စင်ကာပူရောက် မြန်မာနိုင်ငံသားတွေထဲက ကြိုတင်ဆန္ဒမဲပေးခွင့်ရရှိသူ ၃၃,၄၂၈ ဦး ရှိခဲ့တဲ့အနက် အောက်တိုဘာလ ၁ရက်ကနေ ၁၈ရက်အထိ ကြိုတင်မဲပေးသူ ၂၉,၆၅၆ ဦး ရှိခဲ့တာဖြစ်တယ်လို့ သံရုံးရဲ့ ထုတ်ပြန်ချက်အရ သိရပါတယ်။

ဓာတ်ပုံ-Myanmar Club (Singapore) (စင်ကာပူသံရုံးတွင် ကြိုတင်ဆန္ဒမဲပေးနေကြတဲ့ မြန်မာနိုင်ငံသားများ)

စင်ကာပူနိုင်ငံမှာ ကြိုတင်မဲပေးဖို့အတွက် ပုံစံ(၁၅)နဲ့လျှောက်ထားသူ သုံးသောင်းလေးထောင်ကျော်ရှိခဲ့ပြီး ဒီထဲကမှ သုံးသောင်းနှစ်ထောင်ကျော်ကို ပြည်ပရောက်မဲဆန္ဒရှင်အဖြစ် ရွေးကောက်ပွဲကော်မရှင်က အကြောင်းပြန်ခဲ့တာဖြစ်ပါတယ်။ ဒါ့အပြင် ကျန်ရှိနေတဲ့ မဲဆန္ဒရှင်နှစ်ထောင်ကျော်ကို သံရုံးက ကော်မရှင်ဆီတင်ပြခဲ့တဲ့အတွက် မဲဆန္ဒရှင် (၆၀၀) ကျော် ထပ်မံမဲပေးနိုင်ခဲ့တယ်လို့ သိရပါတယ်။

ဓာတ်ပုံ-Myanmar Club (Singapore) (စင်ကာပူသံရုံးတွင် ကြိုတင်ဆန္ဒမဲပေးနေကြတဲ့ မြန်မာနိုင်ငံသားများ)

စင်္ကာပူနိုင်ငံမှာ ကျင်းပတဲ့ ကြိုတင်ဆန္ဒမဲပေးပွဲ ပထမနေ့မှာတော့ သံရုံးကို တက္ကစီတွေနဲ့ အများအပြားလာရောက်ခဲ့ကြပြီး သံရုံးအနီး ယာဉ်ကြောရှုပ်ထွေးမှုဖြစ်ပေါ်ခဲ့တဲ့အတွက် ယာဉ်ရပ်နားရန်နေရာအတွက် သံရုံးက စာထုတ်ပြန်ခဲ့ရပေမယ့်လည်း အခြားမဲပေးခြင်းလုပ်ငန်းစဉ်အဆင့်ဆင့်ဆောင်ရွက်မှုမှာတော့ နေ့စဉ် သံရုံးနဲ့အတူ စင်ကာပူက မြန်မာလူမှုရေးအသင်းအဖွဲ့များရဲ့ ကူညီဆောင်ရွက်မှုကြောင့် လာရောက်မဲပေးသူတွေအတွက် အဆင်ပြေချောမွေ့ခဲ့တာကြောင့် ကျေးဇူးတင်တယ်လို့ သံရုံးက ထုတ်ပြန်ကြေညာခဲ့ပါတယ်။

ဒါပေမယ့်လည်း ပြည်ထောင်စုရွေးကောက်ပွဲကော်မရှင်ရဲ့ လိုအပ်ချက်ကြောင့် မဲလက်မှတ်တွင် တံဆိပ်တုံးမပါဝင်ခြင်း ၊ မဲလက်မှတ်လိုအပ်ခြင်း နဲ့ တိုင်းရင်းသားဆန္ဒမဲလက်မှတ် လွဲမှားမှုအချို့ရှိခဲ့တယ်လို့လည်း မဲပေးသူတွေ နဲ့ တာဝန်ရှိသူအချို့က ပြောကြားခဲ့ပါတယ်။

၂၀၂၀ပြည့်နှစ် အထွေထွေရွေးကောက်ပွဲအတွက် စင်ကာပူရောက်မြန်မာနိုင်ငံသားများ ကြိုတင်ဆန္ဒမဲပေးခြင်းကို အောက်တိုဘာလ ၁ရက်ကနေ ၁၈ရက်အထိ ကျင်းပခဲ့ပြီး လက်ရှိအချိန်မှာတော့ ကြိုတင်မဲလက်မှတ်တွေကို ပြည်နယ်/တိုင်းဒေသကြီးအလိုက် မဲပုံးများထဲကို ရေတွက်ထည့်သွင်းပြီး ဖြစ်တယ်လို့ မြန်မာလူမှုကူညီရေးအသင်းဖြစ်တဲ့ Myanmar Club (Singapore)က သိရပါတယ်။