သေဆုံးသူအရေအတွက် တိုးလာနိုင်ကြောင်းနဲ့ အဆောက်အအုံများ ပြိုကျခဲ့စဥ် လူအများအပြား သေဆုံးခဲ့ကြောင်း အာဏာပိုင်တွေက ဆိုပါတယ်

ပါကစ္စတန်နိုင်ငံ ဘလူချီစတန်ပြည်နယ်မှာ ယနေ့ (အောက်တိုဘာ ၇ ရက်) မနက်အစောပိုင်းက ငလျင်လှုပ်ခတ်ခဲ့ရာ အနည်းဆုံး လူ ၂၀ ဦး သေဆုံးခဲ့ကြောင်း အစိုးရတာဝန်ရှိသူတွေက ပြောပါတယ်။

ငလျင်ကြောင့် သေဆုံးသူအရေအတွက် တိုးမြင့်လာနိုင်ကြောင်းနဲ့ အဆောက်အအုံများ ပြိုကျခဲ့စဥ် လူအများအပြား သေဆုံးခဲ့ကြောင်း အာဏာပိုင်တွေက ဆိုပါတယ်။ သေဆုံးသူတွေအနက် အများစုဟာ အမျိုးသမီးနဲ့ ကလေးငယ်တွေဖြစ်ကြောင်း Reuters သတင်းက ဖော်ပြပါတယ်။ US Geological Survey က ထုတ်ပြန်ထားမှုအရ ငလျင်ရဲ့ပြင်းအားဟာ ရစ်ချ်တာစကေး ၅.၉ ဖြစ်ပြီး မြေအောက်အနက် ၅.၆ မိုင်မှာ လှုပ်ခတ်ခဲ့ကြောင်း သိရပါတယ်။



(Photo: EPA)

နောက်ဆက်တွဲငလျင်တွေကြောင့်လည်း နောက်ထပ် ပျက်စီးမှုတွေ ဖြစ်ပေါ်နိုင်တယ်လို့ ဆိုပါတယ်။ ငလျင်လှုပ်ပြီးနောက် ကယ်ဆယ်ရေးလုပ်ငန်းများ လုပ်ဆောင်နေပါတယ်။ ဒေသဆိုင်ရာ တာဝန်ရှိသူတွေက BBC Urdu သတင်းဌာနကို ပြောကြားမှုအရ ငလျင်လှုပ်မှုအတွင်း အနည်းဆုံး လူ ၁၅၀ ဒဏ်ရာရခဲ့တယ်လို့ ယူဆကြောင်းနဲ့ ဒဏ်ရာပြင်းထန်သူတွေကို ဆေးရုံသို့ အလျင်အမြန် ပို့ဆောင်ခဲ့ကြောင်း သိရပါတယ်။

ဒဏ်ရာရသူအချို့ကိုတော့ လူနာထမ်းစင်တွေပေါ်မှာတင်ပြီး မိုဘိုင်းဖုန်းဓာတ်မီးတွေသုံးကာ ကုသပေးနေခဲ့ကြောင်း Reuters က ဖော်ပြပါတယ်။ ငလျင်လှုပ်မှုကြောင့် ရွှံ့နဲ့ဆောက်လုပ်ထားတဲ့ နေအိမ် ၁၀၀ ကျော် ပြိုကျခဲ့ပြီး အဆောက်အအုံ အများအပြား ပျက်စီးမှုဖြစ်ပေါ်ခဲ့ကာ လူဦးရေ ရာပေါင်းများစွာ အိုးအိမ်မဲ့ဖြစ်ခဲ့ကြကြောင်း တာဝန်ရှိသူတစ်ဦးက Reuters ကို ပြောပါတယ်။

(Photo: EPA)

ငလျင်လှုပ်ပြီးနောက် ဘလူချီစတန်ပြည်နယ်မြို့တော် Quetta မှာ မြို့ခံတွေ လမ်းမများပေါ် ထွက်နေခဲ့ကြတဲ့ ဓာတ်ပုံတွေကို ဆိုရှယ်မီဒီယာမှာ တွေ့ရပါတယ်။ ငလျင်ကြောင့် Harnai ခရိုင်မှာ အပျက်အစီး အများအပြား ဖြစ်ပေါ်ခဲ့ကြောင်း အစိုးရတာဝန်ရှိသူတွေက ပြောပါတယ်။ Harnai ခရိုင်ဟာ ပြည်နယ်မြို့တော် Quetta ရဲ့ အရှေ့ဘက်မှာတည်ရှိပြီး ငလျင်လှုပ်မှုများအတွင်း ပြိုကျနိုင်တဲ့ ကျောက်မီးသွေးတွင်း အများအပြားရှိနေပါတယ်။



ဆက်စပ်အကြောင်းအရာများ

Share

က္က