နီနီခင်ဇော်ဟာ The Voice Myanmar (Season-3) Final Round အတွက် ပြိုင်ပွဲဝင် ခင်ရတနာစိုးရဲ့ ကြိုးစား သင်ယူခဲ့မှုတွေကို အခုလို ပြောပြခဲ့ပါတယ်။ 

နီနီခင်ဇော်ကတော့ The Voice Myanmar (Season-3) Final Round ပွဲ မကျင်းပခင်မှာ ခင်ရတနာစိုးရဲ့ ကြိုးစားမှုတွေကို ပြောပြလာခဲ့ပါတယ်။ သူကိုယ်တိုင် ရွေးချယ်ပေးခဲ့တဲ့ " နဂါးနီ" သီချင်းကို အကောင်းဆုံး သီဆိုခဲ့တဲ့ ခင်ရတနာစိုးအတွက်လည်း ကျေနပ်ပီတိဖြစ်လို့နေပါတယ်။ 

" နဂါးနီတန်ခိုးနဲ့ ကြိုးစားခဲ့ကြသူများ တေးရေး ဆရာကြီး ရွှေတိုင်ညွန့် ကိုဦးခိုက်ပါတယ်။ ခင်ခင့်ကို အကောင်းဆုံးတင်ဆက်ပြသခွင့်ရပေးလို့ ပံ့ပိုးပေးခွင့်ရလို့ကျေးဇူးတင်ပါတယ်။ ကျွန်မတို့မြတ်နိုးတဲ့ မြန်မာ့ဆိုင်းဝိုင်းကိုဂုဏ်ယူစွာတင်ဆက်ခွင့်ရလို့ ဝမ်းသာလှပါပြီ။ နီနီရွေးပေးတဲ့ နဂါးနီ နဲ့ သီချင်းတိုင်းကို ပုံဖော်သီဆိုပေးတဲ့ ခင်ခင့်ကိုကျေးဇူးတင်ပါတယ်။ ခင်ခင့်ပရိသတ်တွေတစ်ယောက်ချင်းဆီကိုလည်း ကျေးဇူးပါတယ်။ ကျွန်မတို့ကြိုးစားတာတွေ အသိအမှတ်ပြုပေးလို့ကျေးဇူးပါရှင်။သူ့ဘဝရှေ့လျှောက်မှာပိုဝန်းရံပေးပါ" ဆိုပြီးတော့ ဒီဇင်ဘာလ ၂၁ ရက်နေ့ မနက် (၈) နာရီက သူ့ရဲ့ ဖေ့စ်ဘွတ်ပေ့ချ်မှာ ရေးသားခဲ့ပါတယ်။ 

နီနီခင်ဇော်ဟာ မြန်မာသံစဉ်ကို ပိုင်နိုင် ကျွမ်းကျင်သူ မဟုတ်လို့ မြန်မာ့ဆိုင်းဝိုင်း ပညာရှင်တွေနဲ့ ပူးပေါင်းပြီး ခင်ရတနာစိုးရဲ့ ကျွမ်းကျင်မှုကို အသုံးပြုရင်း ကြိုးစား သင်ယူပေးခဲ့တယ်လို့ ဆိုပါတယ်။ 

"ခင်ခင် ဆိုတဲ့သီချင်းဟာကျွန်မရဲ့ ကျွမ်းကျင်တဲ့ ဂီတအမျိုးအစားမဟုတ်တဲ့ အတွက် ပိုလို့ကြိုးစားစီစဉ်ပေးရပါတယ်။ Semi Final ပြီးကည်းက တစ်ရက်မှမနား ခင်ခင်ဟာဆိုင်းပညာကို နေ့ ည သင်ကြားခဲ့ရပါတယ်။ ကျွန်မ မောင်းသမျှ၊ ဆရာမောင်းသမျှ၊ မညည်းမငြူလုပ်ပေးရှာပါတယ်။ ခင်ခင့်ကို နဂါးနီသီချင်း ဆိုင်း သင်ကြားပေးခဲ့တဲ့ music arrangement လုပ်ပေးခဲ့တဲ့ ရွာစားကိုထက်အာကာကိုကျေးဇူးအရမ်းတင်ဂုဏ်ပြုအပ်ပါတယ်။ တနိုင်ငံလုံး အကုန်အကျခံပီး ခင်ခင့်ကိုရော ပြိုင်ပွဲဝင်အားလုံးကို Vote ပေးကျလို့ ကျေးဇူးပါ။ ကျွန်မတို့ နည်းပြတွေလည်း အကောင်းဆုံးပြင်ဆင်ပေးကြပီး ပရိသတ်တွေရဲ့ 100 % Vote ဖြစ်တဲ့အတွက် နောက်ဆုံးက ပရိသတ်တွေရဲ့ အဆုံးအဖြတ်ပါပဲရှင် ။ အားလုံးနဲ့ပြန်လည်ဆုံတွေ့ပါဦးမယ်ရှင်" လို့ ဆက်လက် ပြောပြခဲ့ပါတယ်။ 

Photo: KMA

The Voice Myanmar (Season-3) သီချင်းဆိုပြိုင်ပွဲကြီးရဲ့ နောက်ဆုံး ပြိုင်ပွဲကတော့ ဒီဇင်ဘာလ (၂၀) ရက်နေ့မှာ ကျင်းပပြုလုပ်ခဲ့တာပါ။ The Voice Myanmar (Season-3) သီချင်းဆိုပြိုင်ပွဲမှာ ခင်ရတနာစိုးဟာ ပရိသတ်တွေရဲ့ အားပေးမှုကို အခိုင်အမာရခဲ့ပေမယ့် Winner ဆုနဲ့ လွဲချော်သွားခဲ့တာကြောင့် နီနီခင်ဇော်သာမက ခင်ရတနာစိုးရဲ့ ပရိသတ်တွေကလည်း စိတ်မကောင်းဖြစ်ခဲ့ကြပါတယ်။ နီနီခင်ဇော် ကိုယ်တိုင်ကလည်း The Voice Myanmar ပြိုင်ပွဲမှာ အကဲဖြတ်ဒိုင်လူကြီးဖြစ်သလို သူ့ Team က အဖွဲ့သားတွေကိုလည်း ဂီတပညာတွေကို အကောင်းဆုံး သင်ကြားပေးခဲ့တာတွေ့ရပါတယ်။