ထိပ်တန်း စူပါရွက်လှေဒီဇိုင်းတွေနဲ့ နာမည်ကျော်တဲ့ ပြင်သစ်ဒီဇိုင်နာဟာ ဒေါ်လာသန်း ၃၀၀ ကျော် ကုန်ကျမယ့် ကမ္ဘာ့ပထမဆုံး ပုဂ္ဂလိကဇိမ်ခံရထားတစ်မျိုးကို ဒီဇိုင်းထုတ်နေတယ်လို့ ဆိုပါတယ်။

Photo: goodwordnews

           ဘီလျံနာတွေအတွက် တန်ဖိုးကြီးဇိမ်ခံ ပုဂ္ဂလိကသယ်ယူပို့ဆောင်ရေးယာဉ်တွေ ဖန်တီးခဲ့တဲ့သူဟာ ဒီတစ်ကြိမ်မှာတော့ ကမ္ဘာ့ပထမဆုံးအဆင့်မြင့် ဇိမ်ခံ Private Train တစ်စီးကို ပုံစံထုတ်နေတယ်လို့ Times Now News က ဆိုပါတယ်။ ဒီဇိမ်ခံရထားကို The G Train လို့ နာမည်ပေးထားပြီး ပိုင်ရှင်တစ်ဦးတည်းအတွက် ဒီဇိုင်းထုတ်ထားတာပါ။ စမတ်ရထားအမျိုးအစားဖြစ်ပြီး အလျားပေ ၁၃၀၀ ခန့် ရှည်လျားပြီး အတွဲ ၁၄ တွဲ ပါမှာပါ။

Photo: theluxurystoryteller

           အတွင်းခန်းတွေမှာ ဧည့်ခန်း ၁၈ ခန်း ထည့်ပေးထားပြီး ဇိမ်ခံနိုင်မယ့် အခန်းတစ်ခုလည်း ပါဝင်မှာ ဖြစ်ပါတယ်။ အားကစားလုပ်ချင်သူတွေအတွက်လည်း Gym ရုံတစ်ခု ထည့်ထားသလို Spa နဲ့ ညစာစားခန်းတွေ ၊ Public Space တွေလည်း ထည့်သွားမှာပါ။ လဟာပြင်ပါတီတွေ လုပ်ဖို့အတွက်လည်း ရထားဘေးဘက်ကနေ တောင်ပံသဖွယ်နေရာတွေ ဖန်တီးပေးနိုင်မှာ ဖြစ်သလို အတွင်းထဲမှာလည်း ဥယျာဉ်တစ်ခုပါ ထည့်ပေးသွားမယ်လို့ ဆိုပါတယ်။

           တစ်တွဲမှာ ဧည့်သည် ၁၈ ဦးအထိ ဧည့်ခံနိုင်ပြီး တစ်နာရီ ကီလိုမီတာ ၁၆၀ နှုန်းနဲ့ ပြေးဆွဲနိုင်မှာပါ။ ရထားလမ်းကြောင်းကိုလည်း ဥရောပနဲ့ အမေရိကတခွင်မှာ ရှိတဲ့ ရထားလမ်းတွေပေါ် ပြေးနိုင်အောင် ဒီဇိုင်းထုတ်ထားတယ်လို့ ဆိုပါတယ်။ G Train ဇိမ်ခံရထား တည်ဆောက်ရေးဟာ အမေရိကန်ဒေါ်လာ သန်း ၃၅၀ ဝန်းကျင်အထိ ကျသင့်နိုင်တယ်လို့ ခန့်မှန်းထားပြီး ရထားရဲ့လုပ်ဆောင်ချက်တွေအဆင်ပြေချောမွေ့မှုရှိရေးအတွက် ‌ဂေါဂိန်နဲ့ သူ့အဖွဲ့ဟာ နှစ်အတော်ကြာအောင် ကြိုးစားထားတယ်လို့ ဆိုပါတယ်။

         Photo: futuroprossimo

           လူမှုကွန်ရက်တွေပေါ်မှာတော့ ဂေါဂိန်ရဲ့ စမတ်ဇိမ်ခံရထားဟာ ပြင်ပလောကထဲက Snowpiercer ရထားကြီးလို့ ပြောနေကြပါတယ်။