ကိုယ့်ရဲ့ Idol ကြီးနဲ့အတူတူ သရုပ်ဆောင်နိုင်ဖို့အတွက် အခွင့်အရေးတစ်ခု ပေါ်ပေါက်လာပြီနော်။ TV Series ရိုက်ကူးဖို့အတွက် အမျိုးသမီး သရုပ်ဆောင် သစ်(၂)ဦးခေါ်ယူနေတာပါ။ ကိုယ်ချစ်တဲ့အနုပညာရှင်နဲ့အတူ တွဲပြီး သရုပ်ဆောင်ခွင့်ရဖို့ အမြန်ဆုံးလှုပ်ရှားဖို့လိုမယ်နော်။
Photo : sai sai
မိန်းကလေးပရိသတ်တွေရဲ့ အသည်းကျော် စိုင်းစိုင်းခမ်းလှိုင်နဲ့အတူ TV Series တစ်ခုမှာ သရုပ်ဆောင်ဖို့အတွက် အမျိုးသမီး သရုပ်ဆောင်သစ်(၂)ဦး ခေါ်ယူနေတယ်လို့ သိရပါတယ်။ သွက်လပ်ချက်ချာပြီး ရဲရဲတင်းတင်း သရုပ်ဆောင်နိုင်တဲ့သူ၊ အိမ်ထောင်မရှိသူဖြစ်ပြီး အသက်(၁၈-၂၅)နှစ်အတွင်းဖြစ်ရမယ်ဆိုပြီး ထုတ်လုပ်ရေးဘက်က ကြေညာထားပါတယ်။
“သွက်လက်ချက်ချာပြီး ရဲရဲတင်းတင်းသရုပ်ဆောင်နိုင်သူ၊ အသက် ၁၈ - ၂၅ အတွင်း၊ အိမ်ထောင်မရှိသူ လူလွတ်ဖြစ်ရမည်၊ကိုယ်လုံးပေါ်အလှဓာတ်ပုံတစ်ပုံ၊ မျက်နှာထင်ရှားစွာမြင်ရသော လိုင်စင်ဓာတ်ပုံတစ်ပုံ၊ အရုပ်အသံကြည်လင်စွာဖြင့် မိမိနှစ်သက်ရာ အကြောင်းအရာတစ်ခုအား ၃ မိနစ်စာ သရုပ်ဆောင်ထားသော ဗီဒီယိုဖိုင်တစ်ခု၊ နေရပ်လိပ်စာ ဖုန်းနံပါတ်” တို့ကို info@myanmarmedia7.com သို့ ဒီဇင်ဘာ(၃၁) ရက်နေ့ နောက်ဆုံးထားပြီး ပေးပို့ပေးရမှာ ဖြစ်ပါတယ်။
Photo : sai sai
ရွေးချယ်ခံရတဲ့ သရုပ်ဆောင်သစ်(၂)ဦးကတော့ ဝင်္ကပါလမ်းမများ ဆိုတဲ့ ဇာတ်လမ်းတွဲမှာ နာမည်ကြီး သရုပ်ဆောင်တွေ ဖြစ်ကြတဲ့ စိုင်းစိုင်းခမ်းလှိုင်၊ ဖြိုးငွေစိုး ၊သက်မွန်မြင့် ၊အေးမြတ်သူ၊ ခင်ဝင့်ဝါ တို့နဲ့အတူ သရုပ်ဆောင်ရမှာ ဖြစ်ပါတယ်။ ဒီဇာတ်လမ်းတွဲကို ဒါရိုက်တာ ထွဋ်တင့်ထွန်းက ရိုက်ကူးမှာ ဖြစ်ပြီး Skynet ကနေ ပြသသွားမှာ ဖြစ်တယ်လို့သိရပါတယ်။
Photo : sai sai
စိုင်းစိုင်းဟာ စိုင်းစိုင်း(Sai Sai)က အသက် ၁၈ နှစ်အရွယ်က တည်းက အနုပညာအလုပ်တွေ စတင်လုပ်ဆောင်ခဲ့သူတစ်ယောက်ဖြစ်ပါတယ်။ သူဟာ အခုလို ထိပ်တန်းစာရင်းဝင်အနုပညာရှင်တစ်ယောက်ဖြစ်လာဖို့ အခက်အခဲပေါင်းများစွာကိုလည်း ကျော်ဖြတ်ခဲ့ရသူပါ။ သရုပ်ဆောင်ပိုင်းနဲ့ ပတ်သက်လို့ ၂၀၀၇ခုနှစ်မှာ မင်္ဂလာပါဇာတ်ကား၊ ၂၀၀၇ခုနှစ်မှာ ဂုဏ်ရှိန်ပြင်းတဲ့ ချစ်ခြင်းသိက္ခာ၊ ၂၀၀၈ခုနှစ်မှာ ရင်ခွင်နှင်းဆီ ၊ ၂၀၁၁ခုနှစ်မှာအာဒံရယ် ဧဝရယ် ဒဿရယ်၊ ၂၀၁၆ခုနှစ်မှာ အေဒင်ရဲ့ နတ်သမီး၊ From Bangkok To Mandalay၊ ဂျုန်းဂျုန်းဂျက်ဂျက် စတဲ့ ရုပ်ရှင်ဇာတ်ကားတွေမှာ ပါဝင်ထားသူ တစ်ဦး ဖြစ်ပါတယ်။ အဲ့ဒီနောက် စိုင်းစိုင်းခမ်းလှိုင်ရဲ့ စီးပွားရေး အနေနဲ့ Frenzo Production မှာလည်းဦးဆောင် သူတစ်ဦးလည်းဖြစ်သလို SAI Cosmetix ရဲ့ ထုတ်လုပ်သူ တစ်ဦးလည်းဖြစ်ပါတယ်။