ယူနိုက်တက်က အာဆင်နယ်ထက် တစ်မှတ်အသာနဲ့ တစ်ပွဲပိုကန်ထားပြီး အဆင့် (၄) နေရာကို ယာယီတက်လှမ်းသွားခဲ့ပါတယ်။

ဒဏ်ရာရကစားသမားတွေကလွဲလို့ နှစ်သင်းစလုံးမှာ လူစုံပါဝင်ခဲ့ပြီး ယူနိုက်တက်မှာ မာရှယ် နဲ့ ရက်ရှ်ဖို့ဒ်တို့ ပါဝင်လာခဲ့ပြီး မာတာနဲ့ တိုက်စစ်ကို ဆိုးလ်ရှားက တွဲဖက်ပေးခဲ့ပါတယ်။ ဝက်ဖို့ဒ်ကတော့ ဒီနီး နဲ့ ဒယ်လိုဖူတိုက်စစ်အတွဲကို ပွဲထုတ်ခဲ့ပြီး အဝေးကွင်းမှာ ရင်ဆိုင်ခဲ့ပါတယ်။ ပွဲစတာနဲ့ ဝက်ဖို့ဒ်က တိုက်စစ်ကို အားပြုကစားခဲ့ပြီး ကစားကွက်ပိုင်းအရလည်း အသာစီးရခဲ့ပါတယ်။

ယူနိုက်တက်ကတော့ ထင်သလောက်မဟုတ်ခဲ့ပဲ ကစားကွက်အားနည်းခဲ့သလို အချိတ်အဆက်ပိုင်းမှာလည်း လွဲချော်နေမှုတွေ ရှိခဲ့ပြီး ဝက်ဖို့ဒ်ရဲ့ တိုက်စစ်ဆင်မှုတွေကိုပဲ ဖျက်ထုတ်နေခဲ့ရပါတယ်။ ဒီဂီယာ နည်းနည်းအလုပ်ရှုပ်ခဲ့တဲ့ ပွဲဖြစ်ပြီး ဝက်ဖို့ဒ်က အဝေးကန်ချက်တွေ၊ ဖြတ်တင်ဘောတွေ အများအပြားကို ပြုလုပ်သွားနိုင်ခဲ့ပါတယ်။

ဒုတိယပိုင်းမှာလည်း ဝက်ဖို့ဒ်ကပဲ ကစားပုံကောင်းကောင်းနဲ့ အသာစီးအနည်းငယ်ရရှိခဲ့ပြီးတော့ ယူနိုက်တက်ကို ဖိအားပေးခဲ့ပါတယ်။ ဒါကြောင့် ဆိုးလ်ရှားက သူ့အသင်းကို လူစားလဲလှယ်မှုတွေ ပြုလုပ်ခဲ့ပြီး ပြင်ဆင်ခဲ့ရပါတယ်။ ဝက်ဖို့ဒ်အနေနဲ့ သရေကျနိုင်တဲ့အထိ ကစားပုံကောင်းခဲ့ပေမယ့် သေချာတဲ့ ဖန်တီးပေးမှု၊ အဆုံးသတ်မှုတွေ မရှိခဲ့ပါဘူး။

(၇၁)မိနစ်မှာတော့ လူကျွံအနေအထားကနေ မာရှယ်က ယူနိုက်တက်အတွက် အနိုင်သေချာစေမယ့် ဂိုးကို သွင်းယူပေးခဲ့ပါတယ်။ ပါရဲရား ပေးပို့မှုကို ဖော်စတာ ကာကွယ်ခဲ့ပေမယ့် ဘောလုံးက လွတ်ထွက်လာခဲ့ပြီး လဲကျနေခဲ့တဲ့ မာရှယ်က ကန်သွင်းယူသွားခဲ့တာပါ။ ပွဲချိန်မိနစ် (၉၀)မှာ ဝက်ဖို့ဒ်တို့ လှပတဲ့တွဲလုံးကတဆင့် ချေပဂိုးတစ်ဂိုးရခဲ့ပြီး ဒူကူရီက အကောင်းဆုံးအဆုံးသတ်သွားခဲ့ပါတယ်။ ပွဲအပြီးမှာ ယူနိုက်တက်က (၂-၁) နဲ့ပဲ အနိုင်ယူသွားခဲ့ပါတယ်။ ဒီအတွက်ကြောင့် အာဆင်နယ်မကစားရသေးခင်မှာ ယူနိုက်တက်က တစ်မှတ်အသာနဲ့ တစ်ပွဲပိုကန်ထားပြီး အဆင့် (၄) နေရာကို ယာယီတက်လှမ်းသွားခဲ့ပါတယ်။