Photo - မြောင်းမြသတင်း
မတ်လ ၆ ရက်နေ့က မြောင်းမြမြို့စာစစ်ဌာန (၅) မှာ စာမေးပွဲအခန်းစောင့် တာဝန်ကျတဲ့ ဆရာမတစ်ဦးဟာ စာမေးပွဲခန်းကိုရောက်ရမယ့်အချိန်မရောက်တာကြောင့် သူမရဲ့အိမ်ကိုသွားကြည့်ရာကနေ သေဆုံးနေတာကိုတွေ့ရတာပါ။
ရဲတပ်ဖွဲ့ရဲ့ပြောဆိုချက်အရ မနက် ၇ နာရီ ၅၀ မိနစ်လောက်မှာ ရဲက တွေ့ရှိခဲ့တာဖြစ်ပြီး ပြင်ပဒဏ်ရာ တစ်စုံတစ်ရာတော့ မတွေ့ခဲ့ရဘူးလို့ ဆိုပါတယ်။ ယခုဖြစ်ရပ်ကို မြောင်းမြရဲစခန်းက သေမှုသေခင်း ၆/၂၀၁၉ နဲ့အမှုဖွင့် စစ်ဆေးနေပါတယ်။
"စာမေးပွဲအချိန်မတိုင်မီ ၂ နာရီလောက် ကြိုရောက်ရမှာ ရောက်မလာလို့ လိုက်ကြည့်ရင်းက အိမ်ထဲမှာ သေဆုံးနေတာကိုတွေ့တာပါ။ စစ်ဆေးနေဆဲဖြစ်တဲ့အတွက် ဘာကြောင့် သေဆုံးရတယ်ဆိုတာ မသိသေးပါဘူး။"လို့ မြောင်းမြမြို့နယ် ရဲတပ်ဖွဲ့မှူးရုံးမှ တာဝန်ရှိသူက Duwun ကိုပြောပါတယ်။
သေဆုံးသူ အသက် ၅၄နှစ်အရွယ် ဆရာမဒေါ်ခင်အေးအေးမွန်ဟာ နေအိမ်မှာ တစ်ဦးတည်းနေထိုင်သူဖြစ်တာကြောင့် သူမ သေဆုံးချိန်မှာ မည်သူကမျှ တွေ့ရှိခဲ့ခြင်းမရှိဘူးလို့ ရဲတပ်ဖွဲ့ကနေ သိရပါတယ်။