ဇန်နဝါရီလ (၁)ရက်နေ့မှာ ထွက်ရှိမယ့် (၂၃)ကြိမ်မြောက်အောင်ဘာလေ ထီဖွင့်ပွဲကြီးမှာတော့ လာရောက်ထုတ်ယူခြင်းမရှိတဲ့ ဆုငွေတွေထဲက ကျပ်သန်း (၂၅၀)ကို ထပ်မံတိုးပြီး ချီးမြှင့်သွားမှာဖြစ်တယ်လို့ သိရပါတယ်။ 

“ ထပ်မံတိုးပြီး ချီးမြှင့်တဲ့ဆုတွေက ဘဏ္ဍာသိမ်းငွေထဲက ချီးမြှင့်တာပါ။ ဘဏ္ဍာသိမ်းငွေကတော့ လတိုင်းရှိပါတယ်။ တစ်နှစ်ပြည့်လို့ လာရောက်ထုတ်ယူခြင်းမရှိတဲ့ ဆိုကြေးငွေတွေဆို ဘဏ္ဍာသိမ်းငွေအဖြစ်ထားတယ်။ ပြီးတော့ အခုလို ထပ်တိုးဆုတွေအဖြစ်ချီးမြှင့်တယ်။ ဒီလအတွက်ကတော့ ဘဏ္ဍာသိမ်းငွေ ကျပ်သန်း (၂၅၀)ထဲက ဝေဝေဆာဆာဆုမဲတွေအဖြစ် ဆုပေါင်း (၂၀၀၀)ကျော် ထပ်တိုးချီးမြှင့်မှာပါ”လို့ ပြည်တွင်းအခွန်ဦးစီးဌာနမှ ညွှန်ကြားရေးမှူး ဒေါ်ဆွေဆွေခိုင်က Duwun ကိုပြောပါတယ်။

ယခု ဇန်နဝါရီလ (၁)ရက်နေ့မှာ ထွက်ရှိမယ့် (၂၃)ကိုမ်မြောက် အောင်ဘာလေ ထီဖွင့်ပွဲအတွက် “က” အက္ခရာကနေ “ကဆ” အက္ခရာထိ စုစုပေါင်း အက္ခရာ (၄၀)လုံးနဲ့ ထီစာအုပ် (၃၂၇၂၇၂၀)ကို ထုတ်ဝေရောင်းချခဲ့တာဖြစ်ပါတယ်။ ထီလက်မှတ်အားလုံး ကုန်အောင်ရောင်းချနိုင်ခဲ့တဲ့အပြင် အရန်ထီအဖြစ် ထုတ်လုပ်ရောင်းချတဲ့ “ကဇ” အက္ခရာပါ ထီလက်မှတ် (၈၁၈၁၈)အုပ်လည်း ကုန်အောင်ရောင်းချနိုင်ခဲ့တယ်လို့ သိရပါတယ်။