ပိုဆိုးတဲ့အချက်ကတော့ ဒီတိုက်ခိုက်မှုမှာ လိုင်ယွန်နည်းပြ ဖေဘီယိုဂရော့ဆိုပါ ပြင်းပြင်းထန်ထန် ဒဏ်ရာရရှိခဲ့တာပါ။ မာဆေးလ်ပရိသတ်တွေ ပစ်ပေါက်ခဲ့တဲ့ အရာဝတ္ထုတွေက ဂရော့ဆိုကို ထိမှန်ခဲ့ပြီး မျက်စိနားတစ်ဝိုက်ကို ထိခိုက်ခဲ့ကာ သွေးတွေအများအပြား ထွက်နေတာကိုလည်း ရုပ်သံမှတ်တမ်းတွေအရ မြင်တွေ့ခဲ့ရပါတယ်။

အဲ့ဒါကြောင့်လည်း ဂရော့ဆိုကို ဆေးကုသမှုပေးခဲ့ရပြီး နောက်ဆုံးမှာတော့ ပွဲကိုပါ ရွှေ့ဆိုင်းခဲ့ရတာပါ။ ကျောက်ခဲတွေ၊ အုတ်နီခဲတွေဟာ ကားမှန်တွေကို ထိခဲ့တာကြောင့် အဆိုပါမှန်ကွဲစတွေကတစ်ဆင့် ဂရော့ဆိုတစ်ယောက် ဒီလိုမျိုး ဒဏ်ရာရရှိခဲ့တာဖြစ်ပါတယ်။

ဒါ့အပြင် ဂရော့ဆိုရဲ့ လက်ထောက် လွန်ဂိုကလည်း မှန်ကွဲစတွေကြောင့် မျက်လုံးနားတစ်ဝိုက်မှာ ဒဏ်ရာရရှိခဲ့ပါတယ်။ လိုင်ယွန်ကစားသမားတွေဟာလည်း အသင်းဘတ်စ်ကားပေါ်ကနေ ဆင်းလာချိန်မှာ တုန်လှုပ်ချောက်ချားနေကြပြီး အဲ့ဒီနောက်မှာတော့ ပွဲကို ရွှေ့ဆိုင်းခဲ့ရသလို မာဆေးလ်ကိုလည်း အရေးယူသွားမယ်လို့ သိရှိရပါတယ်။