ပြင်သစ်နိုင်ငံတစ်ဝှမ်းမှာ ဆယ်စုနှစ်များအတွင်း အကြီးဆုံး သပိတ်မှောက်ဆန္ဒပြမှုတွေ စတင်ခဲ့ရာ စာသင်ကျောင်းများပိတ်ထားရပြီး သယ်ယူပို့ဆောင်ရေး ဝန်ဆောင်မှုများ ရပ်ဆိုင်းခဲ့ရပါတယ်။
(Photo: AFP via Getty Images)
ပြင်သစ်သမ္မတ အီမန်နျူရယ်မက်ခရွန်ရဲ့ ပင်စင်လစာ အပြောင်းအလဲ အစီအစဥ်ကို ကန့်ကွက်ဆန္ဒပြမှုတွေ နိုင်ငံတစ်ဝှမ်းမှာ ယမန်နေ့ (ဒီဇင်ဘာ ၅ ရက်) က စတင်ခဲ့ကြတာဖြစ်ပါတယ်။ ရဲတပ်ဖွဲ့က ခန့်မှန်းမှုအရ ပြင်သစ်တစ်ဝှမ်း အကြမ်းဖျင်းအားဖြင့် သပိတ်မှောက်ဆန္ဒပြမှု ၂၅၀ ရှိနိုင်ပြီး ရက်နဲ့ချီကြာမြင့်နိုင်ကြောင်း သိရပါတယ်။
ပြင်သစ်နိုင်ငံတစ်ဝှမ်း သပိတ်မှောက်မှုမှာ မူလတန်းနဲ့ အထက်တန်းကျောင်း ဆရာ ဆရာမများ၊ သယ်ယူပို့ဆောင်ရေးဝန်ထမ်းများ၊ သူနာပြုများနဲ့ ဆေးရုံဝန်ထမ်းများ၊ ရှေ့နေများနဲ့ ရဲအရာရှိများ၊ အမှိုက်သိမ်းဝန်ထမ်းများ၊ စွမ်းအင်ဝန်ထမ်းများ၊ စာတိုက်ဝန်များ အပါအဝင် နယ်ပယ်အသီးအသီးက ပါဝင်ခဲ့ကြပါတယ်။
(Photo: EPA)
ပါရီမြို့မှာ လူဦးရေ ထောင်ပေါင်းများစွာ ပါဝင်ကြတဲ့ ဆန္ဒပြပွဲနှစ်ခု ပြုလုပ်ခဲ့ကြတယ်လို့ ဆိုပါတယ်။ ဆယ်စုနှစ်များအတွင်း အကြီးဆုံး သပိတ်မှောက်မှုကြောင့် မြန်နှုန်းမြင့် TGV ရထားခရီးစဥ်တွေ ၉၀ ရာခိုင်နှုန်းနဲ့ လေကြောင်းခရီးစဥ် ၃၀ ရာခိုင်နှုန်းကို ဖျက်သိမ်းထားရပါတယ်။ ပါရီ၊ မာဆေးလ်၊ မောင့်ပယ်လီယာနဲ့ စိန့်ဒန်းနစ်တို့မှာ ကြီးမားတဲ့ ဆန္ဒပြမှုတွေ ပြုလုပ်ကြကြောင်း သိရပါတယ်။
ပြင်သစ်နိုင်ငံတစ်ဝှမ်း ဆန္ဒပြပွဲတွေကို လူဦးရေ ၁ ဒသမ ၅ သန်း ပါဝင်ခဲ့ကြောင်း CGT အဖွဲ့အစည်းက ဆိုပါတယ်။ ပြည်ထဲရေးဝန်ကြီးဌာနကတော့ လူဦးရေ ၈၀၆,၀၀၀ ပါဝင်ခဲ့ကြတယ်လို့ ထုတ်ပြန်ခဲ့ပါတယ်။ ပါရီမြို့မှာသစံတော်ချိန် မွန်းလွဲ ၂ နာရီက စုရုံးချီတက် ဆန္ဒပြမှုတွေ စတင်ခဲ့ကြောင်း BBC သတင်းဌာနက ပြောပါတယ်။ ပါရီမြို့မှာ ဆန္ဒပြမှုများအတွင်း မွန်းလွဲ ၃ နာရီအထိ လူ ၂၅ ဦးကို ရဲတပ်ဖွဲ့က ထိန်းသိမ်းခဲ့ကြောင်း Le Parisien သတင်းစာက ဖော်ပြပါတယ်။
(Photo: AFP via Getty Images)
ပါရီမှာ ရဲတပ်ဖွဲ့နဲ့ ဆန္ဒပြသူတွေ ထိပ်တိုက်တွေ့ခဲ့ကြပြီး ရဲတပ်ဖွဲ့ မျက်ရည်ယိုဗုံးများဖြင့် ပစ်ခတ်လူစုခွဲမှုတွေ ရှိခဲ့ပါတယ်။ ပြင်သစ်သမ္မတ မက်ခရွန်ရဲ့ အစီအစဥ်အရ နိုင်ငံရဲ့ ပုဂ္ဂလိကနဲ့ အစိုးရပိုင် မတူညီတဲ့လုပ်ငန်း ၄၂ မျိုးမှာ ပင်စင်လစာ အပြောင်းအလဲတွေ ရှိလာမှာဖြစ်ပါတယ်။
(Photo: AFP via Getty Images)
ယခုအခါ အစိုးရက စီစဥ်နေခဲ့တဲ့ အစီအစဥ်သစ်အရ အသက် ၆၄ နှစ်မတိုင်မီ အငြိမ်းစားယူပါက ပိုနည်းတဲ့ ပင်စင်လစာတွေသာ ရရှိမယ်လို့ သိရပါတယ်။ ဥပမာအားဖြင့် အသက် ၆၃ နှစ်အရွယ်မှာ အငြိမ်းယူသူတစ်ဦးဟာ ပင်စင်လစာငွေ ၅ ရာခိုင်နှုန်း လျော့နည်းရရှိမှာ ဖြစ်ပါတယ်။
၁၉၉၅ ခုနှစ်မှာ ပြင်သစ်အစိုးရရဲ့ ပင်စင်လစာ အပြောင်းအလဲ အစီအစဥ်ကို နိုင်ငံတစ်တစ်ဝှမ်း အထွေထွေသပိတ်ဆင်နွှဲခဲ့ကြရာ သယ်ယူပို့ဆောင်ရေးစနစ် သီတင်းသုံးပတ်ကြာအထိ ရပ်ဆိုင်းသွားခဲ့ပြီး အားပေးထာက်ခံမှုများစွာ ရှိလာခဲ့ကာ အစိုးရက အစီအစဥ်ကို ပြင်ဆင်ခဲ့ရဖူးပါတယ်။ သမ္မတမက်ခရွန် အစိုးရအဖွဲ့က ၁၉၉၅ ခုနှစ်ကကဲ့သို့ ထပ်မဖြစ်အောင် ရှောင်လွှဲနိုင်ရန် မျှော်လင့်ထားတယ်လို့ သိရပါတယ်။