ပြည်ထောင်စုရွေးကောက်ပွဲကော်မရှင်က ရွေးကောက်ပွဲကျင်းပနိုင်ခြင်းမရှိကြောင်း ကြေညာခဲ့တဲ့မြို့နယ်တွေထဲက ရှမ်းပြည်နယ် ၊ မိုင်းကိုင်မြို့နယ်မှာ ကျင်းပခွင့်ရရှိဖို့အတွက် နိုင်ငံရေးပါတီလေးခုနဲ့ ဒေသခံပြည်သူတစ်သောင်းကျော်က လတ်မှတ်ထိုးတောင်းဆိုခဲ့တယ်လို့ သိရပါတယ်။

ဓာတ်ပုံ-SNLD

" ကျွန်တော်တို့ ကျန်တဲ့ပါတီတွေနဲ့ စေ့စပ်တယ် ၊ ညှိနှိုင်းတယ် ။ အစက မိုင်းကိုင်က ပြိုင်တာ ၆ ပါတီပေါ့။ အခု နှင်းဆီပါတီကမရှိတော့ ၅ပါတီကျန်တယ်။ ကျွန်တော်တို့အပါအဝင် ၄ပါတီက သဘောတူတယ် ။ ပြည်သူတွေရဲ့ နိုင်ငံအခွင့်အရေးအတွက်လေ လုပ်သင့်တယ်ဆိုပြီး လက်မှတ်တွေထိုး တင်လိုက်တာလေ ။ ပြည်သူတွေရဲ့ သဘောထားကလည်း အရေးကြီးတယ်လေ ။ တချို့ပြည်သူတွေက ပါတီကို တင်ပြတောင်းဆိုလာတာနဲ့ ကျွန်တော်တို့ ဦးဆောင်ပြီး ကောက်ဖြစ်သွားတယ်ပေ့ါဗျာ ။ ပြည်သူတွေ လက်မှတ်ထိုးတာ လူတစ်သောင်းကျော်ပါတယ် ။စဉ်းစားကြည့်ပေါ့ဗျာ။ ဒီတစ်ရက် နှစ်ရက်အတွင်း ပြည်သူတစ်သောင်းကျော် လက်မှတ်ထိုးကြတယ်ဆိုတာ မိုင်းကိုင်မှာရှိတဲ့ ပြည်သူတွေရဲ့ သူတို့အခွင့်အရေးအပေါ်မှာ တောင်းဆိုမှုအပေါ် ရွေးကောက်ပွဲကော်မရှင်နဲ့ သက်ဆိုင်ရာတာဝန်ရှိသူတွေ စဉ်းစားသင့်တယ်လို့ မြင်တယ် " လို့ ရှမ်းတိုင်းရင်းရင်းသားများဒီမိုကရေစီအဖွဲ့ချုပ် (SNLD) တွဲဖက်အတွင်းရေးမှူး(၁) စိုင်းကျော်ညွန့်က Duwun ကိုပြောပါတယ်။

မိုင်းကိုင်မြို့နယ်မှာ ရွေးကောက်ပွဲကျင်းပနိုင်ဖို့အတွက် SNLD အပါအဝင် ရှမ်းတိုင်းရင်းသားများဒီမိုကရက်တစ်ပါတီ(SNDP) ၊ အမျိုးသားဒီမိုကရေစီအဖွဲ့ချုပ် (NLD) ၊ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (USDP) တို့က သဘောတူညီခဲ့ကြတာဖြစ်ပြီး တအာင်း(ပလောင်)အမျိုးသားပါတီ (TNP)အနေနဲ့တော့ ဆွေးနွေးခဲ့ပေမယ့် လက်မှတ်ထိုး သဘောတူညီမှုမှာ ပါဝင်ခဲ့ခြင်းမရှိဘူးလို့ သိရပါတယ်။

ဓာတ်ပုံ-SNLD

မိုင်းကိုင်မြို့နယ်ကို ရွေးကောက်ပွဲမကျင်းပတဲ့နယ်မြေ စာရင်းက ပယ်ဖျက်ပေးဖို့ SNLD လွှတ်တော် ကိုယ်စားလှယ် လောင်းသုံးဦး လက်မှတ်ထိုးတောင်းဆိုတဲ့ စာအပါအဝင် မဲဆန္ဒ ရှင် ၁၁,၂၃၈ ဦးတို့ရဲ့ လက်မှတ်များတွေကို မိုင်းကိုင် မြို့နယ်ရွေးကောက်ပွဲကော်မရှင် ရုံးခွဲကတစ်ဆင့် လွိုင်လင်ခရိုင် ကော်မရှင်အဖွဲ့ခွဲထံကို အောက်တိုဘာ ၂၂ ရက်က ပေးအပ်ခဲ့ပြီး အဆိုပါပေးအပ်ပွဲကို ရပ်ကွက်အုပ်ချုပ်ရေးမှူးတွေက အသိသက်သေအဖြစ် တက်ရောက်ခဲ့တယ်လို့ SNLD က အောက်တိုဘာလ ၂၂ရက် သတင်းထုတ်ပြန်ချက်မှာ ဖော်ပြထားပါတယ်။