အောက်တိုဘာလ ၂၁ ရက်နေ့ကစပြီး အကျုံးဝင်မှာ ဖြစ်ပါတယ်။

ပြည်တွင်း လေကြောင်းလိုင်း ခရီးစဉ်အားလုံး အတွက် ခရီးသည်တိုင်း လေယာဉ်မထွက်ခွာမီ ၃၆ နာရီအတွင်း ဆေးစစ်ထားတဲ့ ကိုဗစ်မရှိကြောင်း ထောက်ခံချက်ပြသရမယ်လို့ သိရပါတယ်။



" ပြည်တွင်းခရီးစဉ်များအားလုံးအတွက် မနက်ဖန်ကစပြီး ခရီးသည်တွေမှာ လေယာဉ်မထွက်ခွာမီ ၃၆ နာရီအတွင်း RT-PCR ၊ RDT test kit တခုခုနဲ့ စစ်ဆေးထားတဲ့ ကိုဗစ် ကင်းစင်ကြောင်းထောက်ခံချက် ပါရှိရမယ်လို့ အကြောင်းကြားလာတာပေါ့။ အဲ့လိုမဟုတ်ရင် လေယာဉ်စီးခွင့်ရမှာမဟုတ်ဘူး။ " လို့ ပြည်တွင်းလေကြောင်းလိုင်းတစ်ခုမှ ဝန်ထမ်းတစ်ဦးက ဒီကနေ့ (အောက်တိုဘာလ ၂၀ ရက်) က ပြောပါတယ်။

အဲ့ဒီအစီအစဉ်က အောက်တိုဘာလ ၂၁ ရက်နေ့ကစပြီး အကျူံးဝင်မှာဖြစ်ကြောင်း ၊ ကိုဗစ်မရှိကြောင်း ဆေးစစ်ချက်ပြသနိုင်သူတွေကိုသာ လေယာဉ်လိုက်ပါစီးနင်းခွင့်ပြုဖို့ လေကြောင်းလိုင်းတွေဆီကို ပို့ဆောင်ရေးနှင့်ဆက်သွယ်ရေးဝန်ကြီးဌာန၊လေကြောင်းပို့ဆောင်ရေးညွန်ကြားမှုဦးစီး ဌာနက အကြောင်းကြားလာတာဖြစ်တယ်လို့ သိရပါတယ်။

ဓာတ်ပုံ - Yangon International Airport

" ကိုဗစ်ကာကွယ်ဆေးထိုးထားလည်းမရပါဘူး။ ဆေးစစ်ချက်ပါကိုပါရပါမယ်။ မပါရင်‌ လေယာဉ်စီးလို့မရပါဘူး။ အဲဒီလိုအသိပေးလာပါတယ် " လို့ လေယာဉ်လက်မှတ်အရောင်းဌာနတစ်ခုကပြောပါတယ်။

ခရီးသည်တွေအနေနဲ့ ကိုဗစ်မရှိကြောင်း ဆေးထောက်ခံချက်ကို ရန်ကုန်လေဆိပ် အဝင်ဂိတ်၊ check-in ကောင်တာ အပြင် ဆိုက်ရောက်ရာဒေသတွေမှာလည်း စစ်ဆေးမှုရှိပါက ပြသရမှာဖြစ်တယ်လို့ သိရပါတယ်။

ဒါကြောင့် လေယာဉ်လက်မှတ် ဖြတ်ထားပြီး ခရီးသွားဖို့ အဆင်မပြေသူတွေ ရှိပါက ဝယ်ယူထားတဲ့ လက်မှတ်ကို ရက်အပြောင်းအလဲပြုလုပ်နိုင်သလို ပြန်အမ်းငွေလျှောက်ထားနိုင်တယ်လို့ လေကြောင်းလိုင်းတွေကကြေငြာထားပါတယ်။

လက်ရှိမှာ ရန်ကုန် ၊မန္တလေး ၊ကချင်ပြည်နယ်၊ စစ်ကိုင်း၊ လွိုင်ကော်၊ ရခိုင်ပြည်နယ် တို့ကို လေကြောင်းခရီးစဉ်ပြေးဆွဲမှုရှိနေပါတယ်။

Share

က္က