စင်ကာပူနိုင်ငံမှာ တစ်ရက်အတွင်း COVID-19 ကူးစက်ခံရသူ အသစ်တွေ့ရှိမှု ၃၈၆ ဦးအထိ အများဆုံးစံချိန်တင် မြင့်တက်လာခဲ့ကြောင်း ဧပြီ ၁၃ ရက် ညပိုင်း စာရင်းထုတ်ပြန်မှုအရ သိရှိရပါတယ်။

လက်ရှိအချိန်အထိ စင်ကာပူမှာ COVID-19 ကူးစက်ခံရသူ ၂,၉၁၈ ဦးအထိရှိလာပြီ ဖြစ်ပါတယ်။ ယနေ့ ထပ်မံတွေ့ရတဲ့ အစုအပြုံလိုက် ကူးစက်မှုနေရာအသစ် လေးခုရှိပြီး တံခါးထုတ်လုပ်ရောင်းချတဲ့ CitiWall ကုမ္ပဏီ၊ Jalan Kubor ရှိ ABC တည်းခိုဆောင်နဲ့ အခြား အဆောင်နှစ်ခုဖြစ်ကြောင်း CNAသတင်းက ဖော်ပြပါတယ်။

အသစ်တွေ့ရှိရတဲ့ ကူးစက်ခံရသူ ၃၈၆ ဦးအနက် ၂၈၀ ဟာ ယခင် ကူးစက်မှုတွေ့ရှိခဲ့တဲ့ နေရာများနဲ့ ဆက်စပ်နေပါတယ်။ စင်ကာပူမှာ COVID-19 ကူးစက်မှုတိုက်ဖျက်ရေး Circuit Breaker အမည်ဖြင့် အစီအမံများ ဆောင်ရွက်နေပါတယ်။ ထိုအစီအမံအရ လုပ်ငန်းများနဲ့ ကျောင်းများ ပိတ်ထားခြင်း၊ လူစုလူဝေး မပြုလုပ်စေခြင်း အပါအဝင် စည်းမျဥ်းစည်းကမ်းများ ထုတ်ပြန်ထားပြီး မလိုက်နာသူတွေကို စင်ကာပူဒေါ်လာ ၃၀၀ ဒဏ်ငွေပေးဆောင်စေမှာဖြစ်ကြောင်း သိရပါတယ်။