လူပဲကျွံနေတာမဟုတ်ဘူး၊ ပြစ်ဒဏ်ဘောပါဖြစ်ခဲ့တာလို့ ဆိုးလ်ရှားက ဝေဖန်ခဲ့တာပါ။

ယူနိုက်တက်နည်းပြ ဆိုးလ်ရှားက ဗီလာကို ၀-၁ ဂိုးနဲ့ ရှုံးနိမ့်ခဲ့တဲ့ ပရီးမီးယားလိဂ် အိမ်ကွင်းပွဲအပြီး သတင်းစာရှင်းလင်းပွဲမှာ ဗီလာရရှိသွားတဲ့ဂိုးအပေါ် ဝေဖန်ပြောကြားလိုက်ပါတယ်။

ဒီပွဲရဲ့ ပွဲကစားချိန် (၈၉) မိနစ်မှာ ဗီလာနောက်ခံလူ ဟောက်စ်က အသင်းအတွက် တစ်လုံးတည်းသော အနိုင်ဂိုးကို သွင်းယူပေးနိုင်ခဲ့ပြီး ဒီသွင်းဂိုးကြောင့်လည်း ယူနိုက်တက်တို့ ဒီရာသီ ပထမဆုံး ပရီးမီးယားလိဂ်နဲ့အိမ်ကွင်းရှုံးပွဲကို ရင်ဆိုင်ခဲ့ရတာပါ။


ပွဲအပြီး သတင်းစာရှင်းလင်းပွဲမှာ ယူနိုက်တက်နည်းပြ ဆိုးလ်ရှားက “ကောင်းမွန်တဲ့ဂိုးတစ်ဂိုးက ကျွန်တော့်အသင်းဘက်ကို သွင်းသွားတယ်ဆိုရင် လက်ခံနိုင်ပါတယ်။ ဒါပေမယ့် ဒါက လူကျွံဘောပါ။ ဟောက်စ်က ဘောလုံးကိုခေါင်းနဲ့တိုက်တဲ့အခါမှာလည်း ဒီဂီယာကို ထိခိုက်ခဲ့ပါသေးတယ်”


“ဒီလိုဂိုးမျိုး ဘယ်လိုရသွားတာလဲ။ လက်စတာတုန်းကဆိုရင် ဒီလိုဂိုးမျိုးကို ခွင့်မပြုခဲ့ပါဘူး။ ဒိုင်လူကြီးတွေနဲ့ပတ်သက်လို့ တည်ငြိမ်တဲ့ တသမတ်တည်းရှိမှုကို မမြင်တွေ့ရဘဲ အခု ဒီတစ်ခါဖြစ်ရပ်ဆိုရင် လုံးဝကို အရှင်းကြီး လူကျွံနေတာပါ” လို့ ပြစ်တင်ဝေဖန်သွားခဲ့ပါတယ်။

ဆိုးလ်ရှားဟာ ဗီလာနဲ့ပွဲမတိုင်ခင် သတင်းစာရှင်းလင်းပွဲမှာ သူတို့အသင်း ဒီရာသီ ပင်နယ်တီမရတာဟာ လီဗာပူးနည်းပြ ယာဂင်ကလော့ပ်ရဲ့ ဖိအားပေးမှုကြောင့်ဖြစ်တယ်လို့ သွယ်ဝိုက်ဝေဖန်ခဲ့ပါသေးတယ်။ ဒီပွဲမှာတော့ ယူနိုက်တက်တို့ ပွဲကစားချိန် နောက်ဆုံးမိနစ်မှာ ပင်နယ်တီကန်ခွင့်ရရှိခဲ့ပေမယ့် ဒီပင်နယ်တီကို ဘရူနိုဖာနန်ဒက်စ်က မိုးပေါ်ထောင်ကန်ခဲ့တာကြောင့်လည်း ချေပဂိုးမရဘဲ ရှုံးနိမ်ခဲ့ရတာပါ။


ယူနိုက်တက်ဟာ နောက်ဆုံးကစားခဲ့တဲ့ ပြိုင်ပွဲစုံ (၄) ပွဲမှာ (၃) ပွဲအထိ ရှုံးနိမ့်ခဲ့တာဖြစ်ပြီး လာမယ့်ဗုဒ္ဓဟူးနေ့မှာလည်း ဗီလာရီးရဲယ်နဲ့ ချန်ပီယံလိဂ်အုပ်စုပွဲအဖြစ် အိမ်ကွင်းမှာ ဧည့်ခံကစားသွားရဦးမှာဖြစ်ပါတယ်။ 

Share

က္က