လက်ပစ်ဘောတွေကနေ ဂိုးတွေရယူလေ့ရှိတဲ့အတိုင်း ဒီပွဲမှာလည်း အင်ဒိုနီးရှားက အဖွင့်ဂိုးကို လက်ပစ်ဘောမြှောက်ပေးပြီး ခေါင်းတိုက်သွင်းယူကာ ရယူသွားခဲ့ပါတယ်။ ဒီနောက် ပထမပိုင်းပြီးခါနီးမှာတော့ ထိုင်းနောက်ခံလူနဲ့ ဘောလုံးအပြိုင်လုရင်း ကန်သွင်းခဲ့ရာမှာ ဂိုးရှေ့ထွက်လာတဲ့ ထိုင်းဂိုးသမားကိုကျော်ပြီး ဂိုးထဲဝင်သွားလို့ အင်ဒိုနီးရှားက နှစ်ဂိုးပြတ်နဲ့ ဦးဆောင်ခဲ့ပါတယ်။ 

ထိုင်းက ဒုတိယပိုင်းမှာ ကစားအားထပ်တင်ခဲ့ပြိး ချေပဂိုးတွေရဖို့ တော်ာတော်လေး ညှစ်ကန်ခဲ့ပါတယ်။ ထိုင်းဖိအားပေးမှုကို အင်ဒိုနီးရှားလည်း တော်တော်လေးသတိထားကာကွယ်နေခဲ့ရပြီး နောက်ထပ်ဂိုးရဖို့ကို သူတို့လည်း အားထုတ်ခဲ့ပါတယ်။ ဒါပေမယ့် ထောင့်ကန်ဘောကတဆင့် ထိုင်းက ချေပဂိုး ၁ ဂိုးပြန်သွင်းခဲ့ချိန်မှာ ပွဲက အရှိန်ပိုမြင့်သွားခဲ့ပါတယ်။ 

အချိန်ပိုမှာ ပွဲက ပိုပြင်းထန်ခဲ့ပြီး အင်ဒိုနီးရှားက ဦးဆောင်ဂိုးထပ်သွင်းပြီး ၃-၂ နဲ့ ဦးဆောင်ခဲ့ချိန်မှာ ရုန်းရင်းဆန်ခတ်မှုတွေဖြစ်ခဲ့ပြီး ကစားသမားတဦးစီ အနီကတ်ပြ ထုတ်ပယ်ခံခဲ့ရသလို အချိန်ပိုပထမပိုင်းပြီးခါနီးမှာ ထိုင်းကစားသမားတဦး ဖျက်ထုတ်ပုံကြမ်းလို့ နှစ်ဝါတနီနဲ့ ထပ်မံထုတ်ပယ်ခံရကာ ၉ ဦးတည်းနဲ့ ကစားခဲ့ရပါတယ်။ 

အင်ဒိုနီးရှားတို့ ကစားသမားပါ အသာစီးရသွားတဲ့နောက် နောက်ထပ် ၂ ဂိုးထပ်မံသွင်းယူခဲ့ကာ ၅-၂ နဲ့ ထိုင်းကို အနိုင်ရရှိခဲ့ပြီး ရွှေတံဆိပ်ဆွတ်ခူးနိုင်ခဲ့ပါတယ်။ ဒီရွှေတံဆိပ်ကတော့ အင်ဒိုနီးရှားအတွက် ဆီးဂိမ်းအမျိုးသားဘောလုံးပြိုင်ပွဲမှာ ၃ ခုမြောက်ရရှိခဲ့တာဖြစ်ပြီး ၁၉၉၁ နောက်ပိုင်းမှာ ပထမဆုံးအကြိမ် ပြန်လည်ဆွတ်ခူးနိုင်ခဲ့တာဖြစ်ပါတယ်။ ၃၂ နှစ်အတွင်း ပထမဆုံးအကြိမ် ပြန်လည်ရရှိခဲ့တာဖြစ်ပြီး နှစ်ပေါင်းများစွာက အိပ်မက်ကို အသက်သွင်းနိုင်ခဲ့တာဖြစ်ပါတယ်။