ဆွေစဉ်မျိုးဆက်ထိန်းသိမ်းထားတဲ့ဆိုင်ကလေး 

ဆိုင်တည်ထောင်သူ ဦးမောင်သိန်းမရှိတော့ပေမယ့်လည်း မျိုးရိုးစဉ်ဆက် ဆီချက်ဆိုင် ဆက်လက်ဖွင့်နေကြတာဖြစ်ပါတယ်။ လက်ရှိ ၃လမ်းပေါ်က ဆိုင်ကလေးကိုတော့ ဦးမောင်သိန်းရဲ့ သမီးကြီးက ဖွင့်လှစ်ထားတာဖြစ်ပါတယ်။ ပေါင်းတည်မြို့ မှတ်တိုင်လမ်း ၊ ဘုရားလေးလမ်းမှာ ဆိုင်တစ်ဆိုင် ၊ တာပွန်လမ်းကိုးလမ်းထိပ်မှာတစ်ဆိုင် ၊  အင်းမမှာလည်း တစ်ဆိုင် ဆိုင်ခွဲတွေဖွင့်လှစ်ထားတဲ့ ဦးမောင်သိန်းဆီချက်ဆိုင်ပါ။ 

ထူးကဲတဲ့ ဆီချက်အရသာ 

တခြားဆီချက်ဆိုင်တွေနဲ့မတူ ထူးခြားတဲ့ ဆီချက်အရသာကတော့ မိဘဘိုးဘွားလက်ထက်လက်ဆင့်ကမ်းလာကြတဲ့ အရသာအစပ်အဟပ်ကြောင့် လို့ သိရပါတယ်။ ဆီချက်ထဲ ထည့်တဲ့ ငံပြာရည်ကို ကိုယ်တိုင် အရသာစပ်ထားတာက ဦးမောင်သိန်းဆီချက်ဆိုင်ရဲ့ ထူးခြားမှုတစ်ခုလို့ ဆိုင်ပိုင်ရှင်က ပြောပါတယ်။ 

ပေါင်းတည်မြို့ရဲ့ နာမည်ကျော် ဦးမောင်သိန်းဆီချက် 

“ဆီချက်ကိုတစ်ထောင်ပဲရောင်းတာ ကျွန်တော်တို့က ။ လူပြောများတာတော့ ကျွန်တော်တို့ ဒီလမ်းထဲမှာလည်း ဒီတစ်ဆိုင်ပဲ ရောင်းအားအကောင်းဆုံးပဲ။ သူများဆိုင်တွေလည်း ဆီချက်ရောင်းတယ် ။ ဒါပေမယ့် အဲဒီဆိုင်တွေ အစားမများဘူး။ ကျွန်တော်တို့ဆိုင်ပဲ များတယ်။ ရွာကလူတွေ ဘဏ်ထုတ်တဲ့ ရက်မျိုးတွေ၊ လစာထုတ်ရက်တွေဆို ရောင်းအားကောင်းတယ်။ တစ်သိန်း  ၊ တစ်သိန်းခွဲ အဲလောက်ကတော့ ရောင်းရပါတယ်” လို့ ဦးမောင်သိန်း ဆီချက်ပိုင်ရှင် ကိုကျော်မိုးသွင်က ပြောပါတယ်။ 

အနုပညာရှင်များလည်း တနှစ်တခြိုက်လာရောက်စားသုံးကြ 

ဦးမောင်သိန်းဆိုင်ကို အနုပညာရှင်တော်တော်များများက ဟိုးအရင်ကတည်းက တနှစ်တခြိုက်လာရောက် စားသုံးကြတယ်လို့လည်း သိရပါတယ်။ 

“ထွန်းအိန္ဒြာဗိုလ်တို့ ၊ တင့်တင့်ထွန်းတို့ဆို စတိတ်ရှိုးဆိုရင်း လာလာစားကြတယ်။ ရဲကိုကိုတို့ နေထက်လင်းတို့ဆို အနုပညာဘောလုံးအသင်း က ချစ်ကြည်ရေးဖိတ်ရင် ဒီကို လာလာစားကြတယ်။ ကိုချစ်မိုးတို့ ဆိုရင်လည်းပဲ မိသားစုလိုကို ဖြစ်နေတော့ အမြဲတမ်းဒီမှာပဲနေတယ်။ ဒီမှာပဲ ဆီချက်ဝင်စားတယ်။  အနုပညာသမားတွေကတော့ ပေါင်းတည်စွယ်တော်မှာ အဆိုတော်ငှားတယ်ဆိုရင်လည်းပဲ တော်တော်များများ ဒီကိုပဲ ဆီချက်လာစားကြတယ်” 

ပေါင်းတည်မြို့ကို အလည်တစ်ခေါက်ရောက်ခဲ့ပြီဆိုရင်တော့ ပေါင်းတည်မြို့ နာမည်ကြီးဆီချက်ဆိုင်ကလေးဖြစ်တဲ့ ဦးမောင်သိန်းဆီချက်ဆိုင်က ဆီချက်အရသာလေးကို ဝင်ရောက်မြည်းစမ်းကြည့်ကြဖို့ တိုက်တွန်းလိုက်ပါရစေ။