စိတ်ပိုင်းဆိုင်ရာထိခိုက်မှုပြင်းထန်လေလေ စိတ်ကျန်းမာရေးမှာ ပိုပြီးဆိုးရွားလာလေလေ ဖြစ်တတ်ပါတယ်။ ဒါ့ကြောင့် စိတ်ကျန်းမာရေးပြဿနာတွေ ဖြစ်နေပြီဆိုရင် အမြန်ဆုံးသိရှိပြီး ကုသမှုမြန်မြန်ဆန်ဆန် ခံယူလိုက်တာက အကောင်းဆုံးပါ။ 

စိတ်ကျန်းမာရေးပြဿနာတွေကို ဘယ်အချိန်တွေမှာ အတွေ့များတတ်သလဲဆိုရင် များသောအားဖြင့်တော့ 

မျှော်လင့်မထားတဲ့ ဖြစ်ရပ်တွေနဲ့ ရင်ဆိုင်ရချိန် 

တန်ဖိုးထားမြတ်နိုးရတဲ့ အရာကိုဆုံးရှုံးသွားချိန် 

ကိုယ်မြတ်နိုးတန်ဖိုးထားတဲ့အရာကိုလက်လွှတ်ဆုံးရှုံးသွားချိန်၊ ကိုယ်ချစ်ခင်မြတ်နိုးရတဲ့ တစ်စုံတစ်ယောက်ဆုံးပါးသွားချိန်မှာလည်း စိတ်ပိုင်းဆိုင်ရာ ထိခိုက်မှုတွေ ရင်ဆိုင်ကြုံတွေ့ရတတ်ပါတယ်။ ချစ်ရခင်ရသူ၊ ဆွေမျိုးသားချင်း ၊ ချစ်သူ ၊ မိဘမောင်ဖွား စတာတွေတင်သာမက ကိုယ့်ရဲ့ အိမ်မွေးတိရစ္ဆာန်လေးတွေ ဆုံးပါးသွားချိန်မှာတောင်မှပဲ စိတ်ပိုင်းဆိုင်ရာ ထိခိုက်မှုတွေ ခံစားရတတ်ပါတယ်။ 

စီးပွားရေးကြပ်တည်းခက်ခဲချိန် 

စားဝတ်နေရေးနဲ့ ပတ်သက်ပြီး ခက်ခဲကြပ်တည်းလာတဲ့အချိန်မျိုးတွေမှာလည်း စိတ်ပိုင်းဆိုင်ရာထိခိုက်မှုတွေ ဖြစ်ပေါ်လာပါတယ်။ စီးပွားရေးချွတ်ခြုံကျလို့ ကိုယ့်ကိုယ်ကိုယ် သတ်သေလိုက်တာ ၊ အလုပ်ပြုတ်သွားလို့  မခံမရပ်နိုင်အောင်ဖြစ်တာ ချမ်းသာတဲ့သူတွေနဲ့ လူလတ်တန်းစားတွေမှာ ဒီလို စိတ်ပိုင်းဆိုင်ရာထိခိုက်မှုမျိုးကြုံနိုင်သလို ဆင်းရဲသူတွေမှာလည်း စားဝတ်နေရေးခက်ခဲမှုတွေကြောင့် စိတ်ပိုင်းဆိုင်ရာ ထိခိုက်တာမျိုးတွေ ဖြစ်တတ်ပါတယ်။ 

မိသားစုပြိုလဲသွားချိန်

တန်ဖိုးထားမြတ်နိုးရတဲ့ အရာကို ဆုံးရှုံးသွားချိန်နဲ့ ဆင်တူပါတယ်။ ကိုယ့်ဇနီးနဲ့ ကွာရှင်းလိုက်ရတာ ၊ ကိုယ့်ခင်ပွန်းနဲ့ ကွာရှင်းလိုက်ရတာ ။ ကိုယ့်သားသမီးနဲ့ မခွဲချင်ဘဲ ခွဲနေရတာ စတဲ့ အချိန်တွေမှာလည်း စိတ်ပိုင်းဆိုင်ရာ ထိခိုက်နာကျင်ခံစားရတတ်ပါတယ်။

