ရခိုင်ပြည်နယ်အတွင်းက ရွေးကောက်ပွဲမကျင်းပနိုင်ခဲ့တဲ့နေရာတွေအတွက် အမြန်ဆုံးပြန်ကျင်းပမှာကို အမျိုးသားဒီမိုကရေစီအဖွဲ့ချုပ်အနေနဲ့ လိုလားပြီး လွတ်လပ်ပြီး သန့်ရှင်းမျှတတဲ့ရွေးကောက်ပွဲဖြစ်နိုင်တဲ့ အခြေအနေ ရှိလာပါက ရွေးကောက်ပွဲ အမြန်ဆုံးလုပ်ဖို့ လိုလားကြောင်း ပါတီရဲ့ ဗဟိုအလုပ်အမှုဆောင် ဒေါက်တာမျိုးညွန့်က ပြောဆိုလိုက်ပါတယ်။

“ ရွေးကောက်ပွဲတစ်ခုရဲ့အသက်ဟာ လွှတ်လပ်ပြီးသန့်ရှင်းမျှတမှုက အသက်ပါ။ ရွေးကောက်ပွဲလုပ်ရုံမျှနဲ့ ဒါဟာဒီမိုကရေစီနည်းကျပြီ ပြောလို့မရပါဘူး။ အဲဒီတော့ လွှတ်လပ်ပြီးသန့်ရှင်းမျှတတဲ့ ရွေးကောက်ပွဲဖြစ်နိုင်တဲ့အခြေအနေရှိလာပြီ။ ဥပဒေနဲ့လည်း ညီညွှတ်ပြီဆိုရင် အမြန်ဆုံးလုပ်တာ ကျွန်တော်တို့ လိုလားပါတယ်။” လို့ အမျိုးသားဒီမိုကရေစီအဖွဲ့ချုပ် ဗဟိုအလုပ်အမှုဆောင် ဒေါက်တာမျိုးညွန့်က ဆိုပါတယ်။

ဒါ့အပြင် ပါတီအနေနဲ့ ရခိုင်ပြည်နယ်က ရွေးကောက်ပွဲမကျင်းပနိုင်ခဲ့တဲ့နေရာတွေအတွက် အမြန်ဆုံးပြန်ကျင်းပမှာကို လိုလားပေမယ့်လည်း ရွေးကောက်ပွဲတည်ဆဲဥပဒေတွေကို ဆန့်ကျင်ပြီး နားလည်မှုနဲ့လုပ်တာမျိုးမဖြစ်သင့်ဘူးလို့လည်း ဒေါက်တာမျိုးညွန့် ကဆက်လက်ပြောကြားခဲ့ပါသေးတယ်။

အဆိုပါ ကွင်းဆင်းလေ့လာချက်တွေအရ ရခိုင်ပြည်နယ်မှာ ရွေးကောက်ပွဲပြန်လည်ကျင်းပပေးဖို့ ဂျပန်အထူးကိုယ်စားလှယ်က ပြည်ထောင်စုရွေးကောက်ပွဲကော်မရှင်ကို တင်ပြထားခဲ့ပေမယ့်လည်း အဖြေမရရှိခဲ့ဘူးလို့လည်း ဒီဇင်ဘာ (၄) ရက်က ရန်ကုန်မြို့ Melia Hotel မှာ ပြည်တွင်းသတင်းမီဒီယာနှစ်ခုနဲ့ သတင်းစာရှင်းလင်းပွဲ ပြုလုပ်စဉ် ထည့်သွင်းပြောကြားထားခဲ့တယ်လို့လည်း သိရပါတယ်။ 

ဒါ့အပြင် ရခိုင်ပြည်နယ်အတွင်း ရွေးကောက်ပွဲမကျင်းပနိုင်ခဲ့တဲ့ နယ်မြေတွေမှာ ကြားဖြတ်ရွေးကောက်ပွဲကျင်းပပေးဖို့ကိုလည်း အစိုးရနဲ့ တပ်မတော်ကို မေတ္တာရပ်ခံတယ်လို့ AA အဖွဲ့ က တောင်းဆိုထားပြီး တပ်မတော်အနေနဲ့လည်း အတတ်နိုင်ဆုံးညှိနှိုင်းဆောင်ရွက်သွားမယ်လို့လည်း နိုဝင်ဘာ (၁၂) ရက်က သတင်းထုတ်ပြန်ထားပါတယ်။