လွှတ်တော်အမတ်ဟာ ကလေးမွေးဖွားချင်လာတာကြောင့် မနက်အစောပိုင်းမှာ ဆေးရုံသို့ စက်ဘီးစီးပြီး ကိုယ်တိုင်အရောက်သွားခဲ့ပါတယ်

နယူးဇီလန်မှာ လွှတ်တော်အမတ် အမျိုးသမီးတစ်ဦးက ကလေးမွေးဖွားရန် ဆေးရုံသို့ ကိုယ်တိုင် စက်ဘီးစီးသွားရောက်ခဲ့တဲ့သတင်းက လူအများ အံ့အားသင့်ခဲ့ကြရပါတယ်။

ကိုယ်ဝန်လွယ်ထားရတဲ့ လွှတ်တော်အမတ် Julie Anne Genter ဟာ ကလေးမွေးဖွားချင်လာတာကြောင့် ယနေ့ (နိုဝင်ဘာ ၂၈ ရက်) မနက်အစောပိုင်းမှာ ဆေးရုံသို့ စက်ဘီးစီးပြီး ကိုယ်တိုင်အရောက်သွားခဲ့ပါတယ်။ ဆေးရုံရောက်ပြီး တစ်နာရီအကြာမှာ Julie ကလေးမွေးဖွားခဲ့တယ်လို့ ဆိုပါတယ်။



(Photo: Julie Anne Genter's Facebook)

ထို့နောက် နာရီအနည်းငယ်အကြာမှာတော့ Julie က သူမရဲ့ Facebook မှာ "Big news!" လို့ အစချီထားတဲ့ ပို့စ်တစ်ခုရေးသားပြီး ဓာတ်ပုံတွေနဲ့အတူ တင်ထားတာတွေ့ရပါတယ်။ "ဒီမနက် ၃ နာရီ ၄ မိနစ်မှာ ကျွန်မတို့မိသားစုရဲ့ မိသားစုဝင်အသစ်လေးကို ကြိုဆိုခဲ့ကြပါတယ်၊ သားဖွားခန်းကို စက်ဘီးစီးသွားဖို့ ကျွန်မ အမှန်တစ်ကယ်ကို ပြင်ဆင်မထားခဲ့ပါဘူး၊ ဒါပေမဲ့ အဲဒီလို ဖြစ်သွားခဲ့တယ်" လို့ လွှတ်တော်အမတ်က Facebook မှာ ပြောထားပါတယ်။

"မနက် ၂ နာရီလောက် ကျွန်မတို့ အိမ်ကနေထွက်တော့ ကျွန်မ ဗိုက်နာတာက ဒီလောက်မဆိုးပါဘူး၊ ၂ မိနစ် ၃ မိနစ်ခြား တစ်ခါလောက် ဗိုက်နာတာပေါ့၊ ဒါနဲ့ လိုအပ်တာတွေ အသည်းအသန် ပြင်ဆင်ပြီး နောက် ၁၀ မိနစ်ကြတော့ ဆေးရုံကို အချိန်မီရောက်ခဲ့ကြတယ်" လို့ သူမက ရေးထားပါတယ်။

(Photo: Julie Anne Genter's Facebook)

လွှတ်တော်အမတ် Julie ဟာ နယူးဇီလန်-အမေရိကန် နှစ်နိုင်ငံ နိုင်ငံသားခံယူထားသူ ဖြစ်ပါတယ်။ သူမက အမေရိကန်နိုင်ငံ မင်နီဆိုးတားပြည်နယ်မှာ မွေးဖွားခဲ့ပြီး ၂၀၀၆ ခုနှစ်မှာ နယူးဇီလန်သို့ ပြောင်းရွှေ့လာခဲ့ပါတယ်။ လူဦးရေ ၅ သန်းရှိတဲ့ ကျွန်းနိုင်ငံဟာ နိုင်ငံရေးသမားတွေက ရိုးရိုးရှင်းရှင်း နှိမ့်ချပြုမူနေထိုင်ကြတဲ့ ဂုဏ်သတင်းကောင်းရှိထားပါတယ်။

နယူးဇီလန်ဝန်ကြီးချုပ် ဂျက်စင်ဒါအာဒန်းဟာ ဝန်ကြီးချုပ်အဖြစ် တာဝန်ယူထားစဥ် ကလေးမွေးဖွားခဲ့သူဖြစ်ပြီး သူမရဲ့ အသက် ၃ လအရွယ် ကလေးလေးကို နို့တိုက်နေဆဲကာလဖြစ်တာကြောင်း ကုလသမဂ္ဂအစည်းအဝေးတစ်ခုသို့ အတူခေါ်ဆောင်လာခဲ့လို့ နာမည်ကြီးခဲ့ပါသေးတယ်။ 


ဆက်စပ်အကြောင်းအရာများ

Share

က္က