ကိုယ်လက်အင်္ဂါချို့ယွင်းသွားချိန်

မွေးရာပါ ကိုယ်လက်အင်္ဂါချို့ယွင်းသူတွေမှာတောင် စိတ်ဓာတ်ကျတာ ၊ စိတ်အနာတရဖြစ်တာတွေ ရှိတတ်ပါတယ်။ နဂိုရှိရင်းစွဲအကောင်းကြီးကနေ ကြီးမားတဲ့ မတော်မဆတစ်ခုခုကြောင့် ကိုယ့်ရဲ့ ခြေလက်အင်္ဂါတစ်ခုခုမှာ ကုသမရနိုင်လောက်အောင် ချို့ယွင်းသွားတာ ( ဉပမာ မျက်စိမမြင်ရတော့တာ ၊ နားမကြားရတော့တာ ၊ ခြေ/လက် ဖြတ်ပစ်လိုက်ရတာ ) စတာတွေကလည်း စိတ်ပိုင်းဆိုင်ရာကျန်းမာရေးကို ထိခိုက်သွားစေနိုင်လောက်တဲ့ အရာတွေပါပဲ။

အကြမ်းဖက်မှုခံရတာ

နောက်ဆုံးတစ်ခုကတော့ အကြမ်းဖက်မှုခံရတာကြောင့် စိတ်ပိုင်းဆိုင်ရာ နာကျင်ခံစားရတဲ့အခြေအနေပါ။ ကိုယ့်ရဲ့ ရင်းနှီးချစ်ခင်သူတစ်ဦးဦး (ဉပမာ - မိဘဆွေမျိုးသားချင်း တွေရဲ့ အနိုင်ကျင့်နှိပ်စက်မှုတွေ၊ သူငယ်ချင်းအချင်းချင်း ပြစ်တင်ဝေဖန်ပြောဆိုခံရမှုတွေ) စတာတွေအပြင် အိမ်တွင်းအကြမ်းဖက်မှု ၊ လိင်ပိုင်းဆိုင်ရာအကြမ်းဖက်မှု ၊ အရွယ်မတိုင်ခင် အကြမ်းဖက်ခံရမှုတွေ၊ လုပ်ငန်းခွင်အကြမ်းဖက်မှု စတဲ့ အမျိုးမျိုးသော အကြမ်းဖက်ခံရမှုတွေထဲက တစ်ခုခုကို ရင်ဆိုင်ကြုံတွေ့ချိန်တွေမှာလည်း စိတ်ပိုင်းဆိုင်ရာ နာကျင်ခံစားရနိုင်ပါတယ်။

ဒီလိုနာကျင်ခံစားရမှုတွေဟာ ပြင်းထန်လာတာနဲ့အလျောက် စိတ်ပိုင်းဆိုင်ရာကျန်းမာရေးဟာလည်း ဆိုးရွားမှုတွေကလည်း ဆိုးသထက်ဆိုးလာပါတော့တယ်။ ဒီလို စိတ်ကျန်းမာရေးပြဿနာတွေဖြစ်နေပြီဆိုတာ သိပြီဆိုတာနဲ့ စောစော ကုသမှုခံယူမယ်ဆိုရင်တော့ စိတ်ကျန်းမာပျော်ရွှင်လာမှာ သေချာပါတယ်။

ဖော်ပြပါသတင်းဆောင်းပါးပါ အချက်အလက်များသည် Duwun Community Voice အစီအစဉ်မှ စိတ်ကျန်းမာရေးနယ်ပယ်က Lay-Counselor တစ်ဦးဖြစ်တဲ့ မထားအိရဲ့ အကြံပြုချက်များကို ကောက်နုတ်ဖော်ပြထားခြင်းဖြစ်ပါသည်။