အခြေခံပညာစာသင်ကျောင်းတွေမှာ ဗိုလ်ချုပ်အောင်ဆန်းအသင်းဖွဲ့စည်းဖို့ ရွှေပြည်သာမြို့နယ်မဲဆန္ဒနယ် ပြည်သူ့လွှတ်တော်ကိုယ်စားလှယ် ဦးဉာဏ်လင်းက ဖေဖော်ဝါရီ ၃ ရက်က ပြုလုပ်တဲ့ ပြည်သူ့လွှတ်တော်အစည်းအဝေးမှာ တင်ပြခဲ့ပါတယ်။

မျိုးဆက်သစ်လူငယ်တွေကို ဒီမိုကရေစီအလေ့အကျင့်ကောင်းတွေ ရရှိစေရန်၊ ကာယ၊ဉာဏ၊ စာရိတ္တ ဘက်စုံဖွံဖြိုးတိုးတက်စေဖို့ နိုင်ငံတော်အခြေခံနဲ့ အဆင့်မြင့်ပညာရေးကျောင်းတွေမှာ အခြေခံအသင်းအကောင်အထည်ဖော် ဆောင်ရွက်ပေးဖို့ နိုင်ငံတော်အစိုးရကို တိုက်တွန်းကြောင်း အဆိုတင်သွင်းခဲ့ရာမှာ အခုလို ပြောကြားခဲ့ပါတယ်။

“ ဗိုလ်ချုပ်အောင်ဆန်းအသင်းကို ဖွဲ့စည်းဆောင်ရွက်ဖို့ အလေးအနက် တင်ပြအပ်လိုပါတယ်။ ကျောင်းတွေမှာ ဝါ၊စိမ်း၊နီ၊ပြာ သို့မဟုတ် အနော်ရထာ၊ဘုရင့်နောင်၊ အလောင်းဘုရား၊ဗိုလ်တေဇ စသဖြင့် အသင်းအဖွဲ့ (၄) ဖွဲ့ကနေ ကျောင်းသားတွေကိုယ်တိုင်ပါဝင်တဲ့ ကျောင်းကောင်စီစုဖွဲ့ပြီး မျိုးဆက်သစ်လူငယ်တွေကို ဒီမိုကရေစီအလေ့အကျင့်ကောင်းတွေရရှိအောင် လုပ်ပေးသင့်ကြောင်း တင်ပြအပ်ပါတယ်။ “ လို့ ပြည်သူ့လွှတ်တော်ကိုယ်စားလှယ်ဦးဉာဏ်လင်းက ပြောပါတယ်။

အဆိုပါ ပြည်သူ့လွှတ်တော်ကိုယ်စားလှယ် ဦးဉာဏ်လင်းရဲ့ တိုက်တွန်းကြောင်းအဆိုကို ရွှေကူမဲဆန္ဒနယ်မှ ဦးဇာနည်မင်းက ထောက်ခံခဲ့ပြီး အဆိုကို ဆက်လက်ဆွေးနွေးဖို့ လွှတ်တော်က ဆုံးဖြတ်ခဲ့ပြီး ဖေဖော်ဝါရီ (၄) ရက်မှာ အမည်စာရင်းတင်သွင်းဖို့ ကြေညာခဲ့ပါတယ်။