျိန်းသေပြီး စိတ်ဝင်စားစရာ ဆွေးနွေးညှိနှိုင်းမှုတွေ လိုအပ်မှာဖြစ်သလို ကတ်တလန်အသင်းကြီးကလည်း မက်ဆီကို ချဉ်းကပ်မှုတွေ မပြုလုပ်ရသေးတာဖြစ်ပါတယ်။ ဒါပေမယ့်လည်း ဇာဗီကတော့ လီယွန်နယ် မက်ဆီ ပြန်လာရင် ၎င်းရဲ့အသင်းက ဘယ်လိုကစားသွားမလဲဆိုတာကို အစီအစဉ်တောင် ဆွဲထားပြီးသားဖြစ်ပြီး အာဂျင်တီးနားကြယ်ပွင့်ကို ကွင်းလယ်မှာ ကစားစေဖို့ ဆုံးဖြတ်ထားတယ်လို့ သိရပါတယ်။

မက်ဆီဟာ ဇာဗီရဲ့ နည်းဗျူဟာအကွက်ချတဲ့ ဘုတ်ပြားပေါ်မှာတောင် ရှိနေပြီးသားဖြစ်ပုံပေါ်ပြီး စပိန်နာမည်ကျော် ဂျာနယ်လစ် ဂီလမ် ဘာလာဂေးက “လီယိုနဲ့ လာပေါ်တာက စကားမပြောခဲ့ကြပေမယ့် ဘာစီလိုနာက သူ့ကို ပြန်ခေါ်မယ့်အကြံအစည်ကို ဆက်ပြီး တွန်းအားပေးနေတယ်ဆိုတာ အမှန်ပါပဲ။ သူတို့တွေ အဲဒီအကြံအစည်အတိုင်း လုပ်သွားမှာပါ။ အဓိကအင်ဂျင်က မက်ဆီနဲ့ ပုံမှန် စကားပြောဆိုနေပြီး သူ့ရဲ့ အရည်အသွေးကို လိုအပ်နေတဲ့ အသင်းရဲ့ ရုပ်ပုံကားချပ်ကို တော်တော်လေးရှင်းလင်းအောင် ဆေးခြယ်ပြထားတဲ့ နည်းပြ ဇာဗီပါ။ ဇာဗီက မက်ဆီကို ကွင်းလယ်အထိုင်ရှေ့က ကွင်းလယ်ကစားသမား ၂ ဦးထဲက တစ်ဦးအဖြစ် သုံးမယ်လို့ ပြောခဲ့တယ်။ မက်ဆီ အာဂျင်တီးနားအသင်းမှာ ကစားနေတာနဲ့ အရမ်းနီးနီးစပ်စပ်တူပါတယ်။ ဇာဗီက အဲဒီကစားကွက်အလုပ်ဖြစ်ဖို့ မတူညီတဲ့နည်းလမ်းတွေကို တွေးခဲ့ပြီး ဒီအကြောင်းကို လီယို ကြားတဲ့အချိန်တိုင်း သူ့မျက်လုံးတွေက အရောင်တောက်နေခဲ့ပါတယ်။”လို့ ပြောကြားခဲ့တာဖြစ်ပါတယ်။