ယူနိုက်တက်ပရိသတ်တွေဟာ ချဲလ်ဆီးနည်းပြဟောင်း ဂရေဟမ်ပေါ်တာနဲ့ သတင်းထွက်ပေါ်နေတဲ့အပေါ် တုန်လှုပ်ချောက်ချားနေကြကြောင်း သိရှိရပါတယ်။ ပေါ်တာဟာ ချဲလ်ဆီးနည်းပြရာထူးကနေ အထုတ်ခံထားရသူပါ။
ပြီးခဲ့တဲ့ ဧပြီလကတည်းက အသင်းလက်မဲ့ဖြစ်နေတဲ့ ပေါ်တာက စတုတ်စီးတီးရဲ့ ကမ်းလှမ်းမှုကို ရရှိခဲ့ပေမယ့် ငြင်းဆန်ခဲ့ပါသေးတယ်။ လက်ရှိမှာတော့ ယူနိုက်တက်ရဲ့ ပိုင်ရှင်အပြောင်းအလဲအကြားမှာ ပေါ်တာကို နည်းပြသစ်အဖြစ် ခန့်အပ်ဖို့ သတင်းထွက်ပေါ်နေပါတယ်။
ယူနိုက်တက်ရဲ့ တစ်စိတ်တစ်ပိုင်း ပိုင်ရှင်သစ်ဖြစ်လာမယ့် ဆာဂျင်မီရက်ကလစ်ဖ်ဟာ ပေါ်တာရဲ့ ပရိသတ်တစ်ယောက်ဖြစ်ပါတယ်။ အဲ့ဒါကြောင့်လည်း တန်ဟက်ခ်နဲ့သာ လမ်းခွဲခဲ့ရင် ပေါ်တာက ယူနိုက်တက်တို့ ခန့်အပ်ဖွယ်ရှိတဲ့ နည်းပြတစ်ယောက်လည်း ဖြစ်ပါတယ်။
ယူနိုက်တက်ပရိသတ်တွေကတော့ “ဂရေဟမ်ပေါ်တာက ယူနိုက်တက်ကို လာမယ်တဲ့လား? မလုပ်ပါနဲ့ဗျာ။ ကျေးဇူးတင်ပါတယ်” “ဂရေဟမ်ပေါ်တာတဲ့လား။ ငါ့မှာ ပြောစရာစကားတောင် မရှိတော့ပါဘူး” “ရက်ကလစ်ဖ်ရေ... ခင်ဗျား ဘာတွေလျှောက်လုပ်နေတာလဲ” လို့ အသီးသီးမှတ်ချက်ပေးခဲ့ပါတယ်။
ယူနိုက်တက်ရဲ့ အရေးပါတဲ့ ပိုင်ရှင်သစ်ဖြစ်လာမယ့် ရက်ကလစ်ဖ်ဟာ ပေါ်တာရဲ့ အမာခံပရိသတ်တစ်ယောက်ဖြစ်ပါတယ်။ ရက်ကလစ်ဖ်ဟာ ပြင်သစ်ကလပ် နိုက်စ်မှာရှိနေကတည်းက ပေါ်တာကို ခေါ်ယူဖို့ ကြိုးစားခဲ့ဖူးကြောင်း သိရှိရပါတယ်။