အင်ဒိုနီးရှားနိုင်ငံရှိ စီနာဘန် (Mount Sinabung) မီးတောင်ဟာ ယနေ့ (မတ် ၂ ရက်) ပေါက်ကွဲခဲ့ရာ ပြာမှုန်များ အမြင့် ၃ မိုင်ကျော်အထိ ရောက်ရှိခဲ့ကြောင်းနဲ့ ယမန်နှစ် ဩဂုတ်လနောက်ပိုင်း ပထမဆုံးအကြိမ် ကြီးမားတဲ့ ပေါက်ကွဲမှုဖြစ်လာကြောင်း သိရပါတယ်။
(Photo: AP)
စီနာဘန်မီးတောင်ရဲ့ လှုပ်ရှားမှုဟာ ယမန်နှစ် ဩဂုတ်လကတည်းက မြင့်တက်နေခဲ့ကြောင်းနဲ့ မြောက်ပိုင်းဆူမာတြားပြည်နယ်မှာ ဒုတိယအမြင့်ဆုံး မီးတောင်သတိပေးချက်ကို ထုတ်ပြန်ထားပါတယ်။ လက်ရှိမှာ သေဆုံးဒဏ်ရာရမှုရှိကြောင်း သတင်းမကြားရပေမဲ့ တာဝန်ရှိသူတစ်ဦးကတော့ မီးတောင်ဝနေရာကနေ အနည်းဆုံ ၂ မိုင်နီးပါးအကွာမှာ နေကြရန် ဒေသခံတွေကို တိုက်တွန်းထားကြောင်း Volcanology and Geological Hazard Mitigation Centre က ပြောပါတယ်။
ဆိုရှယ်မီဒီယာ ဗီဒီယိုတွေအရ မီးတောင်ပေါက်ကွဲစဥ် ဒေသခံတွေကြား အနည်းငယ် ထိတ်လန့်တုန်လှုပ်နေခဲ့ပြီး မီးတောင်ကနေ အဖြူရောင်ပြာမှုန်တန်းကြီးတစ်ခု အပြာရောင်ကောင်းကင်ထက်သို့ ထွက်ပေါ်လာခဲ့တာ တွေ့ရပါတယ်။ အသက်က ၂၀ နှစ်အရွယ် ဒေသခံတစ်ဦးဖြစ်သူ Wira Br Sitepu ရဲ့ အဆိုအရ မီးတောင်အခြေအနေဟာ လက်ရှိမှာ ငြိမ်သက်နေပြီး ပေါက်ကွဲနေခြင်းမရှိကြောင်းနဲ့ ပြာမှုန်များထွက်ရှိမှု လျော့ကျသွားကြောင်း သိရပါတယ်။
(Photo: Reuters)
အင်ဒိုနီးရှားနိုင်ငံဟာ ပစိဖိတ်မီးကွင်း (Pacific Ring of Fire) လို့ခေါ်ကြတဲ့ နေရာမှာတည်ရှိပြီး ငလျင်လှုပ်မှုနဲ့ မီးတောင်ပေါက်ကွဲမှုတွေ ပုံမှန် ကြုံရလေ့ရှိပါတယ်။ အင်ဒိုနီးရှားမှာ သက်ဝင်လှုပ်ရှားမှုရှိတဲ့ မီးတောင် ၁၃၀ နီးပါးရှိပြီး ကမ္ဘာပေါ်ရှိ အခြားနိုင်ငံအားလုံးထက် ပိုများပါတယ်။ စီနာဘန်မီးတောင်ဟာ ၂၀၁၀ ခုနှစ်မှာ နောက်တစ်ကြိမ် ပေါက်ကွဲမှုမတိုင်မီ ရာစုနှစ်များကြာ လှုပ်ရှားမှုမရှိခဲ့ဘူးလို့ ဆိုပါတယ်။