ခရီးသွားတဲ့အခါ ဘာတွေကြိုတင်လုပ်ဆောင်ထားသင့်သလဲ

ကိုယ်က ခရီးသွားတော့မယ်ဆိုရင် လမ်းခရီးမှာ စိတ်ချလုံခြုံစေဖို့ အတွက် ခရီးမသွားခင်မှာ ဒီအချက်တွေ ကြိုတင်ပြင်ဆင်ထားဖို့ လိုပါတယ်။

• သွားမယ့်ခရီးစဉ်ကို ကြိုတင်အစီအစဉ်ချထားပါ။
• တောတောင်ခရီး‌တွေကို တယောက်တည်းမသွားပါနဲ့။
• ညည့်နက်ပိုင်း လမ်းခရီးသွားလာခြင်းကိုရှောင်ပါ။
• သွားမယ့်နေရာဒေသ အကြောင်းလေ့လာစုံစမ်းပါ။
• အနီးပတ်ဝန်းကျင်က ဒေသခံတွေကို ဘယ်နေရာတွေက စိတ်ချလုံခြုံရနိုင်တယ်၊ ဘယ်နေရာတွေက အန္တရာယ်ရှိလဲဆိုတာ မေးမြန်းပါ။
• ယေဘုယျအားဖြင့်တော့ မိခင်အမျိုးသမီးတွေနဲ့ ကလေး‌ငယ်တွေ လမ်းညွှန်တဲ့ နေရာတွေက ပိုပြီး အန္တရာယ်ကင်းစိတ်ချနိုင်ပါတယ်။
• မှတ်ပုံတင်၊ ပတ်(စ်)ပို့၊ ယာဉ်မောင်းလိုင်စင် စတဲ့ အရေးကြီးတဲ့စာရွက်စာတမ်းတွေကို ဓာတ်ပုံရိုက်ကူးထားပြီး ဂရုတစိုက်သိမ်းဆည်းထားပါ။
• ‌လူသွားလူလာမပြတ်တဲ့ နေ့ပိုင်းအချိန်တွေမှာသာ ATM စက်မှာ ငွေထုတ်ပါ။
• ‌ခရီးစဥ်မှာငွေသားအမြောက်အများသယ်ဆောင်သွားတာမျိုးရှောင်ကြဉ်ပြီး ကရက်ဒစ်ကဒ်၊ မိုဘိုင်းဝေါလတ်တို့ကိုသာအတတ်နိုင်ဆုံး အသုံးပြုပါ။
• ပတ်ဝန်းကျင်မှာ ခိုက်ရန်ဖြစ်ပွား‌လာပါက အတတ်နိုင်ဆုံးရှောင်ရှားသွားပါ။

လုံခြုံစိတ်ချစွာခရီးသွားနိုင်ဖို့ သိထားသင့်တဲ့အချက်တွေက ဘာတွေလဲ

အသွားအပြန်လမ်းခရီးမှာ စိတ်ချလုံခြုံဖို့ဆိုရင် ခုပြောပြမယ့် အချက်လေးတွေကို သိကို သိထားသင့်ပါတယ်။

• လေဆိပ်လိုနေရာမျိုးမှာ ခရီးဆောင်အိတ်စစ်ဆေးတဲ့နေရာဟာ လူထူထပ်လေ့ရှိတာကြောင့် စိတ်ရှည်သည်းခံစွာစောင့်ဆိုင်းသင့်ပါတယ်။
• အရေးပေါ်အခြေအနေတွေအတွက် အရေးပေါ်ထွက်ပေါက်၊ လှေကားစတဲ့နေရာတွေကို ကြိုတင်ကြည့်လေ့လာထားပါ။
• သူစိမ်းတွေနဲ့အတူ ကားအတူငှားခြင်းကိုရှောင်ကျဉ်ပါ။
• ကိုယ်ပိုင်ကားနဲ့ခရီးသွားတဲ့အခါမှာလည်း နေရာဒေသအလိုက် အရှိန်ကိုထိန်းမောင်းသင့်ပါတယ်။

တည်းခိုရာနေရာမှာ ဘာတွေသတိထားလုပ်ဆောင်သင့်ပါသလဲ

• အရေးပေါ်အခြေအနေတွေအတွက် တည်းခိုတဲ့ ဟိုတယ်ရဲ့ အရေးပေါ်ထွက်ပေါက်၊ လှေကားစသည့်နေရာများကို ကြိုတင်ကြည့်လေ့လာထားပါ။
• အနားယူနေတဲ့အချိန်မှာ အခန်းတံခါးကို သေချာစွာ သော့ခတ်ပိတ်ထားပါ။
• တွေ့ဆုံစကားပြောစရာကိစ္စတွေရှိလာတဲ့အခါမှာ ဧည့်တွေ့ကောင်တာမှာပဲတွေ့သင့်ပြီး မိမိအခန်းထဲကိုခေါ်လာတာမျိုးကိုလည်းမလုပ်သင့်ပါဘူး။

ဒီအချက်တွေကိုသာ သေချာသတိထားလိုက်နာဆောင်ရွက်မယ်ဆိုရင် အန္တရာယ်ကင်းပြီး စိတ်ချလုံခြုံတဲ့ ခရီးလေး ဖြစ်မှာသေချာပါတယ်။

ယခု ခရီးသွားဆောင်းပါးကို Duwun နှင့် Flymya မှ ပူးပေါင်းတင်ဆက်ပါသည်။