မနေ့က ကစားခဲ့တဲ့ Dallas နဲ့ အင်တာမိုင်ယာမီတို့ရဲ့ပွဲအပြီးမှာ Dallas ပရိသတ်တွေနဲ့ မက်ဆီရဲ့ ပရိသတ်တွေက တစ်ပွဲတစ်လမ်း နွှဲခဲ့ကြောင်း သိရှိရပါတယ်။ ဒီပွဲမှာ တစ်ဖက်လေးဂိုးစီ သရေကျခဲ့ပြီး မက်ဆီက အင်တာမိုင်ယာမီအတွက် သွင်းဂိုး နှစ်ဂိုးသွင်းယူပေးခဲ့ပါတယ်။
မက်ဆီဟာ အင်တာမိုင်ယာမီအတွက် ချေပဂိုးကို ပွဲကစားချိန်နှောင်းပိုင်းမှာ ပြစ်ဒဏ်ဘောကတစ်ဆင့် သွင်းယူပေးခဲ့ပြီး အင်တာမိုင်ယာမီအတွက် ကစားပေးခဲ့ပြီးတဲ့ပွဲတွေတိုင်းမှာ ဂိုးသွင်းနိုင်တဲ့ စံချိန်မှတ်တမ်းကို ရယူနိုင်ခဲ့ပါတယ်။ ဒါပေမယ့် ပွဲအပြီးမှာတော့ မက်ဆီရဲ့ပရိသတ်တွေနဲ့ ပြိုင်ဘက် Dallas ရဲ့ ပရိသတ်တွေအကြား ခိုက်ရန်ဖြစ်ပွားခဲ့ပြီး ပြဿနာဖြစ်ပွားခဲ့ပါတယ်။
မက်ဆီရဲ့နာမည်နဲ့ ကျောနံပါတ်ပါ အာဂျင်တီးနားဂျာစီကို ဝတ်ဆင်ထားတဲ့ မက်ဆီရဲ့ ပရိသတ်တစ်ယောက်နဲ့ အခြားသောပရိသတ်တစ်ယောက်က အကြီးအကျယ်ထိုးကြိတ်နေခဲ့ပြီး အခြားသောပရိသတ် နှစ်ယောက်ကလည်း ခိုက်ရန်ဖြစ်ပွားနေခဲ့တာကို မြင်တွေ့ခဲ့ရပါတယ်။
ဒီဖြစ်ရပ်မှာ ထိခိုက်ဒဏ်ရာရမှု အသေးစိတ်ကို သိရှိရခြင်းမရှိဘဲ ပရိသတ်တွေအကြားမှာတော့ မက်ဆီရဲ့ အမာခံပရိသတ် ပွဲကြမ်းနေခဲ့တာကိုသာ မြင်တွေ့ခဲ့ရတာဖြစ်ပါတယ်။ မက်ဆီ အင်တာမိုင်ယာမီကို ရောက်ရှိလာပြီးတဲ့နောက် မေဂျာလိဂ်မှာ မက်ဆီရဲ့ အမာခံပရိသတ်တွေ တိုးများလာခဲ့ပြီး အင်တာမိုင်ယာမီရဲ့ ပွဲစဉ်လက်မှတ်တွေကလည်း အချိန်တိုအတွင်း ကုန်သွားခဲ့ပါတယ်။
မက်ဆီကလည်း ပရိသတ်တွေရဲ့ အားပေးမှုနဲ့ ထိုက်တန်တဲ့ ခြေစွမ်းမျိုးကို ပြသနေဆဲဖြစ်ပြီး သူ့ရဲ့မေဂျာလိဂ် ကစားသမားဘဝကို အကောင်းဆုံးဖြတ်သန်းလျက်ရှိပါတယ်။