ရုပ်ရှင်လောကသားတွေရဲ့ သားသမီးတွေအတွက် ကျောင်းသုံးဗလာစာအုပ်တွေနဲ့ မြန်မာအမျိုးသမီးများ ဖွံ့ဖြိုးတိုးတက်ရေးအသင်းမှာ သွားလှူခဲ့တာပါ။ ပြေတီဦး ဖောင်ဒေးရှင်းနဲ့အတူ လှူခဲ့တာပါ။

သရုပ်ဆောင် ပြေတီဦးက ဒီနေ့မှာ သူ့ရဲ့ ပညာရေးဖောင်ဒေးရှင်းနဲ့အတူ အလှူလေးတွေ လုပ်ဖြစ်ခဲ့ပါတယ်။ ပထမဆုံးအနေနဲ့ ရုပ်ရှင်အစည်းအရုံးမှာ ရုပ်ရှင်လောကသားတွေရဲ့ သားသမီးတွေ ကျောင်းအပ်တဲ့အခါမှာ အထောက်အပံ့လေး ဖြစ်အောင် ကျောင်းသုံးဗလာစာအုပ် (၃၀၀)လှူဒါန်းခဲ့တယ်လို့ ဆိုပါတယ်။ ထို့အပြင် မြန်မာအမျိုးသမီးများ ဖွံ့ဖြိုးတိုးတက်ရေးအသင်းမှာ လည်း သွားရောက်လှူဒါန်းခဲ့ပါသေးတယ်။

Photo : ပြေတီဦး

နောက်တစ်ခါကျရင်လည်း အဲဒီနေရာလေးကို မိသားစုနဲ့အတူ သွားလှူဖို့ စိတ်လေး ဖြစ်မိတယ်လို့ ဆိုပါတယ်။

“နောက်တခါ မိသားစုနဲ့အတူ သွားလှူဦးမယ်ဆိုတဲ့စိတ်ဖြစ်မိသလို အမျိုးတို့ကိုလည်း ကြုံကြိုက်တဲ့အခါ သွားလှူဒါန်းပေးကြပါလို့လည်း တိုက်တွန်းချင်ပါတယ်” ဆိုပြီး ဆက်လက်ပြောထားပါတယ်။

ပြေတီဦးဟာ သူ့ရဲ့ ပညာရေး ဖောင်ဒေးရှင်းကို ငွေကျပ်(၁၀)သန်းနဲ့ စတင်တည်ထောင်ခဲ့တာဖြစ်တယ်လို့ သိရပါတယ်။ နှစ်စဉ်ဆေးတက္ကသိုလ်၊ စက်မှုတက္ကသိုလ် အတွက် ကျောင်းသားကျောင်းသူများကို ထောက်ပံ့ကြေး ပေးလျက်ရှိပါတယ်။ ဒါ့အပြင် ထိုဖောင်ဒေးရှင်းနဲ့အတူ အလှူအတန်းတွေလည်း ပြုလုပ်လျက်ရှိပါတယ်။

Photo : ပြေတီဦး

ပြေတီဦး (Pyay Ti Oo) ဟာ ၁၉၇၈ခုနှစ် နိုဝင်ဘာ(၃၀)ရက်နေ့မှာ မွေးဖွားခဲ့တာဖြစ်ပြီး သားသမီးသုံးယောက်ထဲမှာ အလတ်တစ်ယောက် ဖြစ်ပါတယ်။ ပြေတီဦးဟာ စက်မှုတက္ကသိုလ်ကျောင်းသားဘဝထဲက သရုပ်ဆောင်ပညာကို ဝါသနာပါခဲ့သူပါ။ ၁၉၉၈ ခုနှစ်လောက်မှာ မြန်မာ့အသံနဲ့ ရုပ်မြင်သံကြား (MRTV) က ပြုလုပ်တဲ့ သရုပ်ဆောင်ရွေးချယ်ပွဲ အစီအစဉ်မှာ ရွေးချယ်ခံခဲ့ရပြီးတဲ့နောက် MRTV က ထုတ်လွှင့်တဲ့ ဇာတ်လမ်းတိုတွေနဲ့ မြန်မာစာမြန်မာစကား အစီအစဉ်မှာ ပါဝင်ခွင့်ရခဲ့ပါတယ်။

အဲဒီနောက် သူ့ကို ၂၀၀၀ ပြည့်နှစ်များ အလယ်လောက်မှ ဗီဒီယိုဇာတ်ကားတွေမှာ ခေါင်းဆောင်မင်းသားအဖြစ် ပြန်လည် မြင်တွေ့ရကာ ပရိသတ်ရဲ့ နှစ်ခြိုက်လက်ခံမှုကို ရရှိလာခဲ့ပါတယ်။ ပြေတီဦးဟာ ၂၀၁၀ ခုနှစ် မှာ ”အာဒံရယ်၊ ဧဝရယ်၊ ဒဿရယ်” ၊ ၂၀၁၂ ခုနှစ်မှာ “လက်ပံ”၊ ၂၀၁၃ ခုနှစ်မှာ ”နင်စေရင်”၊ ၂၀၁၄ ခုနှစ်” မှာ နှလုံးသားဖြင့်ပြုလုပ်သည်” စတဲ့ ရုပ်ရှင်ဇာတ်ကားတွေနဲ့ အကောင်းဆုံး အမျိုးသားဇာတ်ဆောင်ဆုကို ရရှိခဲ့သူ တစ်ဦးဖြစ်ပါတယ်။