နော်တင်ဟမ်ဖောရက်စ်နဲ့ပွဲမှာ ဘရူနိုဖာနန်ဒက်စ်ရဲ့ Rabona ကန်ချက်နဲ့ ဖရက်ဒ်ဆီ ပေးပို့ခဲ့တဲ့အပေါ် ပရိသတ်တွေက ချီးကျူးနေကြပါတယ်။ ပေါ်တူဂီကွင်းလယ်လူဟာ အဲရစ်ဆန်နဲ့တွဲဖက်ပြီး အသင်းကွင်းလယ်ကို ထိန်းချုပ်ပေးနေကာ ခြေစွမ်းပြနေပြီး သူ့ရဲ့ ဘောလုံးပေးပို့ပုံ တိကျမှုတွေက တကယ်ချီးကျူးစရာကောင်းနေခဲ့တာပါ။
မနေ့ညကပွဲမှာလည်း ဖာနန်ဒက်စ်က လှပတဲ့ ပေးပို့ပုံနဲ့ ဖရက်ဒ်ဆီကို ဘောလုံးရောက်အောင် ပို့ပေးနိုင်ခဲ့ပါတယ်။ ဂိုးဧရိယာထဲမှာ ရှိနေတဲ့ ဖရက်ဒ်ဆီကို တိုက်ရိုက်ရောက်ခဲ့ပြီး အန္တရာယ်ပေးနိုင်တဲ့ အနေအထားမှာရှိခဲ့တာပါ။ ဒါပေမယ့်လည်း ဂိုးအဖြစ်တော့ ပြောင်းလဲနိုင်ခဲ့ခြင်းမရှိလို့ နှမျောစရာကောင်းတဲ့ ပေးပို့မှုဖြစ်ခဲ့ပါတယ်။
ဖာနန်ဒက်စ်ဟာ ဘန်လေနဲ့ပွဲမှာလည်း အာရွန်ဝမ်ဘစ်စ်ကာဆီကို လှပတဲ့ပေးပို့ဟန်နဲ့ ဘောလုံးအရောက်ပေးနိုင်ခဲ့ပြီး အဲဒီကတဆင့် ဘစ်စ်ကာက အဲရစ်ဆန်အတွက် ဖန်တီးပေးနိုင်ခဲ့ပါတယ်။ ကမ္ဘာ့ဖလားမှာလည်း ပေါ်တူဂီအတွက် ခြေစွမ်းပြခဲ့တဲ့ ဖာနန်ဒက်စ်က ပုံစံကောင်းကို ကလပ်အသင်းမှာလည်း ဆက်လက်ထိန်းသိမ်းထားနိုင်ခဲ့ပြီး ၂ပွဲဆက်နိုင်ပွဲရရှိအောင် ကူညီပေးနိုင်ခဲ့ပါတယ်။
ဒီရာသီမှာ ဖာနန်ဒက်စ်က ပြိုင်ပွဲစုံသွင်းဂိုး ၃ ဂိုးနဲ့ ဖန်တီးမှု ၃ ကြိမ်သာ ပြုလုပ်ပေးထားနိုင်ပေမယ့် သူ့ရဲ့ အသင်းကစားကွက်မှာ ပါဝင်မှုက ကြီးကြီးမားမားပတ်သက်မှုရှိနေခဲ့ပါတယ်။ ယူနိုက်တက်ကွင်းလယ်နဲ့ တိုက်စစ်က သူ့ရဲ့ ခြေစွမ်းအတက်အကျပေါ်မှာတောင် မူတည်နေတယ်လို့ ပြောဆိုရမှာဖြစ်ပြီး တန်ဟက်ဂျ်အတွက်တော့ အမာခံကစားသမားအဖြစ်နဲ့ သူက ရှိနေခဲ့ပါတယ်။