တစ်နာရီအတွင်း ငြှိမ်းသတ်နိုင်ခဲ့ပေမဲ့ ဆိုင်ခန်း ၁၂၀ ကျော် မီးထဲပါသွားခဲ့ပါတယ်။

မကွေးတိုင်း၊ စလင်းမြို့ မြို့မစျေးမီးလောင်မှုကြောင့် ဆိုင်ခန်းပေါင်း ၁၂၀ ကျော် ပျက်စီးသွားခဲ့တယ်လို့ သိရပါတယ်။



မနေ့ကနိုဝင်ဘာလ ၂၃ ရက်နေ့ ညနေ ပိုင်းမှာ မီးစတင်လောင်ကျွမ်းခဲ့တာဖြစ်ပြီး ည ၇ နာရီခွဲလောက်မှာ မီးငြှိမ်းနိုင်ခဲ့ပေမယ့် မီးလောင်မှုကြောင့် အထည်ဆိုင်၊ တောကုန်ဆိုင်၊ ကုန်စုံဆိုင် စတဲ့ဆိုင်တွေအပါအဝင် ဆိုင်ခန်းပေါင်း ၁၂၀ ကျော် မီးထဲပါသွားတယ်လို့သိရပါတယ်။

ဓာတ်ပုံ - Myanmar Fire Services Department

"တောင်းတွေ၊ပလုံးတွေဘက်က စလောင်တာဆိုတော့ လောင်စာဖြစ်သလို ဖြစ်ပြီး မီးလောင်မှုများသွားတယ်၊ ဈေးရဲ့အပြင်ဆိုင်ခန်းတွေတော့ တစ်ခန်းမှမပါဘူး၊‌ ဈေးအတွင်းထဲကဆိုင်ခန်းတွေ တော်တော်များများပါသွားတာပါ၊ စတိုးဆိုင်၊ အထည်ဆိုင် တွေပေါ့ " လို့ စလင်းဒေသခံကပြောပါတယ်။

အဆိုပါမီးလောင်မှူနဲ့ပတ်သက်ပြီး ဆုံးရှုံးမှုတန်ဖိုးကို မသိရှိရသေးသလို မီးစတင်လောင်ကျွမ်းမှုအကြောင်းကိုလည်း မီးသတ်ဦးစီးဌာနဘက်ကထုတ်ပြန်ပြောဆိုတာမရှိသေးဘူးလို့သိရပါတယ်။

ဓာတ်ပုံ - Myanmar Fire Services Department

စလင်းမြို့မ‌ဈေးထဲမှာက စျေးဆိုင်ခန်းစုစုပေါင်း ၇၃၆ ခန်းရှိတယ်လို့သိရပါတယ်။

စလင်းမြို့ မြို့မစျေးမီးလောင်မှုကို စလင်းမြို့နယ်မီးသတ်စခန်းမှ မီးသတ်ယာဉ်(၃)စီး၊ရေသယ်ယာဉ်(၃)စီး၊ မင်းဘူးခရိုင်မီးသတ်စခန်းမှ မီးသတ်ယာဉ်(၁)စီး၊ ဆင်ဖြူကျွန်းနယ်မြေမီးသတ်စခန်းမှ မီးသတ်ယာဉ်(၁)စီး၊ ရေသယ်ယာဉ်(၁)စီး၊ ပွင့်ဖြူမြို့နယ်မီးသတ်စခန်းမှ မီးသတ်ယာဉ်(၁)စီး၊ ရေသယ်ယာဉ်(၁)စီး၊ ကုန်းဇောင်းနယ်မြေမီးသတ်စခန်းမှ မီးသတ်ယာဉ်(၁)စီး၊ ကန်ပြားနယ်မြေမီးသတ်စခန်းမှ ရေသယ်ယာဉ်(၁)စီး စုစုပေါင်း (၁၃)စီးတို့ဖြင့် အချိန် တစ်နာရီကျော်အကြာ ငြိမ်းသတ်ခဲ့တာဖြစ်တယ်လို့သိရပါတယ်။


ဆက်စပ်အကြောင်းအရာများ

Share

က္က