ဘက်ထရီပါဝါကြီးပြီး ကင်မရာ Hardware အဆင့်မြှင့်တင်မှုနဲ့ ပင်မ Display ကြံ့ခိုင်မှု ပိုကောင်းလာတဲ့ Galaxy Z Flip 4 ကို ဩဂုတ်လ ၁၀ ရက်နေ့က မိတ်ဆက်သွားပါတယ်။
ယောက်သွားခွံစတိုင် အလယ်ခေါက် Clamshell ဒီဇိုင်းနဲ့လာတဲ့ Galaxy Z Flip 4 ဟာ Galaxy Unpacked 2022 မှာ ကြေညာသွားတဲ့ Foldable ဖုန်းမော်ဒယ်အမျိုးအစားနှစ်မျိုးထဲက တစ်မျိုး ဖြစ်ပြီး ဈေးသက်သာပြီး လူငယ်ဖက်ရှင်ဘက်ကို အသားပေးထားတဲ့ ထုတ်ကုန်ပါ။ ခေါက်ချိုးခေါက်ထားချိန်မှာ မိတ်ကပ်ဘူးလေးနဲ့ ဆင်ပြီး လူငယ်နဲ့ အမျိုးသမီတွေ ပိုအကြိုက်တွေ့မယ့် ဒီဇိုင်းထုတ်ထားတာ ဖြစ်ပါတယ်။
Galaxy Z Flip 4 ဟာ အရင် Z Flip 3 အတိုင်းပဲ ၆.၇ လက်မနဲ့ လာပြီး ပိုသပ်ရပ်သေးသွယ်တဲ့ ပတ္တာနဲ့ လာပါတယ်။ 120Hz Refresh Rate ပါပြီး Display တည်ဆောက်ပုံနဲ့ ပိုမာကျော်တဲ့ Ultra-Thin Glass မှန်ကြောင့် 45% ပို ကြံ့ခိုင်မှုတက်လာမယ်လို့ ဆိုပါတယ်။ ထောင့်စွန်းနဲ့ ဘောင်တွေ ပိုပြီး လေးထောင့်ဆန်လာလို့ ဒီဇိုင်းပိုင်း ပိုဖက်ရှင်ကျလာသလို လက်ထဲမှာ ကိုင်ရတာလည်း ပိုပြီး ကျစ်လျစ်မှု ရှိလာမှာပါ။
ရေစိုဖုန်တင်ခံမှုမှာ Galaxy Z Fold 4 လိုပဲ IPX8 Rating ရထားလို့ ရေစိုရေဝင်မှာတော့ မှုစရာရှိမှာ မဟုတ်ပါဘူး။ အပြင်ဘက် ၁.၉ လက်မ Cover Screen ဟာ ကိုယ်ရိုက်လိုက်တဲ့ Selfie ပုံတွေကို preview ကြည့်နိုင်မယ့်အပြင် စမတ်အိမ်ထိန်းချုပ်စနစ်တွေ အမြန်ရယူနိုင်တဲ့ SmartThings widget တစ်ခုလည်း ပါလာပြီး စာတွေအမြန် Quick Reply ပြန်တာ Samsung Wallet တွေ Access လုပ်တာမျိုးတွေပါ လုပ်နိုင်မှာပါ။
Galaxy Z Flip 4 ဟာ ခေါက်သိမ်းလျက်သားနဲ့ လုပ်လို့ရတဲ့ ကိစ္စတွေ အများကြီး ထောက်ပံ့ပေးထားပါတယ်။ ဖုန်း Unfold မလုပ်ဘဲ ဖုန်းခေါ်တာ ၊ Video Chat ထိုင်တာ ၊ စာပြန်တာတွေ လုပ်နိုင်ပါတယ်။ တစ်ဝက်ခေါက် အနေအထားနဲ့ ပြင်ညီပေါ်မှာ တင်ထားရင်း FlexCam ဖွင့်ပြီး Hands-Free ဗွီဒီယိုတွေ ရိုက်ကူးနိုင်ပါတယ်။ Samsung ဟာ ဒီ feature ကို Facebook ၊ WhatsApp နဲ့ Instagram တို့မှာလည်း အသုံးပြုနိုင်အောင် Meta နဲ့ partner လုပ်ထားတယ်လို့ ဆိုပါတယ်။
Flagship ထုတ်ကုန်ဖြစ်တဲ့အတိုင်း Galaxy Z Flip 4 ဟာ Snapdragon 8 Plus Gen 1 Chipset ကို RAM 8GB နဲ့ တွဲဖက်ထားပါတယ်။ ကျောဘက် Main Camera ကို 12MP ပဲ သုံးပေမယ့် pixel ကို အရင် 1.4μm ကနေ ပိုကြီးတဲ့ 1.8μm ကို ပြောင်းလာပြီး Optical Image Stabilization တပ်ပေးထားပါတယ်။ ဒီ Main Camera နဲ့အတူ 12MP Ultrawide ကင်မရာတွဲဘက် အသုံးပြုထားပါတယ်။ ရှေ့ဘက်ကတော့ 10MP Selfie ကင်မရာနဲ့ လာပါတယ်။
ဘက်ထရီပိုင်းမှာ 3300 mAh ကနေ 3700mAh ကို မြှင့်တင်ထားပြီး အားသွင်းနှုန်း Charging Speed ကိုလည်း 15W ကနေ 25W ကို မြှင့်တင်လာပါတယ်။ Wireless Charging ကတော့ 10W Speed ကိုပဲ ဆက်သုံးလာပါတယ်။ Galaxy Z Flip 4 ဟာ ဇီဝလုံခြုံရေးစနစ်အတွက် ဘေးဘောင်လက်ဗွေစနစ်တစ်ခု တပ်ဆင်ထားပြီး အရောင်အနေနဲ့ ခရမ်းရောင် ၊ ဂရပ်ဖိုက် ၊ ပန်းရောင်ရွှေစပ် နဲ့ အပြာရောင် ကာလာ ၄ မျိုးနဲ့ ထွက်ထားပါတယ်။ ဒီဖုန်းကို ဈေးနှုန်းအနေနဲ့ ၉၉၉ ဒေါ်လာ (အနည်းဆုံး မြန်မာငွေ ၂၅ သိန်းကျော်) ဈေးနဲ့ ရောင်းချသွားမှာပါ။