အောက်တိုဘာလ ၂၈ ရက်နေ့ နံနက်ပိုင်းတွင် ပြည်ခိုင်ဖြိုးပါတီဝန်းရံသူများက မကွေးမြို့တွင်းလှည့်လည်ချိန်တွင် မကွေးမြို့ မြို့ဟောင်းရပ်ကွက် နှင့်ယင်းဆိပ်ကျေးရွာအနီးတွင် ခဲဖြင့်ပစ်ခြင်းခံခဲ့ရပြီး ယင်းဆိပ်ကျေးရွာအနီး ခဲဖြင့်ပစ်သူများအား ဖမ်းဆီးရမိကြောင်း ရဲတပ်ဖွဲ့ထံမှသိရပါတယ်။

“ပြည်ခိုင်ဖြိုးလှည့်ရင်းနဲ့ မြို့ဟောင်းဘက်ရောက်တာပေါ့၊မြို့ဟောင်းကအဖွဲ့တွေက အောက်ကနေ ဆူညံ့ပွက်ပြီးတော့ လေးခွနဲ့ပစ်တယ်ထင်ပါတယ်၊အဲဒါနဲ့သူတို့က ၃ ယောက်ဒဏ်ရာရတယ်ပေါ့၊ ကောင်မလေးနှစ်ယောက်နဲ့ ယောက်ျားတစ်ယောက်ဒဏ်ရာရတယ်”လို့ ရဲမှုးမြင့်လွင်က ဆိုပါတယ်။

အဆိုပါဖြစ်ရပ်မှာ ပြည်ခိုင်ဖြိုးပါတီဝန်းရံသူများမကွေးမြို့တွင်း လှည့်လည်ချိန်၌ ဖြစ်ပွါးခဲ့ခြင်းဖြစ်ပြီး နေ့လယ်ပိုင်းတွင် အဆိုပါဝန်းရံသူများက ၎င်းတို့ရဲ့ ကျေးရွာများသို့ပြန်ချိန်မှာ ခဲဖြင့်ပစ်ခတ်ခြင်းကို ထပ်မံကြုံတွေ့ ခဲ့ရကြောင်း ရဲမှုးက ပြောပါတယ်။

“ပြည်ခိုင်ဖြိုးကားပြန်တဲ့အခါကျတော့ ယင်းဆိပ်အနီးမှာလေးခွနဲ့တစ်ခါထပ်ပစ်တယ်၊ ကျွန်တော်တို့ သတင်းရတော့ လိုက်ဖမ်းတော့ ၂ ယောက်မိတယ်။ ဘယ်ကလဲဆိုတော့ကျတော့မြို့ဟောင်းရပ်ကွက်က ဖြစ်နေတယ်၊ လေးခွနှစ်လက်နဲ့လောက်စာလုံးတွေနဲ့ အကုန်မိတယ်”လို့ ရဲတပ်ဖွဲ့မှုူးရဲမှုးမြင့်လွင်က ပြောပါတယ်။

“ရွေးကောက်ပွဲဆိုတာကတော့ ငါးနှစ်တစ်ကြိမ်ကြုံကြရမှာပါ၊ ပြည်သူအချင်းချင်းကို မုန်းတီးနေအောင် ရန်လိုနေအောင် လုပ်ထားတာတွေကိုထိမ်းသိမ်းသင့်တယ်၊ဒီလိုတွေဖြစ်ရတာ ရုပ်လဲဆိုးပါတယ်၊ရွေးကောက်ပွဲ လည်းရုပ်ပျက်ပါတယ်၊မဖြစ်စေချင်ဘူး၊ ပြည်သူတွေကတော့ စိတ်ခံစားချက်အရလုပ်တာပဲ သို့သော် အမုန်းတရားတွေ မုန်းတီးစိတ်တွေဖြစ်အောင်လုပ်နေတဲ့ အသိုင်းအဝိုင်းက ရှိနေတာကို”လို့ မကွေးတိုင်းပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီအတွင်းရေးမှုး ဦးဆန်းညွန့်အောင်မှ မှတ်ချက်ပြုပါတယ်။

မကွေးပိုစ့်မှ ပေးပို့ထားသော သတင်းဖြစ်ပါသည်။