ကမာရွတ်မြို့နယ်မှာတွေ့ရှိနေတဲ့ ကိုဗစ်-၁၉ပိုးတွေ့လူနာအများစုက ပျံကျဈေးတွေနဲ့နီးစပ်မှုရှိတာကြောင့် ဒီဈေးတွေရဲ့ ဖွင့်လှစ်မှုကို အထူးကြပ်မတ်လိုက်ပြီဖြစ်တယ်လို့ ကမာရွတ်မြို့နယ် အုပ်ချုပ်ရေးမှူးက Duwun ကို ပြောပါတယ်။

" ဒါဟာ ကျွန်တော်တို့ မြို့နယ်အနေအထားနဲ့ ကျွန်တော်တို့ဆောင်ရွက်နေတာပါ။ ဆိုင်နည်းတဲ့ဈေးကတော့ နေရာလည်းအဆင်ပြေတော့ နေ့စဉ်ဖွင့်လို့ရတယ်။ လှည်းတန်းပေ၅၀ဈေး ကတော့ နှစ်ရက်ခြားတစ်ခါ အလှည့်ကျဖွင့်ရမယ် ၊ ဆင်မလိုက်ပျံကျဈေးကတော့ တစ်ရက်ခြား အလှည့်နဲ့ဖွင့်ကြ ရမယ်။ဒီလိုတင်းကြပ်လိုက်ရတာက ယာယီဈေးတွေရှိတဲ့ ပတ်ဝန်းကျင်မှာ positive လူနာ အရမ်းထွက်လာလို့ပါ။နေ့စဉ်ပိုးတွေ့လူနာကို စိစစ်ရင် ပျံကျဈေးရှိတဲ့ ရပ်ကွက်တွေက positive ထွက်နှုန်းများနေပါတယ်။အခုဈေးဆိုင်တွေအလှည့်ကျဖွင့်ဖို့ကလည်း ဈေးသည်တွေတင်ပြတဲ့နည်းလမ်းကို ကျွန်တော်တို့က စဉ်းစားပေးတာပါ။ဒီအတွက် ခေါ်ယူညှိနှိုင်းပြီးမှ လုပ်တဲ့ကိစ္စပါ " လို့ ကမာရွတ်မြို့နယ် အုပ်ချုပ်ရေးမှူး ဦးသိန်းဇော်ဦးက Duwun ကိုပြောပါတယ်။

ဒီလိုဆောင်ရွက်ဖို့အတွက် ညှိနှိုင်းမှုတွေကို လွန်ခဲ့တဲ့တစ်ပတ်က စတင်ဆောင်ရွက်ခဲ့တာဖြစ်ပြီး ယခုတစ်ပတ်မှာတော့ လက်တွေ့ဆောင်ရွက်နေကြပြီဖြစ်ပါတယ်။ ဒါကြောင့် အခုလို ဆောင်ရွက်ဖို့အတွက်ကိုလည်း အသိပေးအကြောင်းကြားပြီးဖြစ်လို့ ချိုးဖောက်မှုတွေရှိလာရင် အရေးယူမှုတွေကိုလည်း တင်းတင်းကြပ်ကြပ်ဆောင်ရွက်မှာဖြစ်တယ်လို့ ဦးသိန်းဇော်ဦးက Duwun ကို ပြောပါတယ်။

ဒီလိုပျံကျဈေးတွေနဲ့ပတ်သက်ပြီး စည်းကမ်းတင်းကြပ်ကန့်သတ်မှုတွေကို ကမာရွတ်မြို့နယ်က အထူးစီမံဆောင်ရွက်နေတာဖြစ်ပြီး အခြားမြို့နယ်တွေမှာတော့ မရှိသေးဘူးလို့ မြို့နယ်အုပ်ချုပ်ရေးမှူးတွေရဲ့ ပြောကြားချက်အရ သိရပါတယ်။

" ပျံကျဈေးတွေက ရပ်ကွက်အတိုင်းအတာနဲ့ ရောင်းချတာလောက်ပဲရှိပါတယ်။အဓိကက လူနေထူထပ်တဲ့ အမှတ်(၁)၊အမှတ်(၂)၊ ကျိုက်ဝိုင်းဘုရားတို့ အဲဒီဈေးသုံးခုလောက်ပဲ လူအများစည်တာပေါ့။နောက်ပြီး အဲဒီဈေးတွေကို ကန့်သတ်တာမျိုးတော့ ကျွန်တော်တို့ဆီတော့ မလုပ်ဖြစ်သေးဘူး။ဒီဈေးတွေက မိုးလင်းတစ်ခါ ၊ ညနေပိုင်းတစ်ခါ ခဏစည်တဲ့ အနေအထားပဲ။ဟင်းသီးဟင်းရွက်နဲ့ သားငါးသည် လောက်ပဲဆိုတော့ အထည်ဆိုင်တွေလည်း မဖွင့်ဘူးဆိုတော့ အဲဒီလိုတော့ မရှိသေးဘူး " လို့ မရမ်းကုန်းမြို့နယ်အုပ်ချုပ်ရေးမှူး ဦးထွန်းချစ်က Duwun ကို ပြောပါတယ်။

လက်ရှိအချိန်မှာတော့ ကမာရွတ်မြို့နယ်က ကိုဗစ်၁၉စည်းကမ်းသတ်မှတ်ချက်တွေနဲ့ပတ်သက်ပြီး တင်းတင်းကြပ်ကြပ်စစ်ဆေးဆောင်ရွက်နေသလို ဒီဇင်ဘာလ ၄ရက်အထိ စာရင်းများအရ ပိုးတွေ့လူနာ ၁,၉၀၀ကျော်ရှိနေပြီ ဖြစ်ပါတယ်။