COVID-19 ပိုးတွေ့ရှိထားသူ မလေးရှားပြန် လူနာ ၉ ဦးအနက် ၈ ဦးဟာ မေလ ၁၁ ရက်နေ့က MH742 လေယာဉ်နဲ့ ပြန်လာခဲ့တဲ့သူတွေ ဖြစ်တယ်လို့ ကျန်းမာရေးနှင့်အားကစားဝန်ကြီးဌာန ပြောရေးဆိုခွင့်ရှိသူ ဒေါက်တာသန်းနိုင်စိုးက Duwun ကိုပြောပါတယ်။

မေလ ၁၆ ရက်ကနေ မေလ ၁၉ ရက်နေ့အထိ ထုတ်ပြန်ချက်အရ လူနာအမှတ် ၁၈၂ ၊ ၁၈၄ ကနေ ၁၉၁ အထိ စုစုပေါင်း လူနာ ၉ ဦးစလုံးဟာ မလေးရှားက ပြန်လာသူတွေ ဖြစ်ပြီး လူနာအမှတ် ၁၈၄ က လွဲရင် ကျန်တဲ့ ၈ ဦးစလုံးဟာ လေယာဉ်တစ်စီးတည်းက ဖြစ်တယ်လို့ ဆိုပါတယ်။

“ မလေးရှားပြန် ပိုးတွေ့လူနာ ၉ ယောက်မှာ ၈ ယောက်က ဆက်စပ်မှုရှိတယ်။ ၈ ယောက်က မေလ ၁၁ ရက်နေ့ ညနေ ၃ နာရီက MH742 လေယာဉ်နဲ့ ပြန်လာတဲ့သူတွေပါ။ လူနာအမှတ် ၁၈၄ ကတော့ မေလ ၈ ရက်က ပြန်လာတဲ့အသုတ်ထဲကပါ။” လို့ ဒေါက်တာသန်းနိုင်စိုးက ပြောပါတယ်။

လက်ရှိပိုးတွေ့ထားသူ မလေးရှားပြန်လူနာ ၉ ဦးကတော့ လူနာအမှတ် ၁၈၂ (ချင်းပြည်နယ်၊ ထန်တလန်မြို့နယ်)၊ လူနာအမှတ် ၁၈၄ (ရန်ကုန်တိုင်း ပုဇွန်တောင်မြို့နယ်)၊ လူနာအမှတ် ၁၈၅ (တနင်္သာရီတိုင်း၊ တနင်္သာရီမြို့နယ်) ၊ လူနာအမှတ် ၁၈၆ ၊ ၁၈၇ (ကရင်ပြည်နယ်၊ ကော့ကရိတ်မြို့နယ်) ၊ လူနာအမှတ် ၁၈၈ (ရခိုင်ပြည်နယ်၊ သံတွဲမြို့နယ်)၊ လူနာအမှတ် ၁၉၀(ရခိုင်ပြည်နယ်၊တောင်ကုတ်မြို့နယ်)၊ လူနာအမှတ် ၁၈၉ (မကွေးတိုင်း၊ တောင်တွင်းကြီးမြို့နယ်)နဲ့ လူနာအမှတ် ၁၉၁( ဧရာဝတီတိုင်း၊ ပန်းတနော်မြို့နယ်) တို့က ဖြစ်တယ်လို့သိရပါတယ်။

အစိုးရက ပြည်ပရောက် မြန်မာနိုင်ငံသားတွေကို ပြန်လည်ခေါ်ယူရေးတွေပြုလုပ်ခဲ့ပြီးတဲ့နောက်

မေလ ၁၆ ရက်ကနေ မေလ ၂၀ ရက်နေ့မနက်အထိ ပြည်ပက ပြန်လာသူ ၁၁ ဦးမှာ ရောဂါပိုးတွေ့ရှိထားပြီး ၉ ဦးက မလေးရှားပြန်တွေ ဖြစ်ကာ ၂ ဦးကတော့ ယူအေအီးနိုင်ငံက ပြန်လာသူ ဖြစ်တယ်လို့ ကျန်းမာရေးနှင့်အားကစားဝန်ကြီးဌာန အချက်အလက်တွေ အရသိရပါတယ်။