စစ်ကိုင်းတိုင်းဒေသကြီးထဲက စစ်ကိုင်း ၊ ရွှေဘို နဲ့ ကလေးမြို့နယ်တို့မှာ ကိုဗစ်၁၉ကူးစက်မှုမြင့်တက် လာတဲ့အတွက် နေအိမ်တွင်နေထိုင်ရေး (Stay at Home )အစီအစဉ် စတင်ဖို့ တိုင်းဒေသကြီးအစိုးရအဖွဲ့က ထုတ်ပြန်လိုက်ပါတယ်။

စစ်ကိုင်းတိုင်းဒေသကြီးအတွင်းက မြို့နယ်တွေထဲမှာတော့ ကူးစက်မှုစတင်ခဲ့တဲ့ ဧပြီလ ၁၅ရက်ကနေ ဒီဇင်ဘာလ ၆ရက်အထိ ကိုဗစ်၁၉ပိုးတွေ့ရှိမှု (၁၀၇၃)ဦးရှိပြီး စစ်ကိုင်းမြို့နယ် ( ၂၀၂)ဦး ၊ ရွှေဘိုမြို့နယ် (၁၂၆)ဦး နဲ့ ကလေးမြို့နယ်မှာ (၂၄၇)ဦးရှိကာ ကူးစက်ပြန့်ပွားမှုအများဆုံးမြို့နယ်တွေဖြစ်တယ်လို့ တိုင်းဒေသကြီးအစိုးရအဖွဲ့ရဲ့ ထုတ်ပြန်ချက်အရ သိရပါတယ်။ ဒါ့အပြင် ကူးစက်မှုအများဆုံး မြို့နယ်သုံးခုမှာ လက်ရှိကွာရန်တင်း နေထိုင်ရသူတွေက စစ်ကိုင်းမြို့နယ်မှာ (၇၄၇)ဦး ၊ ရွှေဘိုမြို့နယ်မှာ (၁၀၂၁)ဦး နဲ့ ကလေးမြို့နယ်မှာ (၄၁၃)ဦးရှိတယ်လို့ သိရပါတယ်။

ဒါကြောင့် ကူးစက်မှုပိုမိုများပြားလာတဲ့ အထက်ပါ မြို့နယ်သုံးခုကို ရောဂါပြန့်ပွားမှုထိန်းချုပ်နိုင်ရေး အတွက် WHO နဲ့ ကျန်းမာရေးဝန်ကြီးဌာနရဲ့ ညွှန်ကြားချက်တွေအရ မိမိအိမ်တွင်နေထိုင်ခြင်း ၊ တစ်ဦးနဲ့တစ်ဦးထိတွေ့မှုမရှိစေဖို့ Stay at Home ရဲ့ သတ်မှတ်စည်းကမ်းတွေကို မဖြစ်မနေလိုက်နာဖို့နဲ့ ပျက်ကွက်ပါက တည်ဆဲဥပဒေတွေအရ အရေးယူဆောင်ရွက်မယ်လို့ တိုင်းဒေသကြီးအစိုးရအဖွဲ့က ဒီဇင်ဘာလ ၁၀ရက်မှာ ထုတ်ပြန်ခဲ့ပါတယ်။