မန်ချက်စတာယူနိုက်တက် တိုက်စစ်မှူး မားကပ်စ်ရက်ရှ်ဖို့ဒ်ဟာ မန်ချက်စတာစီးတီးအသင်းမှ ဆာဂျီယိုအဂူရိုဟာ ပရီးမီးယားလိဂ်ရဲ့အပြည့်စုံဆုံး တိုက်စစ်မှူးလို့ ပြောကြားခဲ့ပါတယ်။
အသက် ၂၁ နှစ်အရွယ်ရှိပြီဖြစ်တဲ့ အင်္ဂလန်လက်ရွေးစင် တိုက်စစ်မှူး မားကပ်စ်ရက်ရှ်ဖို့ဒ်ဟာ ပရီးမီးယားလိဂ်ရဲ့ကြောက်မက်ဖွယ်အကောင်းဆုံးတိုက်စစ်မှူးတွေထဲတစ်ဦး ဖြစ်လာသူပါ။ ရက်ရှ်ဖို့ဒ်ဟာ ယခုရာသီမှာ ပွဲ ၂၀ ကစားထားပြီး သွင်းဂိုး ၉ ဂိုးနဲ့ ဂိုးဖန်တီးမှု ၆ ကြိမ်ပြုလုပ်ထားသူလည်း ဖြစ်ပါတယ်။
ဒါ့အပြင် တော့တင်ဟမ်ဟော့စပါးတိုက်စစ်မှူး ဟယ်ရီကိန်း၊ အာဆင်နယ်တိုက်စစ်မှူး အူဘာမီယန်းတို့ကလည်း အတုယူရဆုံး ကစားသမားတွေဖြစ်တယ်လို့ ရက်ရှ်ဖို့ဒ်က ပြောကြားခဲ့ပါတယ်။ ရက်ရှ်ဖို့ဒ်က ၎င်းအတွက် အဲဒီကစားသမား ၃ ဦးထဲမှာ မန်ချက်စတာစီးတီးတိုက်စစ်မှူး အဂူရိုဟာ ပြီးပြည့်စုံဆုံး ကစားသမားဖြစ်တယ်လို့ ပြောကြားခဲ့ပါတယ်။
“ကျွန်တော့်အထင် ပြီးပြည့်စုံဆုံး အထောင်တိုက်စစ်မှူးက ဆာဂျီယိုအဂူရိုဖြစ်ကောင်းဖြစ်ပါလိမ့်မယ်။ ဆိုးရွားတဲ့နေ့မှာတောင် သူက ခင်ဗျားကို ၃ ဂိုး ဒါမှမဟုတ် ၄ ဂိုး သွင်းယူနိုင်ပါတယ်။ အဲဒါက အထောင်တိုက်စစ်မှူးရဲ့အရည်အသွေးဖြစ်ပြီး ကျွန်တော့်အတွက် အဲဒါကို ကာလရှည် ပြုလုပ်ချင်နေတဲ့အရာပါ။ ခင်ဗျား ကောင်းမွန်တဲ့ပွဲစဉ်တစ်ခု မရတဲ့အခါမှာဆိုပေမယ့် ခင်ဗျား ဂိုးတော့ သွင်းယူနိုင်ပါသေးတယ်။ အဲဒါက အထောင်တိုက်စစ်မှူးရဲ့ ကိုယ်ပိုင် စွမ်းရည်ပါပဲ။ ဟယ်ရီကိန်းလည်းပဲ သူ့ရဲ့ရွေ့လျားမှု၊ နေရာယူတတ်မှုကြောင့် အရမ်းတော်တဲ့ကစားသမားပါ။ အူဘာမီယန်းကိုလည်း ကျွန်တော် နှစ်သက်ပါတယ်”လို့ GQ ကို ပြောကြားခဲ့ပါတယ်။